ವರುಣನಿಗೆ ಕತ್ತೆಗಳ ಮದುವೆಯೇ ‘ಕಾಣಿಕೆ’! ಅಕ್ಷತೆ ಹಾಕಿ, ಸಂಭ್ರಮದಿಂದ ಮೆರವಣಿಗೆ ಸಾಗಿದ ಗ್ರಾಮಸ್ಥರು

ಚಿಂಚೋಳಿ: ರಾಜ್ಯದಲ್ಲಿ ಮುಂಗಾರು ಕೈಕೊಟ್ಟ ಹಿನ್ನೆಲೆಯಲ್ಲಿ ಜಲದೇವನ ಮನಸ್ಸು ಗೆಲ್ಲಲು ಮತ್ತು ಉತ್ತಮ ಮಳೆಯಾಗಲಿ ಎಂದು ಪ್ರಾರ್ಥಿಸಿದ ಪಟ್ಟಣದ ಗಂಗುನಾಯಕ ತಾಂಡಾದ ರೈತರು, ಹಳೆಯ ವಾಡಿಕೆ, ಸಂಪ್ರದಾಯದ ಮೊರೆ ಹೋಗಿರುವುದು ಸದ್ಯ ಅನೇಕರ ಹುಬ್ಬೇರಿಸಿದೆ.

ಪ್ರಸಕ್ತ ವರ್ಷ ಸಕಾಲಕ್ಕೆ ಮಳೆಯಾಗದೆ ಬಿತ್ತನೆ ಕಾರ್ಯ ಕುಂಠಿತವಾಗಿದ್ದು, ಬಿತ್ತಿದ ಬೆಳೆಗಳು ಒಣಗುವ ಭೀತಿ ಎದುರಾಗಿರುವುದರಿಂದ ಅನ್ನದಾತರು ಆತಂಕಗೊಂಡಿದ್ದಾರೆ. ಈ ನಿಟ್ಟಿನಲ್ಲಿ, ತಮ್ಮ ಸಾಂಪ್ರದಾಯಿಕ ಆಚರಣೆಯನ್ನು ಅನುಸರಿಸುವ ಮೂಲಕ ಕತ್ತೆಗಳಿಗೆ ಮದುವೆ ಮಾಡಿಸಿ, ಪಟ್ಟಣದ ಪ್ರಮುಖ ರಸ್ತೆಗಳಲ್ಲಿ ಭವ್ಯ ಮೆರವಣಿಗೆ ಸಾಗಿಸಿದ್ದಾರೆ. 

ಗ್ರಾಮದ ಹಿರಿಯರು ಮತ್ತು ಯುವಕರು ಒಂದೆಡೆ ಸೇರಿ, ಎರಡು ಕತ್ತೆಗಳನ್ನು ತಂದು ಅವುಗಳಿಗೆ ಸಾಂಪ್ರದಾಯಿಕವಾಗಿ ಅರಿಶಿಣ-ಕುಂಕುಮ ಹಚ್ಚಿ, ಹೂವಿನ ಹಾರ ಹಾಕಿ ಶೃಂಗರಿಸಿ ಥೇಟ್​ ಮದುಮಗ ಮತ್ತು ಮದುಮಗಳಂತೆ ಕತ್ತೆಗಳನ್ನು ಅಲಂಕರಿಸಿ, ಮಂಗಲವಾದ್ಯಗಳ ಮೂಲಕ ಶಾಸ್ತ್ರೋಕ್ತವಾಗಿ ಮದುವೆಯನ್ನು ನೆರವೇರಿಸಿದರು. ತಾಂಡಾದ ಮಹಿಳೆಯರು ಮಂಗಳಗೀತೆಗಳನ್ನು ಹಾಡುವ ಮೂಲಕ ಮದುವೆಯ ಕಳೆಯನ್ನು ಹೆಚ್ಚಿಸಿದ್ದು ವಿಶೇಷ.

ಮದುವೆಯ ನಂತರ ಗ್ರಾಮಸ್ಥರೆಲ್ಲರೂ ಸೇರಿ ಸಾಂಪ್ರದಾಯಿಕ ಪದ್ಧತಿಯಂತೆ ಮನೆ ಮನೆಗೆ ತೆರಳಿ ಜೋಳ, ಧಾನ್ಯಗಳನ್ನು ಭಿಕ್ಷೆಯ ರೂಪದಲ್ಲಿ ಸಂಗ್ರಹಿಸಿದರು. ಹೀಗೆ ಸಂಗ್ರಹಿಸಿದ ಧಾನ್ಯಗಳಿಂದ ಜಂಟಿ ಅಡುಗೆ (ಸಮುದಾಯದ ಊಟ) ಸಿದ್ಧಪಡಿಸಿ, ವರುಣ ದೇವನಿಗೆ ನೈವೇದ್ಯ ಅರ್ಪಿಸಿ, ಎಲ್ಲರೂ ಒಟ್ಟಾಗಿ ಪ್ರಸಾದ ಸ್ವೀಕರಿಸಿದರು.

ತಾಲ್ಲೂಕಿನಾದ್ಯಂತ ತೀವ್ರ ಮಳೆಯ ಅಭಾವ ಎದುರಾಗಿರುವ ಹಿನ್ನೆಲೆಯಲ್ಲಿ, ಗಂಗುನಾಯಕ ತಾಂಡಾದಲ್ಲಿ ನಡೆದ ಈ ವಿಶಿಷ್ಟ ಕತ್ತೆಗಳ ಮದುವೆ ಆಚರಣೆಯು ಸುತ್ತಮುತ್ತಲಿನ ಹಳ್ಳಿಗಳ ಜನರ ಗಮನ ಸೆಳೆದಿದೆ. ಈ ಸಂದರ್ಭದಲ್ಲಿ ಅಶೋಕ ಚವ್ಹಾಣ, ಸುಧಾಕರ ಪವ್ಹಾರ, ರಾಜು ಚವ್ಹಾಣ, ತಿಪ್ಪಣ್ಣ ಗುಣಾಜಿ, ಗೋವಿಂದ ಪವ್ಹಾರ, ರವಿಪ್ರಕಾಶ ನರನಾಳ, ಕೀಶನ ಕಾರಭಾರಿ, ರಾಜಪ್ಪ, ಸುಭಾಷ, ಭೀಮಶಾ, ಬಾಲು ಪೂಜಾರಿ, ಹಣಮಂತ, ಗೋಪಾಲ, ಅಂಬರೀಷ್, ಸುರೇಶ ಮಂದರಗಿ, ನಾಗಪ್ಪ, ಧನಶ್ರೀ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.

ಪ್ರತಿ ಬಾರಿ ಮಳೆ ಕೈಕೊಟ್ಟಾಗ ನಮ್ಮ ಹಿರಿಯರು ಈ ರೀತಿಯ ಆಚರಣೆಗಳನ್ನು ಮಾಡುತ್ತಿದ್ದರು. ಕತ್ತೆಗಳ ಮದುವೆ ಮಾಡಿದರೆ ವರುಣ ದೇವನಿಗೆ ಕರುಣೆ ಬಂದು ಮಳೆ ಸುರಿಸುತ್ತಾನೆ ಎನ್ನುವ ದೃಢ ನಂಬಿಕೆ ನಮ್ಮದಾಗಿದೆ. ಈ ಬಾರಿಯೂ ಉತ್ತಮ ಮಳೆಯಾಗಿ ಕೆರೆ-ಕಟ್ಟೆಗಳು ತುಂಬಲಿ, ರೈತರ ಮೊಗದಲ್ಲಿ ಮಂದಹಾಸ ಮೂಡಲಿ ಎಂದು ದೇವರಲ್ಲಿ ಪ್ರಾರ್ಥಿಸಿದ್ದೇವೆ.

ಅಶೋಕ ಚವ್ಹಾಣ, ಗಂಗುನಾಯಕ ತಾಂಡಾದ ನಿವಾಸಿ.