ಬೆಂಗಳೂರಿಗೆ ತಟ್ಟಿದ ಯುದ್ಧದ ಬಿಸಿ: ನಿಂಬೆ ಪಾನಕದ ಮೇಲೆ ಗ್ಯಾಸ್ ಕ್ರೈಸಿಸ್ ಚಾರ್ಜ್; ಜ್ಯೂಸ್​ ಮಾಡಲು ಗ್ಯಾಸ್​ ಬಳಸುತ್ತಾರಾ? ಎಂದ ನೆಟ್ಟಿಗರು| Viral Bill Bengaluru

ಬೆಂಗಳೂರು: ಪ್ರಸ್ತುತ ಮಧ್ಯಪ್ರಾಚ್ಯದಲ್ಲಿ ನಡೆಯುತ್ತಿರುವ ಯುದ್ಧದಿಂದ ಭಾರತದ ಹೋಟೆಲ್​ ಉದ್ಯಮಕ್ಕೆ ಏಟು ಬಿದ್ದಿರುವುದು ಸುಳ್ಳಲ್ಲ. ಆದರೆ ಇತ್ತೀಚೆಗೆ ಬೆಂಗಳೂರಿನ ಹೋಟೆಲ್‌ ಒಂದರ ಬಿಲ್​ (Viral Bill Bengaluru) ಮೇಲೆ ವಿಧಿಸಿರುವ ವಿಶೇಷ ತೆರಿಗೆಯನ್ನು ನೋಡಿದ ಜನ ದಂಗಾಗಿರುವುದು ಮಾತ್ರ ಸತ್ಯ.

ನಾವು ಹೋಟೆಲ್‌ಗೆ ಹೋದರೆ ಬಿಲ್‌ನಲ್ಲಿ ಜಿಎಸ್‌ಟಿ (GST) ಅಥವಾ ಸರ್ವಿಸ್ ಚಾರ್ಜ್ ನೋಡುವುದು ಸಾಮಾನ್ಯ. ಆದರೆ, ಬೆಂಗಳೂರಿನ ಕೆಫೆಯೊಂದರ ಬಿಲ್‌ನಲ್ಲಿ ಗ್ಯಾಸ್ ಕ್ರೈಸಿಸ್ ಚಾರ್ಜ್ (Gas Crisis Charge) ಎಂದು ನಮೂದಾಗಿದೆ. ಸದ್ಯ ಈ ಅಸಾಮಾನ್ಯ ಶುಲ್ಕವು ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ವಿಷಯವೆನೆಂದರೆ,  ನಗರದ ಜನಪ್ರಿಯ ಕೆಫೆಯಲ್ಲಿ ಗ್ರಾಹಕರೊಬ್ಬರು ಎರಡು ಪುದೀನಾ ನಿಂಬೆ ಪಾನಕವನ್ನು ಆರ್ಡರ್ ಮಾಡಿದ್ದರು. ಬಿಲ್ ಬಂದಾಗ ನೋಡಿದರೆ, ತಲಾ 179 ರೂಪಾಯಿ ಬೆಲೆಯ ಪಾನೀಯಗಳ ಮೇಲೆ ಶೇ. 5 ರಷ್ಟು ಗ್ಯಾಸ್ ಕ್ರೈಸಿಸ್ ಚಾರ್ಜ್ ಎಂದು 17.01 ರೂಪಾಯಿ ಹೆಚ್ಚುವರಿಯಾಗಿ ಸೇರಿಸಲಾಗಿತ್ತು.

ಕೆಲವು ಗ್ರಾಹಕರು ಈ ಶುಲ್ಕದ ಕಾನೂನುಬದ್ಧತೆಯನ್ನು ಪ್ರಶ್ನಿಸಿದ್ದಾರೆ. ಆದರೆ, ಅಚ್ಚರಿಯೆಂದರೆ ಕೆಲವರು ಕೆಫೆಯ ಪರವಾಗಿಯೂ ಮಾತನಾಡಿದ್ದಾರೆ. ಹೆಚ್ಚುತ್ತಿರುವ ಎಲ್‌ಪಿಜಿ ವೆಚ್ಚವನ್ನು ಸರಿದೂಗಿಸಲು ಕೆಫೆಗಳು ಕಷ್ಟಪಡುತ್ತಿವೆ. 17 ರೂಪಾಯಿ ದೊಡ್ಡ ವಿಷಯವಲ್ಲ, ಬದಲಿಗೆ ಬಿಲ್‌ನಲ್ಲಿ ರಿಯಾಯಿತಿಯೂ ಸಿಕ್ಕಿದೆ ಎಂದು ಕೆಲವರು ಕೆಫೆಯ ನಡೆಯನ್ನು ಸಮರ್ಥಿಸಿಕೊಂಡಿದ್ದಾರೆ.

ಈ ವಿವಾದದ ಹಿಂದೆ ದೊಡ್ಡದೊಂದು ಜಾಗತಿಕ ಸಮಸ್ಯೆಯಿದೆ. ಪ್ರಸ್ತುತ ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಯುದ್ಧದಿಂದಾಗಿ, ಭಾರತಕ್ಕೆ ಬರುವ ಎಲ್‌ಪಿಜಿ ಸಾಗಾಟದ ಪ್ರಮುಖ ಮಾರ್ಗವಾದ ಹಾರ್ಮುಜ್ ಜಲಸಂಧಿಯಲ್ಲಿ ಅಡೆತಡೆ ಉಂಟಾಗಿದೆ. ಭಾರತ ತನ್ನ ಇಂಧನ ಅಗತ್ಯಗಳಿಗಾಗಿ ಈ ಭಾಗವನ್ನು ಹೆಚ್ಚು ಅವಲಂಬಿಸಿರುವುದರಿಂದ, ಸರಬರಾಜಿನಲ್ಲಿ ವ್ಯತ್ಯಯವಾಗಿದೆ.

ಹೋಟೆಲ್ ಮತ್ತು ರೆಸ್ಟೋರೆಂಟ್ ಉದ್ಯಮಗಳಿಗೆ ಈ ಅನಿಲದ ಕೊರತೆ ದೊಡ್ಡ ತಲೆನೋವಾಗಿ ಪರಿಣಮಿಸಿದ್ದು, ವಾಣಿಜ್ಯ ಬಳಕೆಯ ಅನಿಲ ಸಿಲಿಂಡರ್‌ಗಳ ದರ ಏರಿಕೆಯಾಗಿರುವುದರಿಂದ, ಅದನ್ನು ಗ್ರಾಹಕರಿಂದಲೇ ವಸೂಲಿ ಮಾಡುವ ಅನಿವಾರ್ಯತೆಯಲ್ಲಿ ಕೆಫೆಗಳು ಸಿಲುಕಿವೆ ಎಂಬುದು ಉದ್ಯಮಿಗಳ ಮಾತು.

ಈ ಬಗ್ಗೆ ಆತಂಕಪಡುವ ಅಗತ್ಯವಿಲ್ಲ ಎಂದು ಕೇಂದ್ರ ಸರ್ಕಾರ ಈಗಾಗಲೇ ಅಭಯ ನೀಡಿದೆ. ದೇಶದಲ್ಲಿ ಎಲ್‌ಪಿಜಿ ಸಂಪೂರ್ಣ ಕೊರತೆಯಾಗಿಲ್ಲ ಮತ್ತು ದೇಶೀಯ ಗ್ರಾಹಕರಿಗೆ ನಿರಂತರ ಪೂರೈಕೆ ಇರಲಿದೆ ಎಂದು ತಿಳಿಸಿದೆ. ವಾಣಿಜ್ಯ ಮಾರಾಟವೂ ಭಾಗಶಃ ಪುನರಾರಂಭಗೊಂಡಿದೆ,(ಏಜನ್ಸೀಸ್​).