ಕೂಡಲೇ ಅಕ್ರಮ ಕಟ್ಟಡ ತೆರವು ಮಾಡಿ

ಸೇಡಂ: ಕಳೆದ ಕೆಲ ದಿನಗಳ ಹಿಂದೆ ನಗರಸಭೆ ಅಧಿಕಾರಿಗಳು ಬೀದಿ ಬದಿ ಅಂಗಡಿಗಳನ್ನು ತೆರವು ಮಾಡಿದ್ದಾರೆ. ಆದರೆ ರಸ್ತೆಯನ್ನು ಅತಿಕ್ರಮಿಸಿ ಬೃಹತ್​ ಕಟ್ಟಡ ನಿರ್ಮಾಣ ಮಾಡಿಕೊಂಡಿರುವವರ ವಿರುದ್ಧ ಕ್ರಮಕೈಗೊಳ್ಳದೆ ಮೌನವಾಗಿದ್ದಾರೆ ಎಂದು ಕರ್ನಾಟಕ ದಲಿತ ಸಂರ್ಷ ಸಮಿತಿ (ಎನ್​.ಮೂರ್ತಿ ಸ್ಥಾಪಿತ) ಜಿಲ್ಲಾಧ್ಯಕ್ಷ ಜಗನ್ನಾಥ ಬಿಜನಳ್ಳಿಕರ್​ ದೂರಿದರು.

ಅಕ್ರಮ ಕಟ್ಟಡಗಳನ್ನು ತೆರವುಗೊಳಿಸುವಂತೆ ಒತ್ತಾಯಿಸಿ ಡಾ.ಬಿ.ಆರ್​.ಅಂಬೇಡ್ಕರ್​ ಪುತ್ಥಳಿ ಮುಂಭಾಗದಲ್ಲಿ ಹಮ್ಮಿಕೊಂಡಿರುವ ಅನಿರ್ಧಿಷ್ಠಾವಧಿ ಧರಣಿಯಲ್ಲಿ ಮಾತನಾಡಿ, ಬಸ್​ ನಿಲ್ದಾಣದಿಂದ ಬಸವೇಶ್ವರ ವೃತದವರೆಗೆ ಪಾದಚಾರಿ ಮಾರ್ಗ ಸಂಪೂರ್ಣ ಅತಿಕ್ರಮಣ ಮಾಡಲಾಗಿದೆ. ಇವರ ವಿರುದ್ಧ ಯಾವುದೇ ಕ್ರಮಕೈಗೊಂಡಿಲ್ಲ. ಅಲ್ಲದೆ ಅತಿಕ್ರಮಣ ತೆರವಿಗೆ ಸಾಕಷ್ಟು ಬಾರಿ ಮನವಿ ಸಲ್ಲಿಸಿದರೂ ಯಾವುದೇ ಪ್ರಯೋಜನವಾಗಿಲ್ಲ ಎಂದು ಕಿಡಿಕಾರಿದರು.

ಶುಕ್ರವಾರ ಧರಣಿ ಆರಂಭವಾಗಿದ್ದು, ಶನಿವಾರ ಸಹಾಯಕ ಆಯುಕ್ತ ಪ್ರಭುರೆಡ್ಡಿ, ಪೌರಾಯುಕ್ತ ಶರಣಯ್ಯಸ್ವಾಮಿ ಅವರು ಧರಣಿ ಸ್ಥಳಕ್ಕೆ ಭೇಟಿ ನೀಡಿ ಸಮಸ್ಯೆ ಆಲಿಸಿ, ಬೇಡಿಕೆ ಈಡೇರಿಸುವುದಾಗಿ ಭರವಸೆ ನೀಡಿದರು.

15ದಿನದ ಗಡುವಿನೊಂದಿಗೆ ಅನಿರ್ದಿಷ್ಠಾವಧಿ ಧರಣಿ ಕೈಬಿಡಲಾಯಿತು. ಪ್ರಮುಖರಾದ ಶಿವಪುತ್ರಪ್ಪ ಮೋಘಾ, ಶ್ರೀಶೈಲ್​ ಎಂ.ಜಿ., ರಾಮು ಕಣೇಕಲ್​, ಅಶೋಕ ರನ್ನೇಟ್ಲಾ, ಲೋಕೇಶ, ಕಾಶಿನಾಥ ದೇವನೂರ, ಗುರುನಾಥ ಕೋಡ್ಲಾ, ಲೋಕೇಶ ಹಂದರಕಿ, ಭೀಮಾಶಂಕರ ಕೊರವಿ, ಮುತ್ತು ಸಾರಥಿ ಇತರರಿದ್ದರು.