ಡಿವೈಎಸ್ಪಿ ಮಲ್ಲಪ್ಪ ನಂದಗಾವಿ ಸೆೇವೆ ಶ್ಲಾಘನೀಯ

ಬಸವನಬಾಗೇವಾಡಿ: ಡಿವೈಎಸ್ಪಿ ಮಲ್ಲಪ್ಪ ನಂದಗಾವಿಯವರು ಎಲ್ಲಾ ಇಲಾಖೆಗಳ ಅಧಿಕಾರಿಗಳು, ಸಿಬ್ಬಂದಿ ಹಾಗೂ ಸಾರ್ವಜನಿಕರೊಂದಿಗೆ ಅತ್ಯಂತ ಆತ್ಮೀಯತೆ ಸಾಧಿಸಿದ್ದಾರೆ. ಅವರು ಉನ್ನತ ಮಟ್ಟದ ಹುದ್ದೆಯಲ್ಲಿ ಇದ್ದರು ಕೂಡಾ ಅತ್ಯಂತ ಸರಳ ಸ್ವಭಾವ ವ್ಯಕ್ತಿತ್ವ ಹೊಂದಿದ್ದಾರೆ ಎಂದು ತಹಸೀಲ್ದಾರ್ ಯಮನಪ್ಪ ಸೋಮನಕಟ್ಟಿ ಹೇಳಿದರು.

ಪಟ್ಟಣದ ವಿಜಯಪುರ ರಸ್ತೆಯ ಪುರಸಭೆ ಸಭಾಂಗಣದಲ್ಲಿ ಹಮ್ಮಿಕೊಂಡಿದ್ದ ಬಸವನಬಾಗೇವಾಡಿ ಪೊಲೀಸ್ ಉಪವಿಭಾಗದಿಂದ ಭಾಲ್ಕಿ ಉಪ ವಿಭಾಗಕ್ಕೆ ವರ್ಗಾವಣೆಗೊಂಡ ಡಿವೈಎಸ್ಪಿ ಮಲ್ಲಪ್ಪ ನಂದಗಾವಿ ಅವರ ಬೀಳ್ಕೊಡುಗೆ ಸಮಾರಂಭದ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು.

ಅತ್ಯಂತ ಕಡು ಬಡವರು ಮತ್ತು ನಿರ್ಗತಿಕರು ಡಿವೈಎಸ್ಪಿ ಮಲ್ಲಪ್ಪ ನಂದಗಾವಿ ಅವರ ಬಳಿ ಬಂದರೆ ಅತ್ಯಂತ ಪ್ರೀತಿ ವಿಶ್ವಾಸದಿಂದ ಮಾತನಾಡಿಸಿ, ಅವರ ಕೆಲಸ ಕಾರ್ಯವನ್ನು ಮಾಡಿಕೊಡುತ್ತಿದ್ದರು. ಹೀಗಾಗಿ ಅವರು ಎಲ್ಲರ ಮನಸ್ಸನ್ನು ಗೆದ್ದಿದ್ದಾರೆ. ಅವರ ಯಶಸ್ವಿ ಸೇವಾ ಕಾರ್ಯದ ಹಿಂದೆ ಅವರ ಪತ್ನಿ ಹಾಗೂ ಕುಟುಂಬದ ಸಹಕಾರವೂ ಶ್ಲಾಘನೀಯ ಎಂದರು.

ಸಾರ್ವಜನಿಕರಿಂದ ಸನ್ಮಾನ ಸ್ವೀಕರಿಸಿದ ಡಿವೈಎಸ್ಪಿ ಮಲ್ಲಪ್ಪ ನಂದಗಾವಿ ಮಾತನಾಡಿ, ಯಾವುದೇ ಸರ್ಕಾರಿ ಅಧಿಕಾರಿಗೆ ನಾನು ಎನ್ನುವ ಅಹಂ ಇರಬಾರದು. ಎಲ್ಲರೊಂದಿಗೆ ಪ್ರೀತಿ, ವಿಶ್ವಾಸದಿಂದ ಬೆರೆತಾಗ ಮಾತ್ರ ಸಾಧನೆ ಮಾಡಲು ಸಾಧ್ಯ. ಈಡೀ ದೇಶದಲ್ಲಿ ತೀವ್ರ ಚರ್ಚೆಗೆ ಗ್ರಾಸವಾದ ಮನಗೂಳಿ ಬ್ಯಾಂಕ್ ಕಳ್ಳತನ, ಮುದ್ದೇಬಿಹಾಳದಲ್ಲಿ ನ್ಯಾಯಾಧೀಶರ ಮನೆ ಕಳ್ಳತನದಂತಹ ದೊಡ್ಡ ಪ್ರಕರಣಗಳನ್ನು ಯಶಸ್ವಿಯಾಗಿ ಭೇದಿಸಲು ಇಲ್ಲಿನ ಜನರ ಸಹಕಾರ ಬೆಂಬಲವೇ ಕಾರಣ ಎಂದರು.

ಸಹಕಾರಿ ಮಹಾ ಮಂಡಳಿ ನಿರ್ದೇಶಕ ಈರಣ್ಣ ಪಟ್ಟಣಶೆಟ್ಟಿ, ನಿಡಗುಂದಿ ಸಿಪಿಐ ಶರಣಗೌಡ ಗೌಡರ, ಬಸವನಬಾಗೇವಾಡಿ ಪಿ.ಐ. ಗುರುಶಾಂತ ದಾಶ್ಯಾಳ, ಹಿರಿಯರಾದ ಮಹಾಂತೇಶ ಆದಿಗೊಂಡ, ನೀಲು ನಾಯಕ ಮಾತನಾಡಿದರು.

ಮುದ್ದೇಬಿಹಾಳ ಸಿಪಿಐ ಮಹ್ಮದ್ ಪೈಸುದ್ದಿನ್, ಉಪವಿಭಾಗದ ಪಿಎಸ್‌ಐ ಅಧಿಕಾರಿಗಳಾದ ಜ್ಯೋತಿ ಕೋತ, ಎ.ಕೆ. ಸೊನ್ನದ, ವಿನೋದ್ ಪೂಜಾರಿ, ಎಫ್. ಎ.ಇಂಡೀಕರ ಮತ್ತಿತರರಿದ್ದರು.