ಮಳೆಗಾಗಿ ಕಾದು ಕುಳಿತ ಕೃಷಿಕರು Rain

ಮಳೆ ಅಭಾವದಿಂದ ತಾಲೂಕಿನಲ್ಲಿ ರಾಗಿ ಬಿತ್ತನೆ ಪ್ರಾರಂಭವಾಗಿಲ್ಲ. ಜೂನ್​ ಮೊದಲನೆ ವಾರದಲ್ಲಿ ನಾಲ್ಕೆ$ದು ಬಾರಿ ಮಳೆಯಾಗಿರುವುದನ್ನು ಹೊರತುಪಡಿಸಿದರೆ ಈವರೆಗೂ ತಾಲೂಕಿನಲ್ಲಿ ಮಳೆಯಾಗಿಲ್ಲ. ಹಳ್ಳ ಕೊಳ್ಳದಲ್ಲಿದ್ದ ನೀರು ಬತ್ತಿಹೋಗಿದ್ದು, ಕೆರೆಗಳಲ್ಲಿ ಸಂಗ್ರಹವಾಗಿರುವ ನೀರಿನ ಪ್ರಮಾಣ ಕುಸಿಯುತ್ತಿದೆ.

ತಾಲೂಕಿನಲ್ಲಿ ಸುಮಾರು 35 ಸಾವಿರ ಹೆಕ್ಟೇರ್​ ಪ್ರದೇಶ ಒಣ ಭೂಮಿ ಇದ್ದು, ಬಹುತೇಕ ರೈತರು ಮಳೆ ಆಧಾರಿತ ಬೆಳೆಯನ್ನೇ ಅವಲಂಬಿಸಿದ್ದಾರೆ. ಪ್ರತಿ ವರ್ಷ ಮುಂಗಾರು ಪೂರ್ವದಲ್ಲಿ ದ್ವಿದಳ ಧಾನ್ಯಗಳಾದ ಹೆಸರು, ಉದ್ದು, ಅಲಸಂದೆ, ಕಡಲೆ, ಗೋವಿನ ಜೋಳ, ತೊಗರಿ ಬಿತ್ತನೆ ಮಾಡಲಾಗುತ್ತಿತ್ತು.

ಆದರೆ, ಈ ಬಾರಿ ಮಳೆ ಕೊರತೆಯಿಂದ ದ್ವಿದಳ ಧಾನ್ಯಗಳು ಬಿತ್ತನೆಯಾಗಿಲ್ಲ. ಇನ್ನು ಹಲವೆಡೆ ಶೇ.40 ಕೃಷಿ ಭೂಮಿಯನ್ನು ಉಳುಮೆ ಮಾಡಿಲ್ಲ. ಜೂನ್​ ಕೊನೆ ಅಥವಾ ಜುಲೈ ಮೊದಲ ವಾರದಿಂದ ಬಿತ್ತನೆ ಪ್ರಾರಂಭವಾಗಬೇಕಿತ್ತು. ಇದೀಗ ಬಿತ್ತನೆ ವಿಳಂಬವಾಗಿದ್ದು, ಭೂಮಿ ಹಸನು ಮಾಡಿರುವ ರೈತರಿಗೆ ಬರದ ಛಾಯೆ ಕಾಡುತ್ತಿದೆ.

ತಾಲೂಕಿನಲ್ಲಿ ಒಟ್ಟು 1.70 ಲಕ್ಷ ಜಾನುವಾರುಗಳಿದ್ದು, ಆಗಸ್ಟ್​ನ ಒಳಗಾಗಿ ಮಳೆಯಾಗದಿದ್ದರೆ ಜಾನುವಾರುಗಳಿಗೆ ಮೇವಿನ ಕೊರತೆಯಾಗಲಿದೆ. ಮಳೆಯಾಶ್ರಿತ ಭೂಮಿ ಹೊಂದಿರುವ ರೈತರಿಗೆ ಈಗಾಗಲೇ ಮೇವಿನ ಕೊರತೆ ಎದುರಾಗಿದ್ದು, ಜೂನ್​ನಲ್ಲಿ ಬಿದ್ದ ಮಳೆಗೆ ಚಿಗುರಿದ್ದ ಹುಲ್ಲು ಒಣಗಲಾರಂಭಿಸಿದೆ.