ಚಿಂಚಳ್ಳಿ ಚೆಕ್ ಡ್ಯಾಂಗೆ ಶಾಸಕರಿಂದ ಬಾಗಿನ

ಈ ಭಾಗದಲ್ಲಿ ಕಳೆದ ಹಲವು ವರ್ಷಗಳಿಂದಲೂ ಸಮರ್ಪಕ ಮಳೆಯಾಗದ ಪರಿಣಾಮ ರಾಮನಗುಡ್ಡೆ ಕೆರೆ ಬತ್ತಿ ಹೋಗಿತ್ತು. ಇದರಿಂದ ಕೃಷಿಗೆ ತೊಡಕಾಗಿ ಪರಿಣಮಿಸಿತ್ತು. ಜತೆಗೆ ಕುಡಿಯುವ ನೀರಿಗೂ ಸಮಸ್ಯೆಯಾಗಿತ್ತು. ಈ ಬಗ್ಗೆ ಅಗತ್ಯ ಕ್ರಮವಹಿಸಿದ ಶಾಸಕ ಎಂ.ಆರ್ ಮಂಜುನಾಥ್ ಅವರು ಕಾವೇರಿ ನದಿ ಮೂಲದಿಂದ ರಾಮನಗುಡ್ಡೆ ಕೆರೆಗೆ ಕಳೆದ ತಿಂಗಳು ಹಳ್ಳದ ಮೂಲಕ ನೀರು ಹರಿಸಿದ್ದರು. ಜತೆಗೆ ಬೂದುಬಾಳು ಗ್ರಾಮದ ದೊಡ್ಡಕೆರೆಗೂ ಪೈಪ್‌ಲೈನ್ ಮೂಲಕ ನೀರುಹರಿಸಿದ್ದು, ಭರ್ತಿಯಾಗಿದೆ. ಹಾಗೆಯೇ ಚಿಂಚಳ್ಳಿ, ಬಂಡಳ್ಳಿ, ಶಾಗ್ಯ, ತೊಮಿಯಾರ್‌ಪಾಳ್ಯ ಹಾಗೂ ಈ ಭಾಗದ ಇನ್ನಿತರ ಗ್ರಾಮದ ರೈತರು ಹಾಗೂ ಗ್ರಾಮಸ್ಥರು ರಾಮನಗುಡ್ಡೆ ಕೆರೆಯಿಂದ ಚಿಂಚಳ್ಳಿ ಮಾರ್ಗದಲ್ಲಿನ ಹಳ್ಳಕ್ಕೆ ನೀರು ಹರಿಸುವಂತೆ ಮನವಿ ಮಾಡಿದ್ದರು. ಕಳೆದ ವಾರದ ಹಿಂದೆ ಹಳ್ಳಕ್ಕೆ ಕಾವೇರಿ ನೀರನ್ನು ಹರಿಸಲಾಗಿತ್ತು. ಇದೀಗ ಈ ಮಾರ್ಗದ ಚೆಕ್‌ಡ್ಯಾಂಗಳು ಭರ್ತಿಯಾದ ಹಿನ್ನೆಲೆಯಲ್ಲಿ ಶಾಸಕ ಎಂ.ಆರ್.ಮಂಜುನಾಥ್ ಅವರು ಚಿಂಚಳ್ಳಿ ಗ್ರಾಮದಲ್ಲಿ ರೈತರು ಹಾಗೂ ಗ್ರಾಮಸ್ಥರ ಜತೆಗೂಡಿ ಬಾಗಿನ ಅರ್ಪಿಸಿದರು.

ಚಿಂಚಳ್ಳಿ ಗ್ರಾಮಕ್ಕೆ ಆಗಮಿಸಿದ ಶಾಸಕರನ್ನು ಗ್ರಾಮಸ್ಥರು ಆತ್ಮೀಯವಾಗಿ ಬರಮಾಡಿಕೊಂಡು ವಾದ್ಯಮೇಳದೊಂದಿಗೆ ಮೆರವಣಿಗೆಯ ಮೂಲಕ ಕರೆ ತಂದರು. ಈ ವೇಳೆ ಮಹಿಳೆಯರು ಶಾಸಕರಿಗೆ ಆರತಿ ಬೆಳಗಿಸಿ, ತಿಲಕವಿಟ್ಟು ಸಂತಸ ವ್ಯಕ್ತಪಡಿಸಿದರು. ಗ್ರಾಮಸ್ಥರು ಜೈಕಾರ ಮೊಳಗಿಸುತ್ತಾ ಪಟಾಕಿ ಸಿಡಿಸಿ ಸಂತಸಪಟ್ಟರು.

ನೀರಾವರಿ ಸೌಕರ್ಯಕ್ಕೆ ಹೆಚ್ಚಿನ ಒತ್ತು: ನಂತರ ನಡೆದ ಕಾರ್ಯಕ್ರಮದಲ್ಲಿ ಮಾತನಾಡಿದ ಶಾಸಕ ಎಂ.ಆರ್. ಮಂಜುನಾಥ್, ಈ ಭಾಗದಲ್ಲಿ ಈವರೆಗೂ ಹಳ್ಳದ ಮೂಲಕ ಕಾವೇರಿ ನೀರನ್ನು ಹರಿಸಿದ ಪ್ರಮೇಯವೇ ಇಲ್ಲ. ಇದರಿಂದ ರೈತರು ತುಂಬಾ ಸಮಸ್ಯೆಯನ್ನು ಎದುರಿಸುತ್ತಿದ್ದರು. ಜನ, ಜಾನುವಾರುಗಳಿಗೆ ಕುಡಿಯುವ ನೀರಿಗೆ ಸಮಸ್ಯೆಯಾಗಿತ್ತು. ಇದನ್ನು ಮನಗಂಡು ಅಧಿಕಾರಿಗಳನ್ನು ಮನವೊಲಿಸಿ ಈ ಭಾಗಕ್ಕೆ ಹಳ್ಳದ ಮೂಲಕ ನೀರನ್ನು ಹರಿಸಲಾಗಿದ್ದು, ಅಂತರ್ಜಲ ಮಟ್ಟ ಸುಧಾರಣೆಯಾಗಲಿದೆ. ಇನ್ನು ರಾಮನಗುಡ್ಡೆ ಕೆರೆಯಿಂದ ಹುಬ್ಬೆಹುಣಸೇ ಡ್ಯಾಂಗೂ ಕಾವೇರಿ ನೀರು ಹರಿಸಲು ಈಗಾಗಲೇ 10 ಕೋಟಿ ರೂ ವೆಚ್ಚದಲ್ಲಿ ಯೋಜನೆ ಸಿದ್ಧವಾಗಿದೆ. ಜತೆಗೆ ರಾಮಾಪುರ ಹಾಗೂ ಕೌದಳ್ಳಿ ಭಾಗಕ್ಕೂ ನೀರಾವರಿ ಸೌಕರ್ಯ ಒದಗಿಸಲು ಡಿಪಿಆರ್ ಆಗಿದೆ. ಹಾಗೆಯೇ ಮುಂದಿನ ದಿನಗಳಲ್ಲಿ ರಾಮನಗುಡ್ಡೆ ಕೆರೆಯಿಂದ ಎಡ ಹಾಗೂ ಬಲದಂಡೆ ಕಾಲುವೆಗಳ ಮೂಲಕ ನೀರಾವರಿ ಸೌಕರ್ಯ ಒದಗಿಸಲು ಈಗಾಗಲೇ ಕ್ರಮವಹಿಸಲಾಗಿದ್ದು, ಮುಂದಿನ ದಿನಗಳಲ್ಲಿ ಕಾರ್ಯರೂಪಕ್ಕೆ ಬರಲಿದೆ ಎಂದು ತಿಳಿಸಿದರು.

ಚಾಮುಲ್ ನಿರ್ದೇಶಕ ಉದ್ದನೂರು ಪ್ರಸಾದ್, ರಾಮಾಪುರ ಮಠದ ಶ್ರೀ ಬಸವಣ್ಣ ಸ್ವಾಮೀಜಿ, ಚಾಮುಲ್ ಮಾಜಿ ಅಧ್ಯಕ್ಷ ಗುರುಮಲ್ಲಪ್ಪ, ಜಿಪಂ ಮಾಜಿ ಸದಸ್ಯ ನಾಗೇಂದ್ರಬಾಬು, ಶಾಗ್ಯ ರವಿ, ಪಿಎಸಿಸಿ ನಿರ್ದೇಶಕ ಮಂಜೇಶ್, ನಿವೃತ್ತ ಕೃಷಿ ವಿಜ್ಞಾನಿ ಡಾ. ನಿರಂಜನ್‌ಮೂರ್ತಿ, ಮುಖಂಡರಾದ ಅಂಜುಮ್ ಪಾಷ, ರಾಜುಗೌಡ, ತಿರುಪತಿ, ತಂಗವೇಲು, ಶಂಕರಪ್ಪಮ ನಿಂಗಶೆಟ್ಟಿ, ಪಳನಿಸ್ವಾಮಿ ಹಾಗೂ ಇತರರಿದ್ದರು.