ಸಂಪಾದಕೀಯ: ಉತ್ತಮ ಚಿಂತನೆ

ಗ್ರಾಮ ಪಂಚಾಯಿತಿ ಸೇವೆಗಳಿಗೆ ಸಂಬಂಧಿಸಿದಂತೆ ತಮ್ಮ ಅಹವಾಲುಗಳನ್ನು ದಾಖಲಿಸಲು ಗ್ರಾಮೀಣ ಭಾಗದ ಜನರಿಗೆ ಅನುವಾಗುವಂತೆ ಡ್ಯಾಶ್ ಬೋರ್ಡ್ ಆಧಾರಿತ ‘ದೂರು-ದಾಖಲು ಇತ್ಯರ್ಥ್ಯಕ್ಕೆ ಆನ್​ಲೈನ್ ವ್ಯವಸ್ಥೆ’ ರೂಪಿಸುವಂತೆ ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್ ರಾಜ್ ಸಚಿವ ಈಶ್ವರ ಖಂಡ್ರೆ ಇಲಾಖೆಯ ಕಾರ್ಯದರ್ಶಿಗೆ ಸೂಚನೆ ನೀಡಿದ್ದಾರೆ. ಈ ಸಂಬಂಧ ಲಿಖಿತ ಸೂಚನೆ ನೀಡಿರುವ ಖಂಡ್ರೆ, ಇ-ಸ್ವತ್ತು, ತೆರಿಗೆ ನಿರ್ಧಾರ, ಸಾಮಾಜಿಕ ಅರಣ್ಯೀಕರಣ, ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೆರೆ ನಿರ್ವಹಣೆ, ಕುಡಿಯುವ ನೀರು, ನೈರ್ಮಲ್ಯ, ಗ್ರಾಮೀಣ ರಸ್ತೆ, ವಿಬಿ-ಜಿರಾಮ್ ಯೋಜನೆ ಸೇರಿದಂತೆ ಯಾವುದೇ ಅಹವಾಲನ್ನು ಗ್ರಾಮೀಣರು ದಾಖಲಿಸಲು ಮತ್ತು ಅದಕ್ಕೆ ತಕ್ಷಣ ಸ್ಪಂದಿಸಲು ಈ ವ್ಯವಸ್ಥೆ ರೂಪಿಸುವಂತೆ ನಿರ್ದೇಶನ ನೀಡಿದ್ದಾರೆ. ಗ್ರಾಮೀಣ ಭಾಗದ ಜನರ ಸಮಸ್ಯೆಗೆ ತ್ವರಿತವಾಗಿ ಸ್ಪಂದಿಸುವ ನಿಟ್ಟಿನಲ್ಲಿ, ನಿಜಕ್ಕೂ ಇದೊಂದು ಉತ್ತಮ ಹೆಜ್ಜೆ.

ರಾಜ್ಯದ ಅರ್ಧಕ್ಕಿಂತ ಅಧಿಕ ಜನಸಂಖ್ಯೆ ಗ್ರಾಮೀಣ ಭಾಗದಲ್ಲಿ ನೆಲೆಸಿದ್ದು, ಇಂದಿಗೂ ಹಳ್ಳಿ ಜನರಿಗೆ ಸರ್ಕಾರಿ ಸೇವೆ, ಸೌಲಭ್ಯಗಳು ಸುಲಭವಾಗಿ ಲಭ್ಯವಾಗುತ್ತಿಲ್ಲ. ಸರ್ಕಾರಿ ಕಚೇರಿಗಳಿಗೆ ಪದೇಪದೆ ಅಲೆಯುವುದು, ಸಣ್ಣಪುಟ್ಟ ಕೆಲಸಕ್ಕೂ ಲಂಚ ನೀಡುವ ಪ್ರವೃತ್ತಿ ಇಂದಿಗೂ ಜೀವಂತವಾಗಿದೆ. ಲಂಚ ಮತ್ತು ಮಧ್ಯವರ್ತಿಗಳ ಹಾವಳಿ ಸಾಮಾನ್ಯ ಜನರಿಗೆ ಹೊರೆಯಾಗಿದೆ. ಆದರೆ, ದೂರು ದಾಖಲು ಮತ್ತು ಇತ್ಯರ್ಥಕ್ಕಾಗಿ ಆಪ್/ವೆಬ್​ಪೋರ್ಟಲ್​ನಂಥ ಆನ್​ಲೈನ್ ವ್ಯವಸ್ಥೆ ಸಿದ್ಧವಾದರೆ, ಆಡಳಿತದಲ್ಲಿ ಪಾರದರ್ಶಕತೆ ತರಲು ಪೂರಕವಾಗುತ್ತದೆ. ಜನರಿಗೂ ಅನುಕೂಲವಾಗುತ್ತದೆ.

ಗ್ರಾಮೀಣ ಭಾಗದ ಸಬಲೀಕರಣವೇ ಪ್ರಗತಿಯ ಅಡಿಪಾಯವಾಗಿರುವಾಗ, ಸ್ಥಳೀಯ ಆಡಳಿತದಲ್ಲಿ ಪಾರದರ್ಶಕತೆ ಮತ್ತು ಜವಾಬ್ದಾರಿಯನ್ನು ತರುವುದು ಇಂದಿನ ತುರ್ತು ಅಗತ್ಯವಾಗಿದೆ. ಲಿಖಿತ ರೂಪದಲ್ಲಿ ನೀಡುವ ಅರ್ಜಿಗಳು ಕಡತಗಳಲ್ಲೇ ಉಳಿದು, ಸೂಕ್ತ ಕಾಲಮಿತಿಯಲ್ಲಿ ಪರಿಹಾರ ಕಾಣದಿರುವುದು ಆಡಳಿತದ ಮೇಲಿನ ನಂಬಿಕೆಯನ್ನು ಕುಗ್ಗಿಸುತ್ತಿದೆ.

ಡ್ಯಾಶ್ ಬೋರ್ಡ್ ಆಧಾರಿತ ವ್ಯವಸ್ಥೆಯು ಮೇಲಧಿಕಾರಿಗಳಿಗೆ ಪ್ರತಿ ಹಂತದ ದೂರುಗಳ ಪ್ರಗತಿಯನ್ನು ನೇರವಾಗಿ ಮೇಲ್ವಿಚಾರಣೆ ಮಾಡಲು ಅನುವು ಮಾಡಿಕೊಡುತ್ತದೆ. ಇದರಿಂದ ಅಧಿಕಾರಿಗಳಲ್ಲಿ ಹೊಣೆಗಾರಿಕೆ ಹೆಚ್ಚುತ್ತದೆ. ದೂರಿನ ಸ್ಥಿತಿ ನೇರವಾಗಿ ಅರ್ಜಿದಾರರಿಗೆ ತಿಳಿಯುವುದರಿಂದ ಅನಗತ್ಯ ವಿಳಂಬ ಮತ್ತು ಭ್ರಷ್ಟಾಚಾರಕ್ಕೆ ಕಡಿವಾಣ ಬೀಳುತ್ತದೆ. ಆದರೆ, ಕೇವಲ

ಸಾಫ್ಟ್​ವೇರ್ ಅಥವಾ ಆನ್​ಲೈನ್ ಪೋರ್ಟಲ್ ಸಿದ್ಧಪಡಿಸಿದರೆ ಸಾಲದು; ಅದು ಗ್ರಾಮೀಣ ಜನಸಾಮಾನ್ಯರಿಗೆ ಸುಲಭವಾಗಿ ತಲುಪುವಂತಾಗಬೇಕು. ಡಿಜಿಟಲ್ ಸಾಕ್ಷರತೆ ಇಲ್ಲದ ಗ್ರಾಮಸ್ಥರಿಗೆ ಗ್ರಾಮ ಒನ್ ಮತ್ತು ಬಾಪೂಜಿ ಸೇವಾ ಕೇಂದ್ರಗಳ ಮೂಲಕವೇ ದೂರು ದಾಖಲಿಸಲು ಉಚಿತ ಮತ್ತು ಸುಲಭ ವ್ಯವಸ್ಥೆ ಕಲ್ಪಿಸಬೇಕು. ಕನ್ನಡದಲ್ಲೇ ಧ್ವನಿ ಸಂದೇಶ ಅಥವಾ ವಾಟ್ಸ್​ಆಪ್ ಆಧಾರಿತ ದೂರು ಸಲ್ಲಿಕೆಗೆ ಅವಕಾಶ ನೀಡಿದರೆ ಹೆಚ್ಚು ಉಪಯುಕ್ತವಾಗುತ್ತದೆ. ನಿಗದಿತ ಕಾಲಮಿತಿಯಲ್ಲಿ ಅಹವಾಲು ಇತ್ಯರ್ಥಪಡಿಸದ ಅಧಿಕಾರಿಗಳ ವಿರುದ್ಧ ಸೂಕ್ತ ಕ್ರಮ ಕೈಗೊಳ್ಳುವ ನಿಯಮ ರೂಪಿಸಬೇಕು.

ತಂತ್ರಜ್ಞಾನವು ನಗರಗಳಿಗೆ ಸೀಮಿತವಾಗದೆ ಹಳ್ಳಿಯ ಕಟ್ಟಕಡೆಯ ವ್ಯಕ್ತಿಗೂ ನ್ಯಾಯ ಮತ್ತು ಸೌಲಭ್ಯ ಒದಗಿಸುವ ಸಾಧನವಾದಾಗ ಮಾತ್ರ ನಿಜವಾದ ಗ್ರಾಮ ಸ್ವರಾಜ್ಯದ ಕನಸು ನನಸಾಗಲು ಸಾಧ್ಯ. ಈ ನಿಟ್ಟಿನಲ್ಲಿ ಹೊಸ ಯೋಜನೆ ಯಶಸ್ವಿಯಾಗಿ, ಪರಿಣಾಮಕಾರಿಯಾಗಿ ಅನುಷ್ಠಾನಕ್ಕೆ ಬರಲಿ ಎಂಬುದೇ ಆಶಯ.