ಕೆಆರ್​ ಸರ್ಕಲ್​ನಲ್ಲಿ ನಿಂತಿದ್ದ ವಾಯುವಜ್ರ ಬಸ್​​ಗೆ, BMTC ಡಿಕ್ಕಿ; ಚಾಲಕ, ಯುವತಿಗೆ ಗಂಭೀರ ಗಾಯ..Bengaluru

ಬೆಂಗಳೂರು; ಇಲ್ಲಿನ ಕೆಆರ್​ ಸರ್ಕಲ್​ನಲ್ಲಿ ಶನಿವಾರ ಬೆಳ್ಳಂಬೆಳಗ್ಗೆ  ಬಿಎಂಟಿಸಿ ಬಸ್​​ಗಳ ನಡುವೆ ಭೀಕರ ಅಪಘಾತ ಸಂಭವಿಸಿದೆ. ಈ ಘಟನೆಯಿಂದಾಗಿ ಎಂಟು ಮಂದಿ ಗಾಯಗೊಂಡಿದ್ದು, ಮೂವರ ಸ್ಥಿತಿ ಗಂಭೀರವಾಗಿದೆ ಎನ್ನಲಾಗಿದೆ. 

ಇಂದು ಬೆಳಿಗ್ಗೆ ಕೃಷ್ಣರಾಜೇಂದ್ರ ವೃತ್ತ ಬಳಿ  ಟ್ರಾಫಿಕ್​ ಸಿಗ್ನಲ್​ನಲ್ಲಿ, ಬಿಎಂಟಿಸಿ ವಾಯುವಜ್ರ ನಿಂತಿತ್ತು. ಈ ವೇಳೆ ಹಿಂಬದಿಯಿಂದ ವೇಗವಾಗಿ ಬಂದ  ಬಿಎಂಟಿಸಿ ಎಲೆಕ್ಟ್ರಿಕ್ ಬಸ್​​​​​ ನಿಂತಿದ್ದ ವಾಯುವಜ್ರಕ್ಕೆ ಡಿಕ್ಕಿ ಹೊಡೆದಿದೆ. ಬಸ್​​ ಗುದ್ದಿದ ರಭಸಕ್ಕೆ  ಬಿಎಂಟಿಸಿ ಬಸ್‌ನ ಮುಂಭಾಗ ಸಂಪೂರ್ಣವಾಗಿ ಜಖಂಗೊಂಡಿದೆ. ಚಾಲಕ ಅಭಿಷೇಕ್​ಗೆ ಗಂಭೀರ ಗಾಯವಾಗಿದೆ ಎನ್ನಲಾಗಿದೆ.

ಕಲಬುರಗಿ ಮೂಲದ ಭಾಗ್ಯ ಎನ್ನುವ ಯುವತಿಯ ಎಡಗಾಲು ಸಿಕ್ಕಿಹಾಕಿಕೊಂಡಿತ್ತು. ಈ ವೇಳೆ ಸಾರ್ವಜನಿಕರು ಕಬ್ಬಿಣದ ಸಲಾಕೆಗಳನ್ನು ಹರ ಸಾಹಸಪಟ್ಟು ತುಂಡರಿಸಿ ಯುವತಿಯ ಕಾಲನ್ನು ಹೊರ ತೆಗೆಯಲು ಸಹಾಯ ಮಾಡಿದರು. ಆನಂತರ ಯುವತಿಯನ್ನು ಹಾಗೂ ಬಸ್​ ಚಾಲಕ ಅಭಿಷೇಕ್​ರನ್ನು ಸೇಂಟ್​ ಮಾರ್ಥಾಸ್​ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಈ ಬಗ್ಗೆ ಕೇಂದ್ರ ಸಂಚಾರ ವಿಭಾಗದ ಅನೂಪ್​ ಶೆಟ್ಟಿಯವರು ಮಾಹಿತಿ ಪಡೆದುಕೊಂಡಿದ್ದಾರೆ.

ಪೀಕ್​ ಅವರ್ ಆದ ಕಾರಣ ಬಿಎಂಟಿಸಿ ಬಸ್​​ನಲ್ಲಿ ಕಚೇರಿಗೆ ಹಾಗೂ  ಶಾಲಾ-ಕಾಲೇಜಿಗೆ ತೆರಳುವ ವಿದ್ಯಾರ್ಥಿಗಳು ಹೆಚ್ಚಾಗಿದ್ದರು.  ಅನಿರೀಕ್ಷಿತವಾಗಿ ನಡೆದ ಈ ಅಪಘಾತದಿಂದಾಗಿ ಪ್ರಯಾಣಿಕರು ಅಘಾತಕ್ಕೆ ಒಳಗಾಗಿದ್ದರು. ಅಲ್ಲದೆ ಅಪಘಾತದಿಂದ ಮುಂದಿನ ಸೀಟಿನಲ್ಲಿ ಕುಳಿತಿದ್ದ ಮಹಿಳೆಯರಿಗೆ ಸಣ್ಣಪುಟ್ಟ ಗಾಯವಾಗಿದೆ.  ಇದೇ ವೇಳೆ ಅವರ ಆಕ್ರಂದನ, ಕಿರುಚಾಟ ಮುಗಿಲುಮುಟ್ಟಿತ್ತು.

ಎಲೆಕ್ಟ್ರಿಕ್​ ಬಸ್​ ಚಾಲಕ ಅತಿವೇಗವಾಗಿ ಬಸ್​ ಚಾಲನೆ ಮಾಡಿದ್ದರಿಂದಲೇ ಅಪಘಾತಕ್ಕೆ ಕಾರಣವಾಗಿದೆ ಎಂದು ಸಂಚಾರಿ ಪೊಲೀಸರು ತಿಳಿಸಿದ್ದಾರೆ. ಇದಲ್ಲದೆ ಸಂಚಾರ ಮಾರ್ಗ ಬದಲಾವಣೆ ಬಗ್ಗೆ ಮಾಹಿತಿ ಹಂಚಿಕೊಂಡಿದ್ದಾರೆ. ಹಾರಾಣಿ ಕಾಲೇಜು ಅಪ್ಪರ್ ರ‍್ಯಾಂಪ್ ಬಳಿ ಅಪಘಾತ ಸಂಭವಿಸಿರುವುದರಿಂದ ಕೆ.ಆರ್ ವೃತ್ತದ ಕಡೆಗೆ  ನಿಧಾನಗತಿಯ ಸಂಚಾರವಿರುತ್ತದೆ ಎಂದು ಎಕ್ಸ್​​ನಲ್ಲಿ ಮಾಹಿತಿ ನೀಡಲಾಗಿದೆ, (ಏಜೆನ್ಸೀಸ್​).