ಆಹಾ ಮಡಕೆ ನೀರು, ಬೇಡಿಕೆ ಜೋರು!

ಆಧುನಿಕತೆ ಭರಾಟೆಯಲ್ಲಿ ಹಿಂದಿನ ಕಾಲದ ಅನೇಕ ವಸ್ತುಗಳು ಮೂಲೆಗುಂಪಾಗುತ್ತಿರುವ ಈ ಕಾಲಘಟ್ಟದಲ್ಲಿ ಕುಂಬಾರಿಕೆ ಕಷ್ಟಕರವಾಗಿದೆ. ಆದಾಗಿಯೂ ಮಡಕೆ ತನ್ನ ರೂಪು ಬದಲಾಯಿಸಿಕೊಂಡು ತನ್ನತನ ಉಳಿಸಿಕೊಂಡಿದೆ. ಅಲ್ಲದೆ ಮಡಕೆಯಲ್ಲಿನ ನೀರು ಸಂಗ್ರಹಿಸಿಟ್ಟರೆ ಅದರ ರುಚಿಯೇ ಬೇರೆ. ಹಾಗಾಗಿ ಜನರೂ ಸಹ ಬಿಸಿಲ ಬೇಗೆಯಿಂದ ಪಾರಾಗಲು ಮಡಕೆಗಳತ್ತ ಮುಖ ಮಾಡುತ್ತಿದ್ದಾರೆ.

ನಗರದ ನಾಗರಬಾವಿ ರಿಂಗ್ ರಸ್ತೆ, ಗಾಂಧಿ ಬಜಾರ್, ಬಸವನಗುಡಿ, ಹೌಸಿಂಗ್ ಬೋರ್ಡ್, ವಿಜಯನಗರ, ಮಲ್ಲೇಶ್ವರ, ಯಶವಂತಪುರ ಸೇರಿ ಪ್ರಮುಖ ರಸ್ತೆಗಳಲ್ಲಿ ಮಡಕೆ ಮಾರಾಟ ಗರಿಗೆದರಿದೆ. ವಿಭಿನ್ನ ಆಕಾರದ ಆಕರ್ಷಕ ಬಣ್ಣಗಳ ಚಿತ್ತಾರಗಳೊಂದಿಗೆ ಮಡಕೆಗಳು ಜನಾಕರ್ಷಿಸುತ್ತಿವೆ. 150 ರೂ. ನಿಂದ 500 ರೂ. ವರೆಗೂ ಮಾರಾಟವಾಗುತ್ತಿವೆ.

ಮಡಕೆಯೇ ಜತೆ ಮಣ್ಣಿನಿಂದ ನೀರಿನ ಬಾಟಲ್, ಜಗ್, ಲೋಟಗಳು ಸಹ ಮಾರಾಟಗೊಳ್ಳುತ್ತಿವೆ. ಮಡಕೆಯಲ್ಲಿ ನೀರು ಸದಾ ಕಾಲ ತಣ್ಣಗಿದ್ದು, ಹಿತಾನುಭವ ನೀಡುತ್ತದೆ. ಹಾಗಾಗಿ ಗಾಜಿನ, ತಾಮ್ರದ ಹಾಗೂ ಪ್ಲಾಸ್ಟಿಕ್ ಬಾಟಲಿಗಳ ಬದಲಿಗೆ ಬಹುತೇಕರು ಮಣ್ಣಿನ ಬಾಟಲ್‌ಗಳಿಗೆ ಆದ್ಯತೆ ನೀಡುತ್ತಿದ್ದಾರೆ. ಕಚೇರಿಗಳಲ್ಲಿ ಕೆಲವರ ಟೇಬಲ್ ಮೇಲೆ ಮಣ್ಣಿನ ಜಗ್ ಹಾಗೂ ಬಾಟಲ್ ಅಲಂಕೃತಗೊಂಡಿವೆ.

ಮಡಕೆಗೆ ವಿದ್ಯುತ್ ಬೇಕಿಲ್ಲ. ಆರೋಗ್ಯ ಸಮಸ್ಯೆಯೂ ಇಲ್ಲ, ಆರೋಗ್ಯ ತಜ್ಞರೂ ಸಹ ಮಡಕೆ ನೀರನ್ನು ಬೆಂಬಲಿಸುತ್ತಾರೆ. ಹೀಗಾಗಿ ಇಷ್ಟು ಕಾಲ ನಾನ್‌ಸ್ಟಿಕ್ ತವಾ, ಪಾತ್ರೆಗಳನ್ನು ಬಳಸುತ್ತಿದ್ದ ಮಂದಿ ಇತ್ತೀಚಿನ ದಿನಗಳಲ್ಲಿ ಅಡುಕೆ ತಯಾರಿಸಲು ಮಣ್ಣಿನ ಪಾತ್ರೆಗಳು, ತವಾಗಳನ್ನು ಉಪಯೋಗಿಸಲು ಆರಂಭಿಸಿದ್ದಾರೆ. ಇದರೊಂದಿಗೆ ಕುಂಬಾರಿಕೆಗೆ ಮರುಜೀವ ಬಂದಂತಾಗಿದೆ.

ಗ್ರಾಮೀಣ ಭಾಗದ ಬಹುತೇಕ ಮನೆಗಳಲ್ಲಿ ಇಂದಿಗೂ ಮಡಕೆ ಬಳಕೆ ರೂಢಿಯಲ್ಲಿದೆ. ಪ್ರತಿ ಬೇಸಿಗೆಯಲ್ಲೂ ಹೊಸ ಮಡಿಕೆ ಖರೀದಿಸುವುದನ್ನು ಬಿಟ್ಟಿಲ್ಲ. ಅನೇಕ ಕುಟುಂಬಗಳು ಅಡುಗೆ ಮಾಡುವ ಪರಿಕರಗಳಾಗಿ ಮಣ್ಣಿನ ಮಡಕೆಗಳನ್ನು ಬಳಸುತ್ತಿದ್ದಾರೆ. ಆದರೂ, ಅಂತಹವರ ಸಂಖ್ಯೆ ಅತಿವಿರಳ. ಹಿಂದೆಲ್ಲ ಹಳ್ಳಿಗಳಲ್ಲಿ ದವಸ ಧಾನ್ಯಗಳನ್ನೂ ಸಹ ಮಡಿಕೆಯಲ್ಲಿಯೇ ಸಂಗ್ರಹಿಸಿಡುತ್ತಿದ್ದರು. ಆದರೆ ಕಾಲಕ್ರಮೇಣ ಬದಲಾವಣೆಯ ಗಾಳಿಗೆ ಸಿಲುಕಿ ಇಂದು ಅಡುಗೆ ಮನೆಯಿಂದ ಮಣ್ಣಿನ ಮಡಿಕೆಗಳು ನಾಪತ್ತೆಯಾಗಿವೆ.