ಕಷ್ಟದ ಸಮಯದಲ್ಲಿ ವಿದ್ಯುತ್ ಹೊರೆ

ಪಟ್ಟಣದ ಬನಶಂಕರಿ ದೇವಸ್ಥಾನದ ಆವರಣದಿಂದ ನೇಕಾರ ಮುಖಂಡ ರಾಚೋಟೇಶ್ವರ ಕುದರಿ ನೇತೃತ್ವದಲ್ಲಿ ನೂರಾರು ನೇಕಾರರು ಹೆಸ್ಕಾಂ ವಿರುದ್ಧ ಘೋಷಣೆ ಕೂಗುತ್ತಾ ಪಟ್ಟಣದ ಪ್ರಮುಖ ಬೀದಿಯಲ್ಲಿ ಸಂಚರಿಸಿ ರಾಷ್ಟ್ರೀಯ ಹೆದ್ದಾರಿ ಮೂಲಕ ಹಾಯ್ದು ಹೆಸ್ಕಾಂ ಕಚೇರಿ ತಲುಪಿ ಶಾಖಾಧಿಕಾರಿಗೆ ಮನವಿ ಸಲ್ಲಿಸಿದರು.

ಮುಖಂಡ ರಾಚೋಟೇಶ್ವರ ಕುದರಿ ಮಾತನಾಡಿ, 2024ರಲ್ಲಿಯೇ ನೇಕಾರರ ಸಂಕಷ್ಟ ಅರೆತ ಸರ್ಕಾರ ಆದೇಶದ ಮಾಡಿ, 10 ಹೆಚ್‌ಪಿವರೆಗೆ ವಿದ್ಯುತ್ ಸಂಪರ್ಕ ಹೊಂದಿದ ವಿದ್ಯುತ್ ಮಗ್ಗದ ನೇಕಾರರಿಗೆ 250 ಯೂನಿಟ್‌ವರೆಗೆ ಯಾವುದೇ ರೀತಿಯ ವಿದ್ಯುತ್ ಶುಲ್ಕ ಸೇರಿ ಇತರೆ ಚಾರ್ಜ್‌ಗಳು ಅನ್ವಯವಾಗದೆ ಸಂಪೂರ್ಣ ಉಚಿತವೆಂದು ಘೋಷಿಸಿ, ಜೀರೋ ಬಿಲ್ ನೀಡಲಾಗುತ್ತಿತ್ತು. ಆದರೆ ಕಳೆದ ಏಪ್ರಿಲ್ ತಿಂಗಳಿನಲ್ಲಿ ನೇಕಾರರಿಗೆ 200, 300, 400, 500, 900 ಹಾಗೂ 1500 ರೂ. ವರೆಗೆ ವಿದ್ಯುತ್ ಬಿಲ್ ನೀಡಿ ಪಾವತಿಸುವಂತೆ ಸಿಬ್ಬಂದಿ ಸೂಚಿಸಿದ್ದು ನಮ್ಮ ಆತಂಕಕ್ಕೆ ಕಾರಣವಾಗಿದೆ.

ಅಳಿವಿನಂಚಿನಲ್ಲಿರುವ ನೇಕಾರರಿಗೆ ಹೆಸ್ಕಾಂ ಇಲಾಖೆ ಗಾಯದ ಮೇಲೆ ಬರೆ ಎಳೆದಂತಾಗಿದ್ದು ಮೊದಲಿನಂತೆ ನೇಕಾರರಿಗೆ ಜೀರೋ ನೀಡಬೇಕೆಂದು ಹೆಸ್ಕಾಂ ಹಾಗೂ ಸರ್ಕಾರಕ್ಕೆ ಆಗ್ರಹಿಸಿದರು. ಸಮಸ್ಯೆಯನ್ನು ಶೀಘ್ರ ಸರಿಪಡಿಸಿ ಸೂಕ್ತ ಪರಿಹಾರ ಕಲ್ಪಿಸದಿದ್ದರೆ ಉಗ್ರ ಹೋರಾಟ ಅನಿವಾರ್ಯವೆಂದು ನೇಕಾರರು ಸರ್ಕಾರ ಹಾಗೂ ಇಲಾಖೆಗೆ ಎಚ್ಚರಿಕೆ ನೀಡಿದರು.

ರಮೇಶ ರೂಡಗಿ, ರವಿ ಹುಲಮನಿ, ಹನಮಂತ ಗದ್ದನಕೇರಿ, ಕೃಷ್ಣ ಮಾನ್ವಿ, ನಾಗಪ್ಪ ಘಂಟಿ, ಶಂಕ್ರಪ್ಪ ಕುದುರಿ, ರಾಜು ಕಡಿವಾಲ, ಲಕ್ಷ್ಮಣ ಸಣ್ಣಕ್ಕಿ, ರವಿ ಅಂಕದ, ನವೀನ ಕೊಣ್ಣೂರ, ಬಸವರಾಜ ಚಿತ್ತರಗಿ, ಗುಂಡಣ್ಣ ಬೋರಣ್ಣವರ, ವೆಂಕಟೇಶ ಸುಟಗಲ, ಗುಂಡಪ್ಪ ಕೊಣ್ಣೂರ, ಸಾತೇಶ್ವರ ತೋರಗಲ ಸೇರಿ ನೂರಾರು ವಿದ್ಯುತ್ ಮಗ್ಗದ ನೇಕಾರರಿದ್ದರು.