ಮುನಿದ ಮುಂಗಾರು ಅನ್ನದಾತ ಕಂಗಾಲು

ಬಸವಕಲ್ಯಾಣ: ಮಳೆ ಕೊರತೆಯಿಂದಾಗಿ ಬಸವಕಲ್ಯಾಣ ಮತ್ತು ಹುಲಸೂರು ತಾಲೂಕುಗಳಲ್ಲಿ ಮುಂಗಾರು ಬಿತ್ತನೆಗೆ ತೀವ್ರ ಹಿನ್ನಡೆಯಾಗಿದ್ದು, ತಿಂಗಳ ಹಿಂದೆಯೇ ಬಿತ್ತನೆಗಾಗಿ ಹೊಲ ಹದ ಮಾಡಿದ್ದ ರೈತರು ಮಳೆ ನಿರೀಕ್ಷೆಯಲ್ಲಿ ದಿನದೂಡುತ್ತಿದ್ದಾರೆ. ಇನ್ನು ಮಳೆ ಭರವಸೆಯಲ್ಲಿ ಬಿತ್ತನೆ ಮಾಡಿದ ರೈತರಿಗೆ ಬೀಜ ಹಾಳಾಗುವ ಚಿಂತೆ ಕಾಡುತ್ತಿದೆ.

ಬಸವಕಲ್ಯಾಣ ತಾಲೂಕಿನಲ್ಲಿ 74336 ಹೆಕ್ಟೇರ್​ ಗುರಿ ಪೈಕಿ 30431 ಹೆಕ್ಟೇರ್​, ಹುಲಸೂರಿನಲ್ಲಿ 19171 ಹೆಕ್ಟೇರ್​ ಪೈಕಿ 7808 ಹೆಕ್ಟೇರ್​ ಬಿತ್ತನೆ (ಶೇ.41) ಆಗಿದೆ. ಜೂನ್​ ವಾಡಿಕೆ ಮಳೆ 153.5 ಎಂಎಂ ಪೈಕಿ 59.3 (ಶೇ.61 ಕೊರತೆ) ಮಾತ್ರ ಆಗಿದೆ.

ಆರಂಭದಲ್ಲಿ ಒಂದಿಷ್ಟು ಮಳೆಯಾಗಿದ್ದರೂ ಕೃಷಿಗೆ ಪೂರಕವಲ್ಲ ಎಂದು ಶೇ.60 ರೈತರು ಬಿತ್ತನೆ ಮಾಡದೆ ಇಂದು&ನಾಳೆ ಆಗಬಹುದು ಎಂದು ಮುಗಿಲಿನತ್ತ ನೋಡುತ್ತಿದ್ದಾರೆ. ಇನ್ನು ಈಗಾಗಲೇ ಬಿತ್ತಿದ ರೈತರಿಗೆ ಸಮರ್ಪಕ ಮಳೆ ಆಗದಿರುವುದು ಚಿಂತೆಗೀಡು ಮಾಡಿದೆ. ಇನ್ನೊಂದು ವಾರ ಮಳೆರಾಯ ಧರೆಗಿಳಿಯದಿದ್ದರೆ ಬಿತ್ತಿದ್ದ ಬೀಜ ಸಜ ಮಣ್ಣುಪಾಲಾಗಲಿದೆ.

ಸೋಯಾ, ಅವರೆ ಬೀಜವನ್ನು ಜೂನ್​ ಮೊದಲನೇ ವಾರದಿಂದ ಜುಲೈ 2ನೇ ವಾರದವರೆಗೆ ಬಿತ್ತಿದರೆ ಇಳುವರಿಯಲ್ಲಿ ಗಣನೀಯ ವ್ಯತ್ಯಾಸವಾಗಲ್ಲ. ಬಿತ್ತುವುದಕ್ಕೆ ಇನ್ನೂ ಒಂದಿಷ್ಟು ಸಮಯವಿದೆ ಎನ್ನುತ್ತಾರೆ ಕೃಷಿ ಅಧಿಕಾರಿಗಳು.

ಸಾಮಾನ್ಯವಾಗಿ ಸೋಯಾ, ಅವರೆ ಬಿತ್ತನೆ ಬೀಜಗಳನ್ನು ಕನಿಷ್ಠ 80 ಎಂಎಂ ಮಳೆಯಾದ ನಂತರ ಅಥವಾ ಜಮೀನಿನಲ್ಲಿ ಕನಿಷ್ಠ 100 ಎಎಂ ಹಸಿಯಾದ ನಂತರವೇ ಬಿತ್ತನೆ ಕೈಗೊಂಡಲ್ಲಿ ಮೊಳಕೆ ಪ್ರಮಾಣ ಗರಿಷ್ಠ ಪ್ರಮಾಣದಲ್ಲಿ ಇರುತ್ತದೆ. ಇಲ್ಲವಾದಲ್ಲಿ ಮೊಳಕೆ ಪ್ರಮಾಣ ಮತ್ತು ಸಸಿಗಳ ಸಂಖ್ಯೆ ಕಡಿಮೆ ಆಗುವ ಸಾಧ್ಯತೆ ಇದೆ. ರೈತರು ಸಮರ್ಪಕ ಮಳೆ ಮತ್ತು ತೇವಾಂಶ ನೋಡಿಕೊಂಡೇ ಬಿತ್ತನೆ ಮಾಡಬೇಕು ಎಂದು ಅವರು ಸಲಹೆ ನೀಡಿದ್ದಾರೆ.

31 ಕೊನೇ ದಿನ: ಬೆಳೆ ವಿಮೆ ಮಾಡಲು ಜು.31 ಕೊನೆಯ ದಿನವಾಗಿದೆ. ಹಲವೆಡೆ ಇದುವರೆಗೆ ಬಿತ್ತನೆಯೇ ಆಗಿಲ್ಲ. ಬಿತ್ತನೆಗೆ ಮುನ್ನ ಅದ್ಹೇಗೆ ವಿಮೆ ಮಾಡಬೇಕು? ಯಾವ ಬೆಳೆ ತೋರಿಸಬೇಕು ಎಂದು ರೈತರು ಗೊಂದಲದಲ್ಲಿದ್ದಾರೆ. ಆದರೆ ಬಿತ್ತನೆಪೂರ್ವ ವಿಮೆ ಮಾಡಬಹುದು ಎಂದು ಕೃಷಿ ಅಧಿಕಾರಿಗಳು ಸಲಹೆ ನೀಡಿದ್ದಾರೆ.

"

ಬಸವಕಲ್ಯಾಣ ಹಾಗೂ ಹುಲಸೂರು ತಾಲೂಕಿನಲ್ಲಿ ಶೇ.41 ಬಿತ್ತನೆ ಆಗಿದೆ. ವಾರದಲ್ಲಿ ಉತ್ತಮ ಮಳೆಯಾದರೆ ಬಿತ್ತಿದ ಬೆಳೆಯಲ್ಲಿ ಯಾವುದೇ ವ್ಯತ್ಯಾಸವಾಗದು. ಇನ್ನು ಬಿತ್ತನೆ ಮಾಡಬೇಕಿರುವ ರೈತರು ಸಮರ್ಪಕ ಮಳೆ ಮತ್ತು ಭೂಮಿಯಲ್ಲಿ ತೇವಾಂಶ ನೋಡಿಕೊಂಡೇ ಬಿತ್ತನೆ ಮಾಡುವುದು ಒಳಿತು.

— > ಗೌತಮ ವಾಘಮಾರೆ ಸಹಾಯಕ ಕೃಷಿ ನಿರ್ದೇಶಕ

"

ಮುಂಗಾರು ಮಳೆ ಕೊರತೆಯಿಂದಾಗಿ ತಾಲೂಕಿನಲ್ಲಿ ಶೇ.60 ರೈತರು ಬಿತ್ತನೆ ಮಾಡಿಲ್ಲ. ಬಿತ್ತಿದವರು ಸಹ ಮಳೆ ಇಲ್ಲದೆ ಇಳುವರಿ ಕುಸಿತದ ಭೀತಿಯಲ್ಲಿದ್ದಾರೆ. ವಾರದಲ್ಲಿ ಸಮರ್ಪಕ ಮಳೆ ಆಗದಿದ್ದರೆ ಬರದ ಸ್ಥಿತಿ ನಿಮಾರ್ಣವಾಗಲಿದ್ದು, ಸರ್ಕಾರ ಅನ್ನದಾತರ ನೆರವಿಗೆ ಬರಬೇಕು.

— > ಸುಭಾಷ ರಗಟೆ ತಾಲೂಕು ಅಧ್ಯಕ್ಷ, ಕರ್ನಾಟಕ ರಾಜ್ಯ ರೈತ ಸಂಘ