ಶಹಾಬಾದ್: ಭಾರತ ಚೌಕ್ಗೆ ಹೋಗುವ ಮುಖ್ಯ ರಸ್ತೆಯಿಂದ ವಿಠ್ಠಲ ಮಂದಿರಕ್ಕೆ ಸಂಪರ್ಕ ಕಲ್ಪಿಸುವ ಗಲ್ಲಿ ಬಳಿ ವಿದ್ಯುತ್ ಕಂಬಕ್ಕಾಗಿ ತೆಗೆದ ತಗ್ಗು ಮುಚ್ಚದೆ ಹಾಗೆಯೇ ಬಿಟ್ಟಿದ್ದರಿಂದ ಸುಗಮ ಸಂಚಾರಕ್ಕೆ ಸಮಸ್ಯೆ ಆಗುತ್ತಿದೆ. ನಗರೋತ್ಥಾನ ಯೋಜನೆಯಡಿ ವಿವಿಧ ಮುಖ್ಯ ರಸ್ತೆಯಲ್ಲಿ ವಿದ್ಯುತ್ ಕಂಬ ಹಾಕುವ ಕಾರ್ಯ ನಡೆಯುತ್ತಿತ್ತು. ವಿಠ್ಠಲ್ ಮಂದಿರಕ್ಕೆ ಹೋಗುವ ರಸ್ತೆಯ ಡಾ.ಜಿಂಗಾಡೆ ಆಸ್ಪತ್ರೆಯ ಬಳಿ ಕಂಬಕ್ಕಾಗಿ ಗುತ್ತಿಗೆದಾರರು ನೆಲ ಅಗೆದಿದ್ದು, ಅಲ್ಲಿ ನೀರಿನ ಪೈಪ್ಲೈನ್ ಹಾದುಹೋಗಿರುವುದು ಗಮನಕ್ಕೆ ಬಂದಿರಲಿಲ್ಲ. ಕಾಮಗಾರಿ ವೇಳೆ ಒಡೆದು ಹೋಗಿದ್ದ ಪೈಪ್ಲೈನ್ ಸರಿಪಡಿಸಿದ್ದು, ತಗ್ಗು ಮುಚ್ಚದೆ ಹಾಗೆಯೇ ಬಿಟ್ಟಿದ್ದಾರೆ. ಇತ್ತೀಚೆಗೆ ಸುರಿದ ಮಳೆಯಿಂದ ತೆಗ್ಗಿನಲ್ಲಿ ನೀರು ತುಂಬಿದ್ದು, ರಸ್ತೆ ಹಾಗೂ ತಗ್ಗು ಕಾಣದಂತಾಗಿದೆ. ಕೆಲವರು ಕೆಳಗೆ ಬಿದ್ದು ಗಾಯವೂ ಮಾಡಿಕೊಂಡಿದ್ದಾರೆ. ಕೂಡಲೇ ವಿದ್ಯುತ್ ಕಂಬಗಳನ್ನು ಅಳವಡಿಸುತ್ತಿರುವ ಗುತ್ತಿಗೆದಾರರು ತೆಗ್ಗನ್ನು ಮುಚ್ಚಿ ಸುಗಮ ಸಂಚಾರಕ್ಕೆ ಅನುವು ಮಾಡಿಕೊಡಬೇಕು ಎಂದು ಸ್ಥಳಿಯರು ಒತ್ತಾಯಿಸಿದ್ದಾರೆ.
