ನಕಲಿ ಬುಡುಬುಡುಕೆಯವನ ಕೈಚಳಕ; 'ನಿಮ್ಮ ಮನೆಯಲ್ಲಿ ಸಾವಿನ ಕಂಟಕ ಇದೆ ಪೂಜೆ ಮಾಡ್ತೀನಿ' ಎಂದು ಲಕ್ಷಕ್ಕೂ ಹೆಚ್ಚು ಮೌಲ್ಯದ ಚಿನ್ನಾಭರಣ ಉಡೀಸ್.. Bengaluru

ಹೆಗ್ಗಡದೇವನಪುರ ನಿವಾಸಿ ಮೋಹನ್​ ಪತ್ನಿ ಉಷಾ ಎಂಬುವವರೇ ಮೋಸ ಹೋದಾಕೆ. ಉಷಾ ಅವರು 8 ತಿಂಗಳ ಗರ್ಭಿಣಿ. ಇದನ್ನೇ ಬಂಡವಾಳವನ್ನಾಗಿ ಮಾಡಿಕೊಂಡ ಈ ಕಳ್ಳ ಸ್ವಾಮೀಜಿ. ನಿಮ್ಮ ಮನೆಯಲ್ಲಿ ದೋಷವೊಂದು ಕಾಣುತ್ತಿದೆ. ಇಷ್ಟರಲ್ಲೇ ಯಾರೋ ಸಾಯುತ್ತಾರೆ ಎನ್ನುವ ಸೂಚನೆ ಇದೆ ಎಂದು ಹೆದರಿಸಿದ್ದಾನೆ.

ಮೊದಲೇ ಪತ್ನಿ ಗರ್ಭಿಣಿಯಾಗಿದ್ದ ಕಾರಣ ತೀವ್ರ ಭಯಪಟ್ಟು, ಇದಕ್ಕೆ ಪರಿಹಾರವೇನೆಂದು ಕೇಳಿಕೊಂಡಿದ್ದಾರೆ. ಒಂದು ಪೂಜೆ ಮಾಡಬೇಕು. ನನಗೇನು ಹಣ ಬೇಡ ಎಂದು ಆತ ಹೇಳಿ, ಮನೆ ಒಳಗೆ ಪ್ರವೇಶಿಸಿದ್ದಾನೆ. ತನ್ನ ಬಳಿ ಇದ್ದ ಮಡಿಕೆಯೊಂದನ್ನು ಮಧ್ಯ ಇಟ್ಟು ಇದಕ್ಕೆ ನಿಮ್ಮ ಬಳಿ ಇರುವ ಚಿನ್ನದ ಒಡವೆಯನ್ನು ಹಾಕಿ, ಇದರಿಂದ ನಿಮ್ಮ ಸಂಪತ್ತು ವೃದ್ಧಿಯಾಗೋದಲ್ಲದೆ, ದೋಷಕ್ಕೆ ಪರಿಹಾರ ಸಿಗುತ್ತದೆ ಎಂದು ನಂಬಿಸಿದ್ದಾನೆ.

ಖದೀಮ ಹೇಳುತ್ತಿರುವುದೆಲ್ಲ ನಿಜ ಎಂದು ನಂಬಿದ ದಂಪತಿ, ತಮ್ಮ ಬಳಿ ಇದ್ದ ಸರ, ಓಲೆ, ಮಾಟಿ, ಉಂಗುರ ಎಲ್ಲವನ್ನು ಮಡಿಕೆಗೆ ಹಾಕಿದ್ದಾರೆ. ದಂಪತಿಗೆ ನೀರು ತರುವಂತೆ ಹೇಳಿದ ಸಂದರ್ಭದಲ್ಲಿ ಮಡಿಕೆಯನ್ನು ಬದಲಾಯಿಸಿದ್ದಾನೆ. ಖಾಲಿ ಮಡಿಕೆಯನ್ನು ಮನೆಯಲ್ಲಿಟ್ಟು ಮತ್ತೊಂದನ್ನ ತನ್ನ ಜೋಳಿಗೆಯಲ್ಲಿ ಇರಿಸಿದ್ದಾನೆ,.

ಪೂಜಾಕಾರ್ಯ ಪೂರ್ಣಗೊಂಡ ನಂತರ, ಇಬ್ಬರ ಕೈಗೆ ವಸ್ತುವೊಂದನ್ನು ಇಟ್ಟು, ಕೆರೆ ಬಳಿ ಬಿಟ್ಟು ಬನ್ನಿ ಎಂದು ನಿರ್ದೇಶಿಸಿದ್ದಾನೆ. ದಂಪತಿ ಅತ್ತ ಹೋಗುತ್ತಲೇ ಕಳ್ಳ ತನ್ನ ಕೈ ಚಳಕ ತೋರಿಸಿ, ಒಂದು ಲಕ್ಷದ ಇಪ್ಪತ್ತು ಸಾವಿರ ರೂಪಾಯಿಯ ಚಿನ್ನವನ್ನು ಬಾಚಿಕೊಂಡು ಪರಾರಿಯಾಗಿದ್ದಾನೆ.

ಪೂಜೆ ಮಾಡುವಾಗ ಬೂದಿಯನ್ನು ಹಾಕಿ ಸಂತ್ರಸ್ತೆ ಗೀತ ಎಂಬುವವರು ಪ್ರಜ್ಞೆ ತಪ್ಪುವಂತೆ ಮಾಡಿದ್ದಾನೆ. ಆನಂತರ ಲಕ್ಷಕ್ಕೂ ಹೆಚ್ಚು ಬೆಲೆ ಬಾಳುವ ಚಿನ್ನವನ್ನು ದೋಚಿ ಪರಾರಿಯಾಗಿದ್ದಾನೆ ಎಂದು ಪೊಲೀಸರು ಮಾಹಿತಿ ಹಂಚಿಕೊಂಡಿದ್ದರು,(ಏಜೆನ್ಸೀಸ್).