ಖಾಕಿ ಮೇಲೆ ಕೈ ಮಾಡಿದವನ ವಿರುದ್ಧ ಪ್ರಕರಣ ದಾಖಲು

ಜು.25ರಂದು ರಾತ್ರಿ ಸೊಣ್ಣಶೆಟ್ಟಿಹಳ್ಳಿಯಲ್ಲಿ ಗಲಾಟೆ ನಡೆಯುತ್ತಿದೆ ಎಂದು ಬಂದ ಮಾಹಿತಿ ಮೇರೆಗೆ ಹೆಡ್​ ಕಾನ್​ಸ್ಟೇಬಲ್​ ಜಿ.ರಾಮಾಂಜನೇಯ ಹಾಗೂ ಎ.ಆರ್​.ಎಸ್​.ಐ ವೆಂಕಟರೆಡ್ಡಿ ಸ್ಥಳಕ್ಕೆ ತೆರಳಿದ್ದರು

ಪೊಲೀಸರು ದೂರುದಾರ ಅರವಿಂದ್​ ಅವರನ್ನು ವಿಚಾರಿಸಿದಾಗ ಅವರ ಮಾವ ಗೋಪಾಲಕೃಷ್ಣನೇ ಗಲಾಟೆ ನಡೆಸಿ ಚಾಕುವಿನಿಂದ ಚುಚ್ಚುವುದಾಗಿ ಬೆದರಿಕೆ ಹಾಕಿರುವುದಾಗಿ ತಿಳಿಸಿದರು. ಪೊಲೀಸರು ಗೋಪಾಲಕೃಷ್ಣ ಅವರನ್ನು ಪ್ರಶ್ನಿಸಿದಾಗ ಪೊಲೀಸರೊಂದಿಗೆ ವಾಗ್ವಾದ ನಡೆಸಿ ನಿಂದಿಸಿದ್ದಲ್ಲದೆ ರಾಮಾಂಜನೇಯ ಅವರ ಕಾಲರ್​ ಹಿಡಿದು ಎಳೆದಾಡಿ ಹಲ್ಲೆ ಮಾಡಿದ ಎಂದು ಆಪಾದಿಸಲಾಗಿದೆ.

ತಡೆಯಲು ಬಂದ ಎ.ಆರ್​.ಎಸ್​.ಐ ವೆಂಕಟರೆಡ್ಡಿ ಮೇಲೆಯೂ ಹಲ್ಲೆ ನಡೆಸಿ, ಕೊಲೆ ಬೆದರಿಕೆ ಹಾಕಿದ್ದಾರೆ. ಸಾರ್ವಜನಿಕರು ಮಧ್ಯಪ್ರವೇಶಿಸಿ ಜಗಳ ಬಿಡಿಸಿದ್ದು, ಗಾಯಗೊಂಡ ಇಬ್ಬರೂ ಪೊಲೀಸರು ನಗರದ ಸರ್ಕಾರಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದಿದ್ದಾರೆ. ನಗರ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.