ಸಕಲರಿಗೂ ಲೇಸು ಬಯಸುವ ಬಸವ ಧರ್ಮ

ಇವ ನಮ್ಮವ ಎನ್ನುವ ಶರಣತತ್ತ್ವ ವಿಶ್ವ ಸಂದೇಶವಾಗಲಿ. ವಿಶ್ವಗುರು ಬಸವಣ್ಣನವರು ಪ್ರತಿಪಾದಿಸಿದ ಇವನಮ್ಮವ ಎನ್ನುವ ವಿಶ್ವಭ್ರಾತೃತ್ವ ನಾವೆಲ್ಲ ಅಳವಡಿಸಿಕೊಳ್ಳಬೇಕಿದೆ ಎಂದು ಶೇಗುಣಿಸಿಯ ಡಾ.ಮಹಾಂತಪ್ರಭು ಸ್ವಾಮೀಜಿ ಹೇಳಿದರು.

ಆಸ್ಟ್ರೇಲಿಯಾ ದೇಶದ ಸಿಡ್ನಿ ನಗರದಲ್ಲಿ ಬುಧವಾರ ಹಮ್ಮಿಕೊಂಡಿದ್ದ ಬಸವಜಯಂತಿ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಅವರು, ಬಸವಾದಿ ಶಿವಶರಣರು ಆಚರಿಸಿದ ಶಿವಯೋಗ, ಕಾಯಕ, ದಾಸೋಹ, ಪ್ರಜಾಪ್ರಭುತ್ವ ಮತ್ತು ಸಮಾನತೆ ಅರಿತಾಗ ವಿಶ್ವ ಸಾಮರಸ್ಯದಿಂದ ಕೂಡಿದ ಕರ್ತಾರನ ಕಮ್ಮಟವಾಗುತ್ತದೆ. 21ನೇ ಶತಮಾನ ಯುದ್ಧದ ಶತಮಾನವಾಗಬಾರದು. ದಯವೇ ಧರ್ಮದ ಮೂಲ ಆಶಯವಾಗಬೇಕು. ಸಕಲ ಜೀವಾತ್ಮರಿಗೂ ಲೇಸನ್ನೇ ಬಯಸಬೇಕು. ಸರ್ವರೂ ಸಮಾನರು ಎನ್ನುವ ತತ್ತ್ವ ಅಳವಡಿಸಿಕೊಂಡಾಗ ನಾವೆಲ್ಲ ಪ್ರಜ್ಞಾವಂತರಾಗುತ್ತೇವೆ ಎಂದರು.

ಕರ್ಮಭೂಮಿ ಆಸ್ಟ್ರೇಲಿಯಾದಲ್ಲಿ ಇ್ಲದ್ದುಕೊಂಡು ಜನ್ಮಭೂಮಿಯ ಬಸವಣ್ಣನವರ ಸಿದ್ಧಾಂತ ಅನುಸರಿಸುತ್ತಿರುವ ಅನಿವಾಸಿ ಭಾರತೀಯರ ಅಭಿಮಾನವನ್ನು ಶ್ಲಾಘಿಸಿದರು.

ನಾಗರಾಜ ನಾವಲಗಟ್ಟಿ, ರತ್ನಾ ಹೇಮಂತ, ರೂಪಾ ಹೆಬ್ಬಂಡಿ, ಷಡಕ್ಷರಿ ಅಡವಯ್ಯನಮಠ, ವಿಶುಕುಮಾರ ಲೋಕಪಾಲ ಅವರ ಸಹಕಾರದಿಂದ ವಿವಿಧ ನಗರಗಳಾದ ಮೇಲ್ಬೊರ್ನ್, ಸಿಡ್ನಿ, ಬ್ರಿಸ್ಟೇನ್, ಆಕ್ಲೆಂಡ್, ಅಡಿಲೇಡ್ ಸೇರಿದಂತೆ ಮುಂತಾದ ಮಹಾನಗರಗಳಲ್ಲಿ ವಿಶ್ವಗುರು ಬಸವಣ್ಣನವರ ಜಯಂತಿ ಕಾರ್ಯಕ್ರಮ ಆಚರಿಸಲಾಯಿತು. ಜಯಂತಿ ನಿಮಿತ್ತ ವಚನ ಪಠಣ, ವಚನ ಪ್ರಾರ್ಥನೆ, ವಚನ ನೃತ್ಯ ಜರುಗಿತು.