ಬೆಂಗ್ಳೂರು ಮಂದಿಯ ಪ್ರಾಮಾಣಿಕತೆ ಪರೀಕ್ಷಿಸಲು ಉದ್ಯಮಿಯಿಂದ 5 ವರ್ಷ ಹೆಲ್ಮೆಟ್ ಪ್ರಯೋಗ: ಕೊನೆಗೆ ಸಿಕ್ಕಿದ್ದು ಅಚ್ಚರಿ ಫಲಿತಾಂಶ! Helmets

Published on:

14 Aug 2026, 1:22 pm

ಪ್ರಮುಖ ಮುಖ್ಯಾಂಶಗಳು

ಬೆಂಗಳೂರು ಜನರ ಪ್ರಾಮಾಣಿಕತೆ ಪರೀಕ್ಷಿಸಲು ಐದು ವರ್ಷಗಳ ವಿಶಿಷ್ಟ ಪ್ರಯೋಗ!
ದ್ವಿಚಕ್ರ ವಾಹನದ ಹೆಲ್ಮೆಟ್ ಲಾಕ್ ಮಾಡದೆ ವಿನೂತನ ಪ್ರಯೋಗ ನಡೆಸಿದ ಉದ್ಯಮಿ
ಕಳೆದ ಐದು ವರ್ಷಗಳಿಂದ ಒಮ್ಮೆಯೂ ಕಳ್ಳತನವಾಗದ ಹೆಲ್ಮೆಟ್
ಬೆಂಗಳೂರು 'ಅಧಿಕ-ನಂಬಿಕೆಯ ನಗರ'ವೇ? ಸಾಮಾಜಿಕ ಜಾಲತಾಣದಲ್ಲಿ ಚರ್ಚೆ ಶುರು

Helmets : ಬೆಂಗಳೂರು ಮೂಲದ ಭಾರತಾಗ್ರಿ ಸಂಸ್ಥೆಯ ಸ್ಥಾಪಕ ಹಾಗೂ ಸಿಇಒ ಸಿದ್ಧಾರ್ಥ್ ಡಿಯಾಲನಿ ಅವರು ಸಿಲಿಕಾನ್ ಸಿಟಿ ನಿವಾಸಿಗಳ ಪ್ರಾಮಾಣಿಕತೆಯನ್ನು ಪರೀಕ್ಷಿಸಲು ಕಳೆದ ಐದು ವರ್ಷಗಳಿಂದ ತಮ್ಮ ಪತ್ನಿಯೊಂದಿಗೆ ನಡೆಸುತ್ತ ಬಂದಿರುವ ಅಪರೂಪದ ಪ್ರಯೋಗವೊಂದರ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿದ್ದಾರೆ. ಸದ್ಯ ಇದು ನೆಟ್ಟಿಗರ ಗಮನ ಸೆಳೆದು ಭಾರೀ ಚರ್ಚೆಗೆ ಗ್ರಾಸವಾಗಿದೆ.

ಈ ಸರಳ ಪ್ರಯೋಗದ ಪ್ರಕಾರ, ದಂಪತಿ ತಮ್ಮ ದ್ವಿಚಕ್ರ ವಾಹನವನ್ನು ನಗರದ ಯಾವುದೇ ಪ್ರದೇಶದಲ್ಲಿ ಪಾರ್ಕ್ ಮಾಡಿದರೂ ಹೆಲ್ಮೆಟ್ ಅನ್ನು ಲಾಕ್ ಮಾಡದೆ, ಕೇವಲ ಸೈಡ್ ಮಿರರ್ ಮೇಲೆ ಅಥವಾ ಸೀಟ್ ಮೇಲೆ ಹಾಗೆಯೇ ಬಿಟ್ಟು ಹೋಗುತ್ತಿದ್ದರು. ಬೆಂಗಳೂರು ನಗರವು 'ಅಧಿಕ-ನಂಬಿಕೆಯ ಸಮಾಜ' ಹೌದೋ ಅಲ್ಲವೋ ಎಂಬುದನ್ನು ಅರಿಯಲು ಇದೊಂದು ಉತ್ತಮ ಮಾರ್ಗ ಎಂದು ಭಾವಿಸಿದ್ದ ದಂಪತಿ, ಕಳೆದ ಐದು ವರ್ಷಗಳಲ್ಲಿ ತಮ್ಮ ಹೆಲ್ಮೆಟ್ ಒಮ್ಮೆಯೂ ಕಳ್ಳತನವಾಗಿಲ್ಲ ಎಂದು ಖುಷಿಯಿಂದಲೇ ತಿಳಿಸಿದ್ದಾರೆ.

ಒಂದು ವೇಳೆ ತಮ್ಮ ಹೆಲ್ಮೆಟ್ ಕಳ್ಳತನವಾದರೆ ಅಂತಹ ಸ್ಥಳಗಳಿಗೆ ಹೋಗುವುದನ್ನೇ ನಿಲ್ಲಿಸುತ್ತೇವೆಂದು ತಿಳಿಸಿರುವ ಉದ್ಯಮಿಯ ಪೋಸ್ಟ್, ಸೋಷಿಯಲ್ ಮೀಡಿಯಾದಲ್ಲಿ ಭಾರೀ ವೈರಲ್ ಆಗಿ ನೆಟ್ಟಿಗರ ಗಮನ ಸೆಳೆದು ವ್ಯಾಪಕ ಚರ್ಚೆಗೆ ಗ್ರಾಸವಾಗಿದೆ. ಕೆಲ ನೆಟ್ಟಿಗರು ಬೆಂಗಳೂರು ಜನರ ಪರ ಮಾತನಾಡಿದರೆ, ಇನ್ನು ಕೆಲವರು ಹೆಲ್ಮೆಟ್ ಯಾಕೆ ಕಳುವಾಗಿಲ್ಲ ಎಂಬುದನ್ನು ಕಾಮೆಂಟ್ಗಳ ಮೂಲಕ ವಿವರಿಸಿದ್ದಾರೆ.

ಇದನ್ನೂ ಓದಿ: 500 ರೂ. ಬೆಲೆಯ ಪಾತ್ರೆ ಕೇವಲ 100 ರೂ.ಗೆ ಮಾರಾಟ: ಕಡಿಮೆ ಅಂತ ಖರೀದಿಸಿದ್ರೆ ಕ್ಯಾನ್ಸರ್ ಬರುತ್ತೆ ಎಚ್ಚರ..! Aluminum Utensils

ಇನ್ನೂ ಈ ಪ್ರಯೋಗದ ಕುರಿತು ಪ್ರತಿಕ್ರಿಯಿಸಿರುವ ಕೆಲ ಬಳಕೆದಾರರು ಬೆಂಗಳೂರು ನಿಜಕ್ಕೂ ಸುರಕ್ಷಿತ ಮತ್ತು ಅಧಿಕ ನಂಬಿಕೆಯುಳ್ಳ ನಗರ ಎಂದು ಒಪ್ಪಿಕೊಂಡರೆ, ಇನ್ನು ಕೆಲವರು ಬಡ ಅಥವಾ ಜನಸಂದಣಿ ಹೆಚ್ಚಿರುವ ಪ್ರದೇಶಗಳಲ್ಲಿ ದುಬಾರಿ ಹೆಲ್ಮೆಟ್‌ಗಳು ನಾಪತ್ತೆಯಾಗಬಹುದು ಎಂದು ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಆದಾಯದ ಅಂತರ ಹಾಗೂ ಜೀವನ ಮಟ್ಟದ ಅಂತರ ಕಡಿಮೆ ಇರುವುದರಿಂದ ಇಲ್ಲಿ ಜನರಿಗೆ ಕಳವು ಮಾಡುವ ಪ್ರಚೋದನೆ ಕಡಿಮೆ ಇರಬಹುದು ಎಂದು ಮತ್ತೊಬ್ಬ ಬಳಕೆದಾರರು ವಿಶ್ಲೇಷಿಸಿದ್ದು, ಒಟ್ಟಾರೆಯಾಗಿ ಈ ಪ್ರಯೋಗ ಬೆಂಗಳೂರಿನ ಸುರಕ್ಷತೆ ಮತ್ತು ಪ್ರಾಮಾಣಿಕತೆಯ ಬಗ್ಗೆ ಆಸಕ್ತಿದಾಯಕ ಚರ್ಚೆಗೆ ದಾರಿ ಮಾಡಿಕೊಟ್ಟಿದೆ, (ಏಜೆನ್ಸೀಸ್).

Experiment