ರಿಯಲ್ ಎಸ್ಟೇಟ್ ದಂಧೆಗಾಗಿ ಬಿಡದಿ ಟೌನ್‌ಶಿಪ್ ಯೋಜನೆ: ಕೇಂದ್ರ ಸಚಿವ ಹೆಚ್ ಡಿ ಕುಮಾರಸ್ವಾಮಿ ಗಂಭೀರ ಆರೋಪ! | H D Kumaraswamy

ಬೆಂಗಳೂರಿನಲ್ಲಿ ಮಾತನಾಡಿದ ಅವರು, ಸರ್ಕಾರದ ಈ ಯೋಜನೆಯ ವಿರುದ್ಧ ಕಾನೂನು ಹೋರಾಟ ರೂಪಿಸುವುದಾಗಿ ಎಚ್ಚರಿಸಿದ್ದಾರೆ.

ಬಿಡದಿ ಟೌನ್‌ಶಿಪ್ ಕುಮಾರಸ್ವಾಮಿ ಅವರ ಕನಸಿನ ಕೂಸು ಎಂದು ಮುಖ್ಯಮಂತ್ರಿ ಡಿ ಕೆ ಶಿವಕುಮಾರ್​ ಅವರು ಹೇಳುತ್ತಿದ್ದಾರೆ. ಆದರೆ, 2006 ಎಲ್ಲಿ ಮತ್ತು ಈಗಿನ 2026 ಎಲ್ಲಿ? ಕಳೆದ 20 ವರ್ಷಗಳಲ್ಲಿ ಎಷ್ಟು ಅಭಿವೃದ್ಧಿ ಆಗಿದೆ ಎಂಬುದನ್ನು ಅವರು ಯೋಚಿಸಬೇಕು. ಯಾವುದೇ ಹೊಸ ಯೋಜನೆ ತರುವ ಮುನ್ನ ಅಲ್ಲಿನ ರೈತರ ಪರಿಸ್ಥಿತಿಯ ಬಗ್ಗೆ ಸರ್ಕಾರ ಯೋಚನೆ ಮಾಡಬೇಕಾಗುತ್ತದೆ. ಬೆಂಗಳೂರು ಸುತ್ತಮುತ್ತ ಈ ಹಿಂದೆ ಅರ್ಕವತಿ ಬಡಾವಣೆಗಾಗಿ 3 ಸಾವಿರ ಎಕರೆಗೆ ಅಧಿಸೂಚನೆ ಹೊರಡಿಸಿ, ನಂತರ ನಿಯಮಬಾಹಿರವಾಗಿ 1 ಸಾವಿರ ಎಕರೆಯನ್ನು ಕೈಬಿಟ್ಟ ಇತಿಹಾಸ ಇವರ ಕಣ್ಣಮುಂದೆಯೇ ಇದೆ ಎಂದು ಎಚ್​​ಡಿಕೆ ನೆನಪಿಸಿದ್ದಾರೆ.

ನರೇಂದ್ರ ಮೋದಿಯವರು ಇಂತಹ ಯೋಜನೆ ಮಾಡಿದ್ದರು ಎಂಬ ಮಾತಿಗೆ ಪ್ರತಿಕ್ರಿಯಿಸಿದ ಸಚಿವ ಕುಮಾರಸ್ವಾಮಿ, ಪ್ರಧಾನಿ ಮೋದಿಯವರು ಅಂದು ಮಾಡಿದ್ದು ಭೂಕಂಪ ಸಂಭವಿಸಿ ಸಂಪೂರ್ಣವಾಗಿ ನಾಶವಾಗಿದ್ದ ಪ್ರದೇಶದಲ್ಲಿ, ಅಂತಹ ಹಾಳುಬಿದ್ದ ಜಾಗದಲ್ಲಿ ಅಭಿವೃದ್ಧಿ ಮಾಡಿದರೆ ಪರವಾಗಿಲ್ಲ. ಆದರೆ ಬಿಡದಿಯಲ್ಲಿ ತೋಟಗಳು, ಹೈನುಗಾರಿಕೆ ನಡೆಯುತ್ತಿರುವ ಫಲವತ್ತಾದ ಭೂಮಿ ಇದೆ. ಈ ನೈಜ ವಿಚಾರವನ್ನು ಮುಖ್ಯಮಂತ್ರಿಗಳು ಪ್ರಧಾನಿ ಮೋದಿಯವರಿಗೆ ತಿಳಿಸಿದ್ದಾರೆಯೇ? ಅವರಿಬ್ಬರು ಒನ್ ಟು ಒನ್ ಮಾತನಾಡಿದ್ದಾರೆ, ಅಲ್ಲಿ ಏನು ಮಾತನಾಡಿದ್ದಾರೋ ಯಾರಿಗೆ ಗೊತ್ತು? ಇದು ಸಂಪೂರ್ಣವಾಗಿ ಹಣ ಮಾಡುವ ತಂತ್ರ ಎಂದು ಕಿಡಿಕಾರಿದರು.

ತಾವು ಈ ಹಿಂದೆ 5 ಟೌನ್‌ಶಿಪ್ ಮಾಡಲು ಮುಂದಾಗಿದ್ದಾಗ ಕಾಂಗ್ರೆಸ್ ನಾಯಕರು ನಡೆದುಕೊಂಡ ರೀತಿಯನ್ನು ಪ್ರಶ್ನಿಸಿದ ಎಚ್​​ಡಿಕೆ, ನಾನು ಮುಖ್ಯಮಂತ್ರಿಯಾಗಿದ್ದಾಗ ಟೌನ್‌ಶಿಪ್ ಯೋಜನೆ ತರಲು ಹೋದರೆ, ಇದೇ ನಾಯಕರು ಹೆಚ್ ಕೆ ಪಾಟೀಲ್ ಅಧ್ಯಕ್ಷತೆಯಲ್ಲಿ ಸಮಿತಿ ರಚಿಸಿ ಕುಮಾರಸ್ವಾಮಿ ದುಡ್ಡು ಹೊಡೆಯಲು ಈ ಯೋಜನೆ ಮಾಡುತ್ತಿದ್ದಾರೆ ಎಂದು ವಿರೋಧಿಸಿದ್ದರು. ಅವತ್ತು ವಿರೋಧಿಸಿದವರು ಇವತ್ತು ಮಾಡುತ್ತಿರುವುದೇಕೆ..? ಪ್ರಸ್ತುತ ಡಿ ಕೆ ಶಿವಕುಮಾರ್​ ಅವರು ಮುಖ್ಯಮಂತ್ರಿಯಾಗಿದ್ದಾರೆ ಎಂಬ ಉದ್ಧಟತನದಿಂದ ಏನು ಬೇಕಾದರೂ ಮಾಡಲು ಹೊರಟಿದ್ದಾರೆ. ಆದರೆ ರೈತರ ಹಿತ ಕಾಯುವುದು ಮುಖ್ಯ ಎಂದರು.

ರೈತರ ಪರವಾಗಿ ನಿಲ್ಲುವುದು ಜನಪ್ರತಿನಿಧಿಗಳ ಕರ್ತವ್ಯವಾಗಿದ್ದು, ಈ ವಿಷಯದಲ್ಲಿ ನಾನ್ಯಾಕೆ ರಾಜಕೀಯ ಮಾಡಲಿ?, ಈ ಯೋಜನೆಯ ವಿರುದ್ಧ ಕಾನೂನು ಚೌಕಟ್ಟಿನಲ್ಲಿ ಏನೆಲ್ಲಾ ಹೋರಾಟ ಮಾಡಬೇಕೋ ಅದನ್ನು ಮಾಡಿ, ಸಂತ್ರಸ್ತ ರೈತರಿಗೆ ನ್ಯಾಯ ಕೊಡಿಸಿಯೇ ತೀರುತ್ತೇವೆ ಎಂದು ಹೆಚ್ ಡಿ ಕುಮಾರಸ್ವಾಮಿ ಸ್ಪಷ್ಟಪಡಿಸಿದರು.