ಫುಟ್ಪಾತ್ ಮೇಲೆ ಬೋರ್ಡ್ಗಳನ್ನು ಹಾಕುವುದು, ಅಲ್ಲಲ್ಲಿ ವಾಹನ ನಿಲುಗಡೆ, ಅತಿಕ್ರಮಣ, ಬೀದಿಬದಿ ಅಂಗಡಿಗಳು- ಇತ್ಯಾದಿ ಕಾರಣಕ್ಕೆ ನಡೆದುಹೋಗುವವರು ವಿಪರೀತ ತೊಂದರೆ ಎದುರಿಸಬೇಕಾಗಿದೆ. ಸಚಿವ ಕೃಷ್ಣ ಬೈರೇಗೌಡ ಅವರೇ ಹೇಳಿರುವ ಪ್ರಕಾರ, ವರ್ಷಕ್ಕೆ ಸುಮಾರು 300 ಮಂದಿ ಪಾದಚಾರಿಗಳು ಪ್ರಾಣಕಳೆದುಕೊಳ್ಳುತ್ತಿದ್ದಾರೆ. ಇದು ನಿಜಕ್ಕೂ ಗಂಭೀರ ವಿಚಾರ. ಅದರಲ್ಲೂ ಮಕ್ಕಳು, ಮಹಿಳೆಯರು, ವೃದ್ಧರು ಭಯದಲ್ಲೇ ನಡೆಯುವ ಪರಿಸ್ಥಿತಿ ಇದೆ. ಹೀಗಾಗಿ ಪಾದಚಾರಿ ಮಾರ್ಗಗಳಲ್ಲಿನ ಒತ್ತುವರಿಯನ್ನು ತೆರವು ಮಾಡಿ, ಪಾದಚಾರಿಗಳ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡಬೇಕಾದುದು ಪಾಲಿಕೆಗಳ ಕರ್ತವ್ಯ. ಇದಲ್ಲದೆ, ಅಸ್ತವ್ಯಸ್ತ ಫುಟ್ಪಾತ್ಗಳು ಬೆಂಗಳೂರಿನಂಥ ಅಂತಾರಾಷ್ಟ್ರೀಯ ಖ್ಯಾತಿಯ ನಗರದ ಇಮೇಜಿಗೆ ಧಕ್ಕೆ ತರುತ್ತವೆಯೆಂಬುದನ್ನೂ ಪರಿಗಣಿಸಬೇಕಾಗುತ್ತದೆ. ಆದರೆ, ಈ ಕಾರ್ಯದ ವೇಳೆ ಸಂಬಂಧಪಟ್ಟವರು ಮಾನವೀಯ ನೆಲೆಯಲ್ಲಿಯೂ ಆಲೋಚಿಸಬೇಕಾಗುತ್ತದೆ.
