ಚಿರತೆ ಪುನರ್ವಸತಿ ಕೇಂದ್ರ ಸ್ಥಾಪನೆ

ನವೀನ್​ ಶೆಟ್ಟಿ ಕೆರಾಡಿ ಆನೇಕಲ್​

ದೇಶದಲ್ಲೇ ಅತಿ ದೊಡ್ಡ ಚಿರತೆ ಸಫಾರಿ ಹೊಂದಿರುವ ಬನ್ನೇರುಘಟ್ಟ ಜೈವಿಕ ಉದ್ಯಾನವನದಲ್ಲಿ ಈಗ ರಾಜ್ಯ ಸರ್ಕಾರ ಮಾಡುವುದಾಗಿ ಬಜೆಟ್​ನಲ್ಲಿ ಘೋಷಿಸಿದೆ.

ಬಯೋಲಾಜಿಕಲ್​ ಪಾರ್ಕ್​ನ 20 ಹೆಕ್ಟೇರ್​ನಲ್ಲಿ ಚಿರತೆ ಸಫಾರಿ ನಿಮಾರ್ಣ ಮಾಡಲಾಗಿದ್ದು, ಹುಲಿ ಹಾಗೂ ಸಿಂಹ ಮತ್ತು ಕರಡಿ ಸಾರಿ ಜತೆಗೆ ಚಿರತೆಯನ್ನು ನೋಡುವ ಅವಕಾಶವನ್ನು ಪ್ರವಾಸಿಗರಿಗೆ ಕಲ್ಪಿಸಿಕೊಡಲಾಗಿದೆ.

ಅಂತೆಯೇ, ಸಿಎಂ ಸಿದ್ದರಾಮಯ್ಯ ಈ ಬಾರಿಯ ಬಜೆಟ್​ನಲ್ಲಿ ಜೈವಿಕ ಉದ್ಯಾನವನದಲ್ಲಿ ಪ್ರಕೃತಿ ನಿರೂಪಣ ಕೇಂದ್ರ ಸ್ಥಾಪನೆ ಹಾಗೂ ಐದು ಕೋಟಿ ವೆಚ್ಚದಲ್ಲಿ ಚಿರತೆ ಪುನರ್ವಸತಿ ಕೇಂದ್ರ ಸ್ಥಾಪನೆ ಮಾಡುವುದಾಗಿ ಹೇಳಿದ್ದು, ಮುಂದಿನ ದಿನಗಳಲ್ಲಿ ಬನ್ನೇರುಘಟ್ಟದಲ್ಲಿ ಮತ್ತೊಂದು ಹೊಸ ಮೈಲಿಗಲ್ಲಾಗಲಿದೆ.

ಚಿರತೆ ಪುನರ್ವಸತಿ ಕೇಂದ್ರ ಸ್ಥಾಪನೆಗೆ ರಾಜ್ಯ ಸರ್ಕಾರ ಐದು ಕೋಟಿ ಹಣ ಮೀಸಲು ಇಟ್ಟಿರುವುದು ಗಡಿಭಾಗದ ರೈತರಿಗೆ ಹಾಗೂ ಪ್ರಾಣಿ ಪ್ರಿಯರಿಗೆ ಖುಷಿ ನೀಡಿದ್ದು, ಇದರಿಂದ ಚಿರತೆಗಳ ಸಂರಕ್ಷಣೆ ಸಾಧ್ಯ ಆಗಲಿದೆ. ಜತೆಗೆ ಕಾಡು ಮತ್ತು ನಾಡಿನ ಗಡಿ ಪ್ರದೇಶದಲ್ಲಿ ಚಿರತೆ ಆತಂಕ ಸ್ವಲ್ಪ ಕಡಿಮೆ ಆಗಲಿದೆ. ಮುಂದಿನ ದಿನಗಳಲ್ಲಿ ರಾಜ್ಯದ ವಿವಿಧ ಭಾಗದಲ್ಲಿ ರಕ್ಷಣೆ ಮಾಡುವ ಚಿರತೆಗಳನ್ನು ತಂದು ಪುನರ್ವಸತಿ ಕಲ್ಪಿಸಲು ವರದಾನವಾಗಲಿದೆ.

ಬನ್ನೇರುಘಟ್ಟ ಚಿರತೆ ಸಫಾರಿಯಲ್ಲಿ ರಾಜ್ಯದ ಮೂಲೆ ಮೂಲೆಗಳಿಂದ ತಾಯಿಯಿಂದ ದೂರ ಆಗಿರುವ ಮರಿ ಚಿರತೆಗಳನ್ನು ತಂದು ರಕ್ಷಣೆ ಮಾಡಿ ಅವುಗಳನ್ನು ಆರೈಕೆ ಮಾಡಿ ಸಫಾರಿಯಲ್ಲಿ ಬಿಡಲಾಗಿದ್ದು, ಪುನರ್ವಸತಿ ಕೇಂದ್ರ ಸ್ಥಾಪನೆ ಮಾಡುವುದರಿಂದ ಚಿರತೆ ಸಫಾರಿ ಉತ್ತೇಜನ ದೊರೆಯಲಿದೆ.