ಕಾವೇರಿದ ಮೇಲ್ಮನೆ ಕಣ, ಮತದಾನ ತಾಲೀಮು

ಬೆಂಗಳೂರು: ರಾಜ್ಯದಲ್ಲಿ ವಿಧಾನ ಪರಿಷತ್ ಚುನಾವಣೆ ಕಣ ಕಾವೇರಿದೆ. ಪಕ್ಷದ ಅಭ್ಯರ್ಥಿಗಳನ್ನು ಗೆಲ್ಲಿಸಿಕೊಳ್ಳಲು ಶಾಸಕರಿಗೆ ಮತದಾನದ ಕುರಿತು ಪ್ರಾತ್ಯಕ್ಷಿಕೆ ನೀಡಲು ಪಕ್ಷಗಳು ಮುಂದಾಗಿವೆ. ಈ ನಿಟ್ಟಿನಲ್ಲಿ ಒಂದು ಹೆಜ್ಜೆ ಮುಂದಿರುವ ಕಾಂಗ್ರೆಸ್ ಜೂನ್ 16ರ ಸಂಜೆ 6 ಗಂಟೆಗೆ ಬೆಂಗಳೂರು ದಕ್ಷಿಣ ಜಿಲ್ಲೆಯ ಬಿಡದಿ ಸಮೀಪದ ವಂಡರ್ ಲಾ ರೆಸಾರ್ಟ್‌ನಲ್ಲಿ ಶಾಸಕಾಂಗ ಪಕ್ಷದ ಸಭೆ ಕರೆದಿದೆ.

ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅಧ್ಯಕ್ಷತೆಯಲ್ಲಿ ನಡೆಯಲಿರುವ ಸಭೆಯಲ್ಲಿ ಎಐಸಿಸಿ ಪ್ರಧಾನ ಕಾರ್ಯದರ್ಶಿ ರಣದೀಪ್ ಸಿಂಗ್ ಸುರ್ಜೇವಾಲಾ, ಕೆಪಿಸಿಸಿ ಅಧ್ಯಕ್ಷ ಬಿ.ಕೆ. ಹರಿಪ್ರಸಾದ್, ಮಾಜಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮತ್ತು ಪಕ್ಷದ ಎಲ್ಲ ಕಾರ್ಯಾಧ್ಯಕ್ಷರು ಭಾಗವಹಿಸಲಿದ್ದಾರೆ.

ವಿಧಾನ ಪರಿಷತ್ತಿಗೆ ನಡೆಯಲಿರುವ ದ್ವೈ-ವಾರ್ಷಿಕ ಚುನಾವಣೆಯಲ್ಲಿ ಪಕ್ಷದ ಅಭ್ಯರ್ಥಿಗಳಿಗೆ ಮತಚಲಾಯಿಸುವ ವಿಧಾನಸಭಾ ಸದಸ್ಯರು ಮತ್ತು ಬಾಹ್ಯ ಬೆಂಬಲಿತ ಶಾಸಕರಿಗೆ ಸಭೆಗೆ ಆಹ್ವಾನ ನೀಡಲಾಗಿದೆ. ಪರಿಷತ್ತಿನ 7ನೇ ಸ್ಥಾನವನ್ನೂ ಗೆಲ್ಲುವ ತವಕದಲ್ಲಿ ಕಾಂಗ್ರೆಸ್ ಇದ್ದು, ಇದಕ್ಕಾಗಿ ಕಾರ್ಯತಂತ್ರವನ್ನು ರೂಪಿಸುತ್ತಿದೆ. ಪ್ರತಿಪಕ್ಷ ಕಾಂಗ್ರೆಸ್‌ನ 132 ಶಾಸಕರ ಬಲದಲ್ಲಿ 4 ಸ್ಥಾನಗಳನ್ನು ಸುಲಭವಾಗಿ ಗೆಲ್ಲಬಹುದಾಗಿದೆ. ಜತೆಗೆ 5ನೇ ಅಭ್ಯರ್ಥಿಯನ್ನು ಸ್ಪರ್ಧೆಗೆ ಇಳಿಸಿರುವ ಕಾಂಗ್ರೆಸ್, ಕೊರತೆ ಇರುವ ಮತಗಳನ್ನು ಪ್ರತಿಪಕ್ಷ ಮತ್ತು ಪಕ್ಷೇತರರ ಮೂಲಕ ಸೆಳೆಯಲು ಕಾರ್ಯತಂತ್ರ ರೂಪಿಸುತ್ತಿದೆ. ಇದಕ್ಕಾಗಿ ರೆಸಾರ್ಟ್‌ನಲ್ಲಿ ಜೂ.16ಕ್ಕೆ ಶಾಸಕಾಂಗ ಸಭೆಯನ್ನು ಕರೆದಿದ್ದು, ಯಾರು ಯಾರಿಗೆ ಮತ ಚಲಾಯಿಸಬೇಕೆಂದು ಶಾಸಕರಿಗೆ ಕಟ್ಟಾಜ್ಞೆ ಮಾಡಲಿದೆ. ಜತೆಗೆ 2 ಮತ್ತು 3ನೇ ಪ್ರಾಶಸ್ತ್ಯದ ಮತ ಹಾಕುವ ಲೆಕ್ಕಾಚಾರದಲ್ಲಿ ಪರಿಷತ್ತಿನ 7ನೇ ಸ್ಥಾನವನ್ನು ಪಕ್ಷದ ಕಡೆಗೆ ಸೆಳೆಯಲು ತಂತ್ರಗಾರಿಕೆ ರೂಪಿಸಲಿದೆ.

ಮತ್ತೊಂದೆಡೆ ಬಿಜೆಪಿಯಿಂದ ಸ್ಪರ್ಧಿಸಿರುವ ಆರ್. ರಘು, ಲಿಂಗರಾಜ ಪಾಟೀಲ್ ಗೆಲುವಿಗೆ ಸಮಸ್ಯೆ ಇಲ್ಲ. ಬಿಜೆಪಿ ತನ್ನ 62 ಶಾಸಕರು ಮೊದಲೇ ನಿರ್ಧಾರ ಮಾಡಿದಂತೆ ಆಯಾ ಅಭ್ಯರ್ಥಿಗಳಿಗೆ ಮತ ಚಲಾಯಿಸಿದರೆ ಎರಡು ಸ್ಥಾನ ಗೆಲ್ಲಬಹುದು. ಉಳಿದ ಮತಗಳನ್ನು ಜೆಡಿಎಸ್ ಅಭ್ಯರ್ಥಿ ಗೋವಿಂದರಾಜುಗೆ ಚಲಾಯಿಸಲು ಔಪಚಾರಿಕವಾಗಿ ತಿಳಿಸಲಾಗಿದೆ. ಈ ಬಗ್ಗೆ ನಿರ್ಧಾರ ಮಾಡಲು ಸದ್ಯದಲ್ಲಿಯೇ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ವೈ. ವಿಜಯೇಂದ್ರ ನೇತೃತ್ವದಲ್ಲಿ ಸಭೆ ಕರೆಯಲಾಗುತ್ತದೆ ಎಂದು ಬಿಜೆಪಿ ಮೂಲಗಳು ಖಚಿತ ಪಡಿಸಿವೆ.

ಇನ್ನೂ ಮತಗಳ ಕೊರತೆ ಇರುವ ಜೆಡಿಎಸ್ ತನ್ನ ಪಕ್ಷದ ಅಭ್ಯರ್ಥಿ ಗೋವಿಂದರಾಜು ಅವರನ್ನು ಗೆಲ್ಲಿಸಿಕೊಳ್ಳಲು ಪಕ್ಷದಿಂದ ಅಡ್ಡಮತದಾನ ಆಗದಂತೆ ಎಚ್ಚರಿಕೆ ವಹಿಸಬೇಕಿದೆ. ಜತೆಗೆ ಪಕ್ಷೇತರ ಮತ್ತು ಬಿಜೆಪಿಯಿಂದ ಉಚ್ಛಾಟಿತ ಶಾಸಕರ ಮತಗಳನ್ನು ಸೆಳೆಯಬೇಕಿದೆ. ಈ ಬಗ್ಗೆ ಜೆಡಿಎಸ್ ನಾಯಕರು ಕಾರ್ಯತಂತ್ರ ರೂಪಿಸುತ್ತಾರೆ ಎಂಬುದು ಕುತೂಹಲ ಮೂಡಿಸಿದೆ.

ಕಾಂಗ್ರೆಸ್ ಬಿ.ಕೆ. ಹರಿಪ್ರಸಾದ್, ವಿನಯ್ ಕಾರ್ತಿಕ್ ಪ್ರಕಾಶ್, ತಿಪ್ಪಣ್ಣಪ್ಪ ಕಮಕನೂರ, ಪಿ.ವಿ. ಮೋಹನ್ ಮತ್ತು ಬಿ.ಎಸ್. ಶಿವಣ್ಣ ಅವರನ್ನು ಪರಿಷತ್ತಿನ ಕಣಕ್ಕೆ ಇಳಿಸಿದೆ. 132 ಶಾಸಕರ ಬಲದಿಂದ 4 ಸ್ಥಾನಗಳನ್ನು ಸುಲಭವಾಗಿ ಗೆಲ್ಲಲಿದೆ. 5ನೇ ಅಭ್ಯರ್ಥಿಯನ್ನು ಗೆಲ್ಲಿಸಿಕೊಳ್ಳಲು ಮತಗಳ ಕೊರತೆ ಇದ್ದು, 2 ಮತ್ತು 3ನೇ ಪ್ರಶಸ್ಯ ಮತಗಳ ಲೆಕ್ಕಾಚಾರದಲ್ಲಿ ಗೆಲ್ಲಿಸಿಕೊಳ್ಳಲು ನಿರ್ಧಾರ ಮಾಡಿದೆ.

ರೆಸಾರ್ಟ್‌ನಲ್ಲಿ ನಡೆಯುವ ಶಾಸಕಾಂಗ ಸಭೆಯಲ್ಲಿ ಯಾವ ಅಭ್ಯರ್ಥಿಗೆ ಎಷ್ಟು ಶಾಸಕರು ಮತ ಚಲಾಯಿಸಬೇಕು. ಅದರಲ್ಲಿಯೂ ಯಾರ‌್ಯಾರಿಗೆ ಎಂದು ಸ್ಥಳದಲ್ಲಿಯೇ ನಿರ್ಧಾರ ಮಾಡಿ ಅವರ ಕಡೆಯಿಂದ ಕಲ್ಪಿತ ಮತದಾನವನ್ನು ಮಾಡಿಸಲಾಗುತ್ತದೆ. ಮತ ಚಲಾವಣೆಯಲ್ಲಿ ತಪ್ಪಾದರೆ ಸರಿಪಡಿಸುವ ಬಗ್ಗೆ ತರಬೇತಿ ನೀಡಲಾಗುತ್ತದೆ. ತಮಗೆ ಸೂಚನೆ ಕೊಟ್ಟಿರುವ ಅಭ್ಯರ್ಥಿಗೆ ಮತ ಚಲಾಯಿಸಬೇಕು. ಅದನ್ನು ಬಿಟ್ಟು ತಮ್ಮದೆ ಪಕ್ಷದ ಅಭ್ಯರ್ಥಿ ಆದರೂ ಬೇರೆಯವರಿಗೆ ಮತ ಚಲಾಯಿಸುವಂತಿಲ್ಲ. ಮೊದಲ ಮತ, 2ನೇ ಮತ್ತು 3ನೇ ಮತಗಳನ್ನು ಯಾರಿಗೆ ಹಾಕಬೇಕೆಂಬುದನ್ನು ಕಲ್ಪಿತ ಪ್ರದರ್ಶನದಲ್ಲಿ ಶಾಸಕರಿಗೆ ಹೇಳಿಕೊಡಲಾಗುತ್ತದೆ.

18ಕ್ಕೆ ನಡೆಯಲಿರುವ ಪರಿಷತ್ತಿನ ಚುನಾವಣೆ ಸಂಬಂಧ ಕೇಂದ್ರ ಸಚಿವ ಎಚ್.ಡಿ. ಕುಮಾರಸ್ವಾಮಿ ನಿವಾಸದಲ್ಲಿ ಶುಕ್ರವಾರ ಸಭೆ ನಡೆಸಲಾಗಿದೆ. ಶಾಸಕ ಜಿ.ಟಿ. ದೇವೇಗೌಡ ಸೇರಿ ಮೂವರು ಶಾಸಕರನ್ನು ಹೊರತುಪಡಿಸಿ ಉಳಿದ ಎಲ್ಲರೂ ಭಾಗವಹಿಸಿದ್ದರು.

ಜಿ.ಟಿ. ದೇವೇಗೌಡರು, ಪಕ್ಷದ ಅಭ್ಯರ್ಥಿಗೆ ಮತ ಚಲಾಯಿಸುವ ಭರವಸೆ ನೀಡಿದ್ದು, ಉಳಿದ ಇಬ್ಬರು ಪ್ರವಾಸದಲ್ಲಿ ಇರುವ ಕಾರಣ ಸಭೆಗೆ ಗೈರು ಆಗಲು ಅನುಮತಿ ಪಡೆದಿದ್ದರು ಎಂದು ಜೆಡಿಎಸ್ ಮುಖಂಡರು ಮಾಹಿತಿ ನೀಡಿದ್ದಾರೆ.

ಕೊರತೆ ಇರುವ ಎರಡು ಮತಗಳನ್ನು ಸೆಳೆಯುವ ಕುರಿತು ಚರ್ಚೆಗಳು ನಡೆದಿದ್ದು, ಉಳಿದಂತೆ ಪಕ್ಷದ ಶಾಸಕರು ತಮ್ಮ ಅಭ್ಯರ್ಥಿ ಗೋವಿಂದರಾಜುಗೆ ಮತ ಚಲಾಯಿಸಬೇಕೆಂದು ಮನವಿ ಮಾಡಲಾಗಿದೆ. ಜೂ.16 ಅಥವಾ 17ರಂದು ಎಲ್ಲ ಶಾಸಕರು ಒಟ್ಟಿಗೆ ಸೇರಿ ಮತದಾನದ ಕುರಿತು ಕಲ್ಪಿತ ಪ್ರದರ್ಶನ ನಡೆಯಲು ಸಭೆಯಲ್ಲಿ ನಿರ್ಧಾರ ಮಾಡಿದ್ದಾರೆ.