ನ್ಯಾಯಾಂಗ ಪರಿಶೀಲನೆ ವ್ಯಾಪ್ತಿಗೆ ಇಸಿಐಆರ್​| High court

ಬೆಂಗಳೂರು: 

ಎನ್​ಫೊರ್ಸ್​ಮೆಂಟ್ ಕೇಸ್​ ಇನ್ಫಮೇರ್ಷನ್​ ರಿಪೋರ್ಟ್​ (ಇಸಿಐಆರ್​) ಎಂಬುದು ಜಾರಿ ನಿರ್ದೇಶನಾಲಯದ (ಇ.ಡಿ.) ಆಂತರಿಕ ಆಡಳಿತಾತ್ಮಕ ದಾಖಲೆಯಾಗಿದ್ದು, ಸಂವಿಧಾನದ 226ನೇ ವಿಧಿ ಅಡಿಯಲ್ಲಿ ನ್ಯಾಯಾಂಗ ಪರಿಶೀಲನೆಯ ವ್ಯಾಪ್ತಿಯಿಂದ ಹೊರಗಿದೆ ಎಂಬ ಜಾರಿ ನಿರ್ದೇಶನಾಲಯದ ವಾದವನ್ನು ಹೈಕೋರ್ಟ್​ ನಿರಾಕರಿಸಿದೆ.

ಮೂಲ ಅಪರಾಧವು (ಪ್ರೆಡಿಕೆಟ್​ ಅಫೆನ್ಸ್​) ರದ್ದಾಗಿದ್ದರೂ ಕೂಡ, ಇಸಿಐಆರ್​ ದಾಖಲಿಸಿ ಕಾನೂನು ಪ್ರಕ್ರಿಯೆ ಮುಂದುವರಿಸಿದ್ದ ಇ.ಡಿ. ಕ್ರಮವನ್ನು ಪ್ರಶ್ನಿಸಿ ಗೇಮ್ಸ್​ಕ್ರಾಫ್ಟ್ ಸಂಸ್ಥೆ ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರಿದ್ದ ಏಕಸದಸ್ಯ ನ್ಯಾಯಪೀಠ ಈ ಆದೇಶ ನೀಡಿದೆ.

ಆಡಳಿತಾತ್ಮಕ ದಾಖಲೆ ಎಂದು ಕರೆದುಕೊಂಡು ನಾಗರಿಕರ ತಪಾಸಣೆ, ಆಸ್ತಿ ಜಪ್ತಿ ಮತ್ತು ಬಂಧನದಂತಹ ಕಠಿಣ ಕ್ರಮಗಳನ್ನು ಕೈಗೊಳ್ಳಲು ಅವಕಾಶ ನೀಡಿ, ನಂತರ ನ್ಯಾಯಾಂಗ ಪರಿಶೀಲನೆಯಿಂದ ಹೊರಗುಳಿಯಲು ಸಾಧ್ಯವಿಲ್ಲ. ಮೂಲ ಅಪರಾಧವೇ ಇಲ್ಲದಿರುವಾಗ ಅದರ ಆಧಾರದ ಮೇಲೆ ನಿಂತಿರುವ ಅಕ್ರಮ ಹಣ ವರ್ಗಾವಣೆ ಪ್ರಕರಣ ಮುಂದುವರಿಯಲು ಸಾಧ್ಯವಿಲ್ಲ. ಅದನ್ನು ಪ್ರಶ್ನಿಸಿ ಅರ್ಜಿ ಸಲ್ಲಿಸದಾಗ ವಿಚಾರಣೆ ನಡೆಸುವ ಸಂಪೂರ್ಣ ಅಧಿಕಾರ ಹೈಕೋರ್ಟ್​ಗಿದೆ ಎಂದು ನ್ಯಾಯಪೀಠ ತಿಳಿಸಿದೆ. ಕಂಪನಿ ಸಲ್ಲಿಸಿದ್ದ ಅರ್ಜಿಯ "ಮಾನ್ಯತೆ' ಬಗ್ಗೆ ಮಾತ್ರ ಸದ್ಯ ತೀರ್ಪು ನೀಡಿದ್ದು, ವಿಚಾರಣೆ ಮುಂದುವರಿಯಲಿದೆ. 

3 ಕೋಟಿ ರೂ. ನಷ್ಟದ ಆರೋಪದಲ್ಲಿ ಬಳಕೆದಾರೊಬ್ಬರು ನೀಡಿದ್ದ ದೂರಿನ ಆಧಾರದಲ್ಲಿ ಗೇಮ್ಸ್​ಕ್ರಾಫ್ಟ್ ಕಂಪನಿ ವಿರುದ್ಧ 2024ರ ಡಿಸೆಂಬರ್​ನಲ್ಲಿ ದಾಖಲಾಗಿದ್ದ ಪ್ರಕರಣದ ತನಿಖೆ ನಡೆಸಿದ ಪೊಲೀಸರು ಬಿ&ರಿಪೋರ್ಟ್​ ಸಲ್ಲಿಸಿದ್ದರು. ನ್ಯಾಯಾಲಯ ಅದನ್ನು ಪರಿಗಣಿಸಿತ್ತು. ಆದರೆ, ಈ ಪ್ರಕ್ರಿಯೆ ಮುಗಿದ ಆರು ತಿಂಗಳ ನಂತರ ಅದೇ ಪ್ರಕರಣದ ಆಧಾರದಲ್ಲಿ ಇಸಿಐಆರ್​ ದಾಖಲಿಸಿದ್ದ ಇ.ಡಿ. ದಾಳಿ ನಡೆಸಿ ಜಪ್ತಿ ಪ್ರಕ್ರಿಯೆ ಕೈಗೊಂಡಿತ್ತು. ಇದನ್ನು ಪ್ರಶ್ನಿಸಿ ಕಂಪನಿಯು ಹೈಕೋರ್ಟ್​ಗೆ ಅರ್ಜಿ ಸಲ್ಲಿಸಿದೆ.