ಬಿಡದಿ ಟೌನ್ ಶಿಪ್ ಗಲಾಟೆ; ಒತ್ತಾಯದಿಂದ ಜನರ ಕೃಷಿ ಭೂಮಿ ಕಸಿಯುವುದು, ದಬ್ಬಾಳಿಕೆ ಮಾಡೋದು ಸರಿಯಲ್ಲ: ಪ್ರಲ್ಹಾದ್ ಜೋಶಿ | Pralhad Joshi

ಬೆಂಗಳೂರು: ಬಿಡದಿ ಟೌನ್​ಶಿಪ್​ ಯೋಜನೆಯನ್ನು ಜೆಡಿಎಸ್-ಬಿಜೆಪಿ ಸಮ್ಮಿಶ್ರ ಸರ್ಕಾರದಲ್ಲಿ ರೂಪಿಸಲಾಗಿತ್ತು ಎಂಬ ಸಿಎಂ ಡಿ.ಕೆ.ಶಿವಕುಮಾರ್ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ(Pralhad Joshi), ಯೋಜನೆಯನ್ನು ಬಿಜೆಪಿ ಹಾಗೂ ಜೆಡಿಎಸ್ ಪ್ಲಾನ್ ಮಾಡಿತ್ತು. ಆದರೆ ಯಾಕೆ ಅದನ್ನ ಚಾಲ್ತಿಗೆ ತರಲಿಲ್ಲ ಹೇಳಿ? ಒತ್ತಾಯದಿಂದ ಕೃಷಿ ಭೂಮಿಯನ್ನು ಕಸಿದುಕೊಳ್ಳುವುದು ಸರಿಯಲ್ಲ ಎಂದು ಹೇಳಿದ್ದಾರೆ.

ಬೆಂಗಳೂರಿನಲ್ಲಿ ಈ ಕುರಿತು ಮಾತನಾಡಿರುವ ಅವರು, ಮಾಜಿ ಪ್ರಧಾನಿ ದೇವೇಗೌಡರು ಕೇಳಿರುವ ಪ್ರಶ್ನೆಗೆ ಸಿಎಂ ಡಿಕೆ ಶಿವಕುಮಾರ್ ಉತ್ತರ ನೀಡಲು ಆಗಿಲ್ಲ. ಸಿದ್ದರಾಮಯ್ಯನವರು ಸಿಎಂ ಆಗಿದ್ದಾಗ ಯಾಕೆ ಈ ಯೋಜನೆಗೆ ಕೈಹಾಕಲಿಲ್ಲ? ಸಿಎಂ ಯಾಕೆ ಇಷ್ಟು ಆತುರದಲ್ಲಿ ಮಾಡಬೇಕು ಅಂತಿದ್ದಾರೆ? ರೈತರ ಜೊತೆ ಯಾಕೆ ಮಾತನಾಡುತ್ತಿಲ್ಲ? ಎಂದು ಕಿಡಿಕಾರಿದ್ದಾರೆ.

ರೈತರ ಮೇಲೆ ದಾದಾಗಿರಿ ಮಾಡಿ ಯೋಜನೆ ಮಾಡಬೇಕು ಅಂತಿದ್ದೀರಾ? ರೈತರ ಜೊತೆ ನಿಂತು ರಾಹುಲ್ ಗಾಂಧಿ ಬೇರೆ ರಾಜ್ಯಗಳಲ್ಲಿ ನಾಟಕ ಮಾಡುತ್ತಾರೆ. ಆದರೆ ನಮ್ಮ ರಾಜ್ಯದಲ್ಲಿ ರಿಯಲ್ ಎಸ್ಟೇಟ್ ತಾಂಡವ ಮಾಡುತ್ತಿದೆ. ಬಿಡದಿ ಟೌನ್​ಶಿಪ್ ಮಾಡಿದರಷ್ಟೇ ಬೆಂಗಳೂರು ಅಭಿವೃದ್ಧಿಯಾಗುತ್ತಾ ಎಂದು ಪ್ರಶ್ನಿಸಿದ್ದಾರೆ.

ನನ್ನ ಬಳಿ ಪೊಲೀಸ್ ಫೋರ್ಸ್ ಇದೆ ಅಂತ ದಬ್ಬಾಳಿಕೆ ಮಾಡುವುದು ಸರಿಯಲ್ಲ. ಸರ್ವಾಧಿಕಾರ ಧೋರಣೆ ಮಾಡಬಾರದು. ಈಗ ರೈತರು ತಿರುಗಿ ಬಿದ್ದ ನಂತರ ಒತ್ತಾಯಪೂರ್ವಕವಾಗಿ ಮಾಡುವುದಿಲ್ಲ ಅಂತ ಹೇಳಿದ್ದಾರೆ. ಮೊದಲೇ ಯಾಕೆ ಜನರ ಜೊತೆ ಮಾತನಾಡಲಿಲ್ಲ. ನನ್ನದೇ ನಡೆಯಬೇಕು ಎಂಬ ನಿಮ್ಮ ಹಠ, ಸರ್ವಾಧಿಕಾರಿತನವನ್ನು ಬಿಟ್ಟುಬಿಡಿ, ನಾವು ಪ್ರಜಾಪ್ರಭುತ್ವದಲ್ಲಿದ್ದೇವೆ. ನೀವು ರಾಜ್ಯದ ಸಿಎಂ, ಮಹಾರಾಜರಲ್ಲ. ನೀವು ನಡೆ ನುಡಿಯಲ್ಲಿ ಬದಲಾಗಬೇಕು ಎಂದು ಹೇಳಿದ್ದಾರೆ.

ಸಿಎಂ ಡಿ.ಕೆ.ಶಿವಕುಮಾರ್ ಅವರನ್ನು ಜೈಲಿಗೆ ಕಳುಹಿಸುವ ವಿಚಾರ ಯಾರದ್ದೂ ಅಲ್ಲ. ಅವರೇ ಮಾಡಿದ ತಪ್ಪು, ಭ್ರಷ್ಟಾಚಾರದಿಂದ ಜೈಲಿಗೆ ಹೋಗಿದ್ದರು. ನಾವು ಅವರನ್ನು ಜೈಲಿಗೆ ಕಳಿಸುವ ಪ್ರಯತ್ನವನ್ನಂತೂ ಮಾಡಿಲ್ಲ. ಯಾವುದೇ ವ್ಯಕ್ತಿ ತಪ್ಪು ಮಾಡಿದರೂ ಜೈಲಿಗೆ ಹೋಗುತ್ತಾರೆ. ಅವರು ತಪ್ಪು ಮಾಡಿದ್ರೆ ಹೋಗುತ್ತಾರೆ. ನೀವೇನಾದ್ರೂ ತಪ್ಪು ಮಾಡದಿದ್ರೆ ಭಯ ಯಾಕೆ, ಅದರಿಂದ ಹೊರಗೆ ಬನ್ನಿ ಎಂದಿದ್ದಾರೆ.

ರೈತರು ಪ್ರಖರವಾಗಿ ವಿರೋಧ ಮಾಡುತ್ತಿರೋವಾಗ ಮಾತುಕತೆ ಮಾಡುವುದಾ ಅಥವಾ ಅವರ ಮೇಲೆಯೇ ಕೇಸ್ ಹಾಕುವುದಾ? ದೇವೇಗೌಡರ ಪ್ರಶ್ನೆಗೆ ಉತ್ತರ ಕೊಡುವುದನ್ನು ಬಿಟ್ಟು ಕೂಗಾಡುತ್ತಿದ್ದಾರೆ. ಪ್ರಶ್ನೆ ಮಾಡಿದರೆ ರೋಷಾವೇಷ ಯಾಕೆ ಹೊತ್ತಿ ಉರಿಯುತ್ತದೆ. ತಪ್ಪು ಮಾಡಿದಾಗ ಸಮರ್ಥನೆ ಮಾಡಿಕೊಳ್ಳಲು ಆಗುವುದಿಲ್ಲ. ಆಗ ಮನುಷ್ಯನಿಗೆ ಕೋಪ ಬರುತ್ತೆ. ಸಿಎಂ ತಪ್ಪು ಮಾಡಿದ್ದಾರೆ ಅಂತ ಅವರಿಗೆ ಗೊತ್ತಿರುವುದರಿಂದ ಕೋಪ ಬರುತ್ತದೆ ಎಂದು ಕಿಡಿಕಾರಿದ್ದಾರೆ.

ಕಳೆದ 12 ವರ್ಷಗಳಿಂದ ರಾಜ್ಯದಲ್ಲಿ ಹೇಗಾಗಿದೆ ಅಂದ್ರೆ, ಮಳೆ ಜಾಸ್ತಿಯಾದರೂ, ಬರಗಾಲ ಬಂದ್ರೂ, ದೇಶದಲ್ಲಿ ಮಕ್ಕಳ ಸಂಖ್ಯೆ ಹೆಚ್ಚಾದರೂ, ಮಕ್ಕಳ ಸಂಖ್ಯೆ ಕಡಿಮೆ ಆದರೂ ಮೋದಿ ಕಾರಣ ಎನ್ನುವಂತಾಗಿದೆ. ಎಲ್ಲವನ್ನು ಕೇಂದ್ರ ಸರ್ಕಾರದ ಮೇಲೆ ಹಾಕುವ ಧೋರಣೆಯನ್ನು ಇಲ್ಲಿನ ಕಾಂಗ್ರೆಸ್ ಬಿಟ್ಟು ಬಿಡಬೇಕು ಎಂದು ವಾಗ್ದಾಳಿ ನಡೆಸಿದ್ದಾರೆ.

ರಾಜ್ಯದಲ್ಲಿ ಇನ್ನೂ ಯಾಕೆ ಸಚಿವ ಸಂಪುಟ ವಿಸ್ತರಣೆ ಯಾಕೆ ಮಾಡ್ತಿಲ್ಲ? ರಾಹುಲ್ ಗಾಂಧಿ ಎಲ್ಲಿದ್ದಾರೆ ಅಂತ ಯಾರಿಗಾದರೂ ಗೊತ್ತಾ? ಕಳೆದ 25 ದಿನಗಳಿಂದ ಎಲ್ಲಾ ಪ್ರಮುಖ ಕಾರ್ಯಕ್ರಮಗಳನ್ನು ರದ್ದು ಮಾಡಿ ನಾಪತ್ತೆಯಾಗಿದ್ದಾರೆ. ಲೋಕಸಭೆ ನಾಯಕ ವಿರೋಧ ಪಕ್ಷದ ನಾಯಕ ದೇಶದಿಂದ ಕಾಣೆಯಾಗಿದ್ದಾರೆ. ಪ್ರಧಾನ ಮಂತ್ರಿಗಳು ಎಲ್ಲಿಗೆ ಹೋದರೂ ಜನರಿಗೆ ತಿಳಿಸಿ ಹೋಗುತ್ತಾರೆ. ಆದರೆ ರಾಹುಲ್ ಗಾಂಧಿ ಜನರಿಂದ ಮುಚ್ಚಿಟ್ಟು ಹೋಗ್ತಿದ್ದಾರೆ ಎಂದಿದ್ದಾರೆ.