ಮತ್ತಿನ ಚಾಲನೆ ಮೃತ್ಯುವಿಗೆ ಆಹ್ವಾನ; ವಿಜಯವಾಣಿ, ಆಡ್-6, ಕರ್ನಾಟಕ ಟಿವಿ ಸಹಯೋಗ

ಮಂಗಳವಾರ ಬೆಳಗ್ಗೆ ನಗರದ ಎಂ.ಜಿ. ರಸ್ತೆಯಲ್ಲಿರುವ ಮಹಾತ್ಮಗಾಂಧಿ ಪ್ರತಿಮೆಯಿಂದ ಆರಂಭವಾದ ಅಭಿಯಾನವು ಅನಿಲ್ ಕುಂಬ್ಳೆ ವೃತ್ತ, ರಂಗೋಲಿ ಮೆಟ್ರೋ, ಬ್ರಿಗೇಡ್ ವೃತ್ತದ ಮೂಲಕ ಮತ್ತೆ ಅನಿಲ್ ಕುಂಬ್ಳೆ ವೃತ್ತದಲ್ಲಿ ಕೊನೆಗೊಂಡಿತು. ಪ್ರೆಸಿಡೆನ್ಸಿ ವಿಶ್ವವಿದ್ಯಾಲಯದ ವಿದ್ಯಾರ್ಥಿಗಳ 25 ತಂಡಗಳು ಭಿತ್ತಿಪತ್ರಗಳನ್ನು ಹಿಡಿದು ವಾಹನ ಸವಾರರಿಗೆ ಜಾಗೃತಿ ಮೂಡಿಸಿದವು. ಸಿಗ್ನಲ್​ನಲ್ಲಿ ನಿಂತಿದ್ದ ವಾಹನಗಳ ಬಳಿ ಹೋದ ವಿದ್ಯಾರ್ಥಿಗಳ ತಂಡವು ಕುಡಿದು ವಾಹನ ಚಲಾಯಿಸುವುದರಿಂದ ಆಗುವ ಪರಿಣಾಮಗಳ ಬಗ್ಗೆ ಅರಿವು ಮೂಡಿಸುವ ಪ್ರಯತ್ನ ಮಾಡಿತು.

ಕುಡಿತದಿಂದ ಕುಟುಂಬ ಮತ್ತು ವೈಯಕ್ತಿಕ ಜೀವನದ ಮೇಲೆ ಸಂಭವಿಸಬಹುದಾದ ಪರಿಣಾಮಗಳನ್ನು ಮನಮುಟ್ಟುವಂತೆ ವಿದ್ಯಾರ್ಥಿಗಳು ಅಭಿನಯಿಸಿದರು. ಕುಡಿದು ವಾಹನ ಚಲಾಯಿಸಿ ಅಪಘಾತದಲ್ಲಿ ಮೃತಪಟ್ಟರೆ ಅವರನ್ನೇ ನಂಬಿರುವ ಕುಟುಂಬ ಸದಸ್ಯರು ಬೀದಿಪಾಲಾಗಬೇಕಾಗುತ್ತದೆ. ಹೆಂಡತಿ ಮಕ್ಕಳಿಗೆ ದಿಕ್ಕಿಲ್ಲದಂತಾಗುತ್ತದೆ ಎಂಬ ದೃಶ್ಯಾವಳಿಗಳನ್ನು ತಮ್ಮ ಕಲಾಚಾತುರ್ಯ ಮೂಲಕ ಪ್ರದರ್ಶಿಸಿ ಪ್ರೇಕ್ಷಕರನ್ನು ಆಕರ್ಷಿಸಿದರು. ಅಪ್ಪನಿಗಾಗಿ ಮನೆಯಲ್ಲಿ ಕಾಯುತ್ತಿದ್ದ ಮಗು, ಗಂಡನ ಬರುವಿಕೆಯನ್ನೇ ಎದುರು ನೋಡುತ್ತಿದ್ದ ಹೆಂಡತಿ, ಹೊಸ ಜೀವನ ಕಟ್ಟಿಕೊಳ್ಳುವ ರಸಕ್ಷಣದಲ್ಲಿರುವ ಯುವತಿಯರ ಗೋಳು ಹೇಗಿರುತ್ತದೆ ಎಂಬ ದೃಶ್ಯಗಳು ನೈಜ ಅಭಿನಯದಿಂದ ಕೂಡಿದ್ದವು.

ಡ್ರಂಕ್ ಆಂಡ್ ಡ್ರೖೆವ್ ಪ್ರಕರಣಗಳಲ್ಲಿ ಬಹುತೇಕರು ರಾತ್ರಿ ವೇಳೆ ಕುಡಿದು ವಾಹನ ಚಲಾಯಿಸುತ್ತಿರುವುದು ಪತ್ತೆಯಾಗಿದೆ. ಡಿ.22ರ ಮೊದಲ ದಿನವೇ ನಗರಾದ್ಯಂತ ಮದ್ಯಪಾನ ಮಾಡಿ ವಾಹನ ಚಾಲನೆ ಮಾಡುತ್ತಿದ್ದವರ ವಿರುದ್ಧ 1,295 ಎಫ್​ಐಆರ್ ದಾಖಲಿಸಿಕೊಂಡು, 89,236 ವಾಹನ ತಪಾಸಣೆ ನಡೆಸಿದ್ದಾರೆ. ವರ್ಷಾಚರಣೆ ಹಿಗ್ಗಿನಲ್ಲಿ ಜನ ಮೈಮರೆಯುವುದರಿಂದ ಸಾಕಷ್ಟು ಅಪಘಾತಗಳಾಗಿ ಸಾವು-ನೋವು ಸಂಭವಿಸಿವೆ. ಈ ಹಿಂದಿನ ವರ್ಷಗಳಲ್ಲಿ ಹಲವು ಪ್ರಕರಣಗಳು ನಡೆದು ಸವಾರರು ಮೃತಪಟ್ಟಿದ್ದಾರೆ, ಇಲ್ಲವೇ ಗಾಯಗೊಂಡು ಸಮಸ್ಯೆಗೆ ಒಳಗಾಗಿದ್ದಾರೆ. ಹೀಗಾಗಿ 2026ರ ವರ್ಷಾಚರಣೆ ಸೂತಕವಾಗದೆ ಸುರಕ್ಷಿತವಾಗಿರಲಿ ಎಂಬುದು ಅಭಿಯಾನದ ಉದ್ದೇಶವಾಗಿದೆ.

ಪೊಲೀಸ್ ಇಲಾಖೆ ಕೊಟ್ಟಿರುವ ಮಾಹಿತಿ ಅನ್ವಯ 2021ರಿಂದ 2025ರ (ಅಕ್ಟೋಬರ್​ವರೆಗೆ) 2.13 ಲಕ್ಷ ರಸ್ತೆ ಅಪಘಾತ ಪ್ರಕರಣಗಳು ದಾಖಲಾಗಿವೆ. ಚಾಲಕರ ನಿರ್ಲಕ್ಷ್ಯ, ಮದ್ಯಪಾನ ಮಾಡಿ ವಾಹನ ಚಾಲನೆ, ಅತಿವೇಗ ಹಾಗೂ ಅಜಾಗರೂಕತೆ, ಪರವಾನಗಿ ಇಲ್ಲದೇ ಇರುವುದು ಸೇರಿ ವಿವಿಧ ಮಾದರಿಯ ರಸ್ತೆ ಅಪಘಾತಗಳಲ್ಲಿ ಪ್ರತಿವರ್ಷ ಸರಾಸರಿ 11 ಸಾವಿರಕ್ಕೂ ಹೆಚ್ಚು ಜನ ಮೃತಪಡುತ್ತಿದ್ದಾರೆ. 5 ವರ್ಷಗಳಲ್ಲಿ 1,69,315 ಜನ ಗಾಯಗೊಂಡಿದ್ದಾರೆ. 2024ರಲ್ಲಿ 39,228 ಪ್ರಕರಣ ದಾಖಲಾಗಿದ್ದು, 10,319 ಜನ ಪ್ರಾಣ ಕಳೆದುಕೊಂಡಿದ್ದರು.

2025ರ ಜನವರಿಯಿಂದ ಅಕ್ಟೋಬರ್​ವರೆಗೆ ನಡೆದ 21,937 ಅಪಘಾತಗಳಲ್ಲಿ 5,975 ಮಂದಿ ಜೀವ ಕಳೆದುಕೊಂಡಿದ್ದು, 27,456 ಗಾಯಗೊಂಡಿದ್ದಾರೆ. ಆ ಪೈಕಿ ಬೆಂಗಳೂರು ನಗರದಲ್ಲಿ ಅತಿಹೆಚ್ಚು 4,098 ಅಪಘಾತಗಳು ನಡೆದ ಪರಿಣಾಮ 700 ಸಾವು ಸಂಭವಿಸಿವೆ, 3,612 ಜನ ಗಾಯಗೊಂಡಿದ್ದಾರೆ. ರಾಜ್ಯ ಮತ್ತು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಅತಿಹೆಚ್ಚು ಅಪಘಾತಗಳು ಸಂಭವಿಸಿರುವ ವರದಿಯಾಗಿವೆ.

ನಗರದಲ್ಲಿ ಹೊಸ ಸಂಭ್ರಮಾಚರಣೆಯ ಕರ್ತವ್ಯಕ್ಕೆ ಒಟ್ಟು 20 ಸಾವಿರ ಪೊಲೀಸರನ್ನು ನಿಯೋಜಿಸಲಾಗುತ್ತಿದೆ. ಕಾನೂನು ಸುವ್ಯವಸ್ಥೆಗೆ 14 ಸಾವಿರ ಪೊಲೀಸರು, 2500 ಟ್ರಾಫಿಕ್ ಪೊಲೀಸರು, 88 ಕೆಎಸ್​ಆರ್​ಪಿ ಪ್ಲಟೂನ್ಸ್, 21 ಸಿಎಆರ್, 266 ಹೊಯ್ಸಳ ವಾಹನ, 250 ಕೋಬ್ರಾ ವಾಹನಗಳನ್ನು ನಿಯೋಜಿಸಲಾಗುತ್ತಿದೆ. 400 ಟ್ರಾಫಿಕ್ ವಾರ್ಡನ್​ಗಳನ್ನು ನಿಯೋಜಿಸಲಾಗಿದೆ. ಜನದಟ್ಟಣೆ ನಿಯಂತ್ರಿಸಲು ವಾಟರ್ ಜೆಟ್ಸ್ ಸೇರಿ ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತಿದೆ. ಸಿವಿಲ್ ಡಿಫೆನ್ಸ್, ಹೋಮ್ ಗಾರ್ಡ್ಸ್ ಸೇರಿ ಒಟ್ಟು 20 ಸಾವಿರ ಪೊಲೀಸರನ್ನು ನಿಯೋಜಿಸಲಾಗುವುದು ಎಂದು ವಿವರಿಸಿದರು.

ಹೊಸ ವರ್ಷದ ಆಚರಣೆಯಲ್ಲಿ ಹೆಚ್ಚಿನ ಜನ ಭಾಗವಹಿಸುತ್ತಿದ್ದಾರೆ. ಕಳೆದ ವರ್ಷ 8 ಲಕ್ಷಕ್ಕೂ ಹೆಚ್ಚು ಜನ ಸಂಭ್ರಮಾಚರಣೆಗಳಲ್ಲಿ ಭಾಗವಹಿಸಿದ್ದರು. ಎಂ.ಜಿ.ರಸ್ತೆ, ಬ್ರಿಗೇಡ್ ರೋಡ್, ಇಂದಿರಾನಗರ, ಕೋರಮಂಗಲ, ಎಲೆಕ್ಟ್ರಾನಿಕ್ ಸಿಟಿಯ ನೀಲಾದ್ರಿ ರಸ್ತೆಯನ್ನು ಹೆಚ್ಚು ಜನ ಸೇರುವ ಸ್ಥಳಗಳೆಂದು ಗುರುತಿಸಲಾಗಿದೆ. ಈ ಬಾರಿ ಸುಮಾರು 10 ಲಕ್ಷಕ್ಕೂ ಹೆಚ್ಚು ಜನ ಸೇರಲಿದ್ದಾರೆ ಎಂದು ಅಂದಾಜು ಮಾಡಲಾಗಿದೆ ಎಂದರು.

ಮದ್ಯ ಸೇವಿಸಿ ವಾಹನ ಚಾಲನೆ ಮಾಡುವುದು ಬಹಳ ಅಪಾಯಕಾರಿ. ರಸ್ತೆ ಅಪಘಾತಗಳಿಗೆ ಇದು ಕೂಡ ಒಂದು ಮುಖ್ಯ ಕಾರಣ ಎಂಬುದು ಅಧಿಕೃತ ಅಂಕಿ-ಅಂಶಗಳಿಂದ ದೃಢಪಟ್ಟಿದೆ. ಜೀವ ಮತ್ತು ಜೀವನ ಅಮೂಲ್ಯ. ಸಂಭ್ರಮಾಚರಣೆ ಇರಲಿ. ಆದರೆ ಅದು ಅತಿರೇಕ ಆಗದಿರಲಿ. ರಸ್ತೆ ಸಂಚಾರ ನಿಯಮಗಳನ್ನು ಪಾಲನೆ ಮಾಡಿದರೆ ಎಷ್ಟೋ ಅವಘಡಗಳನ್ನು ತಪ್ಪಿಸಬಹುದು. ಈ ಹಿನ್ನೆಲೆಯಲ್ಲಿ ಜಾಗೃತಿ ಅಭಿಯಾನಕ್ಕೆ ವಿಜಯವಾಣಿ ಕೈಜೋಡಿಸಿದೆ.

2025ರ ಡಿಸೆಂಬರ್ ಕೊನೆಯ ಸಂದರ್ಭ ಹೊಸ ವರ್ಷಕ್ಕೆ ಕಾಯುತ್ತಿರುವ ಮಂದಿ ಸಂಭ್ರಮಾಚರಣೆ ನಡುವೆ ಡ್ರಿಂಕ್ ಆಂಡ್ ಡ್ರೖೆವ್ ಮಾಡಿ ಪ್ರಾಣಕ್ಕೆ ಸಂಚಕಾರ ತಂದುಕೊಳ್ಳದಿರಲಿ. ಈ ಹಿಂದೆ ಪ್ರತೀ ವರ್ಷವೂ ಹೊಸ ವರ್ಷದ ಸಂಭ್ರಮಾಚರಣೆಯಲ್ಲಿ ಕುಡಿದು ವಾಹನ ಚಲಾಯಿಸಿ ಸಾಕಷ್ಟು ಅಪಘಾತಗಳಾಗಿ ಸಾವು-ನೋವು ಸಂಭವಿಸಿವೆ. ಈ ಹಿನ್ನೆಲೆಯಲ್ಲಿ 2026ರ ಸಂಭ್ರಮಾಚರಣೆ ಸೂತಕ ಆಗದೆ ಸುರಕ್ಷಿತವಾಗಿರಲಿ.

ಎಲ್ಲರಿಗೂ 2026 ಹೊಸ ವರ್ಷದ ಶುಭಾಶಯಗಳು. ಈ ಘಳಿಗೆ ತಮ್ಮೆಲ್ಲರಿಗೂ ಹೊಸತನ ತರಲಿ. ಹೊಸ ಹೊಸ ಜವಾಬ್ದಾರಿಗಳು, ದೊಡ್ಡ ಹುದ್ದೆಗಳನ್ನು ಏರುವಂತಾಗಲಿ. ಸುರಕ್ಷಿತ ಕ್ರಮಗಳನ್ನು ಕೈಗೊಳ್ಳುವ ಮೂಲಕ ಮತ್ತು ಮೈಮರೆಯದೆ ಹೊಸ ವರ್ಷವನ್ನು ಬರಮಾಡಿಕೊಳ್ಳಿ. ಪಾರ್ಟಿಗಳಿಗಿಂತ ಫ್ಯಾಮಿಲಿ ಮುಖ್ಯ ಎಂಬುದು ಗಮನದಲ್ಲಿರಲಿ.

ಮದ್ಯಪಾನ ಮಾಡಿ ವಾಹನ ಚಾಲನೆ ನಿಯಂತ್ರಣಕ್ಕೆ ಒಂದು ವಾರದಿಂದ ಅಗತ್ಯ ಕ್ರಮ ಕೈಗೊಳ್ಳಲಾಗುತ್ತಿದೆ. ಹೊಸ ವರ್ಷ ಸಂಭ್ರಮಾಚರಣೆಗೆ ಇಲಾಖೆಯಿಂದ ಎಲ್ಲ ರೀತಿಯ ಭದ್ರತೆ, ಸುರಕ್ಷತೆ ನೀಡಲಾಗುತ್ತಿದೆ. ಆದರೆ, ಕುಡಿದ ಮತ್ತಿನಲ್ಲಿ ಅತಿರೇಕದ ವರ್ತನೆ, ಪುಂಡಾಟ, ಕಾನೂನು ಉಲ್ಲಂಘನೆ ಮಾಡುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು. ಈ ಬಗ್ಗೆ ಈಗಾಗಲೇ ಎಚ್ಚರಿಕೆ ನೀಡಲಾಗಿದೆ. ಕಳೆದ ವರ್ಷಕ್ಕಿಂತ ಈ ಬಾರಿ ಹೆಚ್ಚು ಜನರು ನಗರದ ವಿವಿಧ ಕಡೆ ಸೇರುವ ನಿರೀಕ್ಷೆ ಇದೆ.

ಹೊಸವರ್ಷ ಸಂಭ್ರಮಾಚರಣೆ ಸಂದರ್ಭದಲ್ಲಿ ಕುಡಿದು ವಾಹನ ಚಾಲನೆ ಮಾಡುವವರ ಪತ್ತೆಗೆ ನಗರದ 166 ಕಡೆ ಚೆಕ್​ಪೋಸ್ಟ್ ತೆರೆಯಲಾಗಿದೆ. ಈವರೆಗೆ 3,716 ವಾಹನ ಸವಾರರ ವಿರುದ್ಧ ಡಿಡಿ ಪ್ರಕರಣ ದಾಖಲಿಸಿಕೊಳ್ಳಲಾಗಿದೆ. ಈ ಕಾರ್ಯಾಚರಣೆ ಡಿ.31ರ ರಾತ್ರಿವರೆಗೆ ಮುಂದುವರಿಯಲಿದೆ. ನಾಗರಿಕರು ಸ್ವಂತ ವಾಹನ ಬಳಕೆ ಮಾಡದೆ ಅಂದು ಮೆಟ್ರೋ, ಬಿಎಂಟಿಸಿ, ಕ್ಯಾಬ್​ಗಳಲ್ಲಿ ಸಂಚರಿಸಬೇಕು. ಕುಡಿದು ವಾಹನ ಚಾಲನೆ, ವ್ಹೀಲಿಂಗ್ ಮಾಡುವವರ ವಿರುದ್ಧ ಕಠಿಣ ಕಾನೂನು ಕ್ರಮ ಕೈಗೊಳ್ಳಲಾಗುತ್ತದೆ. ಸಂಚಾರ ನಿಯಮ ಉಲ್ಲಂಘನೆ ಮಾಡುವವರ ಬಗ್ಗೆ ಸಾರ್ವಜನಿಕರು 112ಗೆ ಕರೆ ಮಾಡಿ ಮಾಹಿತಿ ನೀಡಬೇಕು.

ಹೊಸ ವರ್ಷದ ಸಂದರ್ಭದಲ್ಲಿ ಮದ್ಯಪಾನ ಮಾಡಿ ವಾಹನ ಚಲಾಯಿಸಬೇಡಿ ಎಂಬುದರ ಬಗ್ಗೆ ಅರಿವು ಮೂಡಿಸಲು ಕೈಗೊಂಡಿರುವ ಈ ಅಭಿಯಾನ ಉತ್ತಮವಾಗಿದೆ. ಮದ್ಯ ಸೇವಿಸಿ ವಾಹನ ಚಲಾಯಿಸಿದರೆ ಸಹಜವಾಗಿ ತಮಗೂ ಅಪತ್ತು, ಬೇರೆಯವರಿಗೂ ಆಪತ್ತು ಉಂಟಾಗುತ್ತದೆ. ಹಾಗಾಗಿ, ಇಂತಹ ಆಪತ್ತಿಗೆ ಜನರು ಬಲಿಯಾಗಬಾರದು. ಅಭಿಯಾನಕ್ಕೆ ನನ್ನ ಬೆಂಬಲ ಇದೆ.

ಹೊಸವರ್ಷ ಮಾತ್ರವಲ್ಲದೆ ಇತರ ಸಂದರ್ಭದಲ್ಲೂ ಕುಡಿದು ವಾಹನ ಚಲಾಯಿಸಬಾರದು. ಹೊಸ ವರ್ಷದಲ್ಲಿ ಕೆಲವರು ಮೈಮರೆತು ಉದ್ಧಟತನದಿಂದ ವರ್ತಿಸುತ್ತಾರೆ. ಮದ್ಯಪಾನದಿಂದ ಆರೋಗ್ಯಕ್ಕೆ ಹಾನಿಯಾಗುತ್ತದೆ. ಅಪಘಾತ ಸಂಭವಿಸಿ ನೀವು ಮಾತ್ರವಲ್ಲದೆ ಬೇರೆಯವರ ಪ್ರಾಣಕ್ಕೂ ಕಂಟಕವಾಗುತ್ತದೆ. ಹಾಗಾಗಿ, ಹೊಸ ವರ್ಷದ ವೇಳೆ ಜನರು ಜೋಪಾನವಾಗಿ ಇರಬೇಕು.

ಕುಡಿದು ವಾಹನ ಚಲಾಯಿಸಿ ಜನರು ಪ್ರಾಣ ಕಳೆದುಕೊಳ್ಳುತ್ತಿದ್ದಾರೆ. ವರ್ಷದ ಕೊನೇ ಅಥವಾ ಹೊಸ ವರ್ಷದಲ್ಲಿ ಬರೀ ಮದ್ಯ ಸೇವಿಸಿ ಆಚರಿಸಬೇಕಾ? ಬೇರೆ ಮಾರ್ಗಗಳಿಂದ ಹೊಸ ವರ್ಷವನ್ನು ಆಚರಿಸಬಹುದು. ಇಂತಹ ಚಟಕ್ಕೆ ನಿಮ್ಮ ಪ್ರಾಣ ಮತ್ತು ಬೇರೆ ಪ್ರಾಣಕ್ಕೂ ತೊಂದರೆ ಕೊಡುವುದು ಸರಿಯಲ್ಲ. ಮನೆಯಲ್ಲಿ ಪಾಲಕರು, ಪತ್ನಿ, ಮಕ್ಕಳು ಇರುತ್ತಾರೆ. ಅವರಿಗೋಸ್ಕರವಾಗಿ ಮದ್ಯ ಸೇವಿಸಬೇಡಿ.

ನಮ್ಮ ಜೀವ ನಮ್ಮ ಕೈಯಲ್ಲೇ ಇದೆ. ಮದ್ಯಪಾನ ಮಾಡಿ ಯಾರೂ ವಾಹನ ಚಲಾಯಿಸಬೇಡಿ. ಸಂಭ್ರಮ ಸಂಭ್ರಮವಾಗಿ ಇರಬೇಕೇ ಹೊರತು ಸಂತಾಪವಾಗಬಾರದು. ಎಲ್ಲರೂ ಕೈಜೋಡಿಸುವ ಮೂಲಕ ಈ ಅಭಿಯಾನ ಯಶಸ್ವಿಗೊಳಿಸೋಣ.