ಇ-ಸ್ವತ್ತು ತಂತ್ರಾಂಶಕ್ಕೆ ಬಾಲಗ್ರಹ

ಬೆಂಗಳೂರು: ಸೈಟು, ಮನೆ, ಕಟ್ಟಡ, ವಿಲ್ಲಾ ಸೇರಿದಂತೆ ಕೃಷಿಯೇತರ ಸ್ಥಿರಾಸ್ತಿಗಳಿಗೆ ಇ-ಖಾತಾ (ಡಿಜಿಟಲ್ ಖಾತಾ, digital khata ) ಪಡೆಯಲು ಪರದಾಡುತ್ತಿರುವ ರಾಜ್ಯದ ಜನತೆಗೆ ಇನ್ನೂ ಪರಿಹಾರ ಸಿಕ್ಕಿಲ್ಲ. ಸ್ಥಳೀಯ ಸಂಸ್ಥೆಗಳ ಆಸ್ತಿಗೆ ಇ-ಖಾತಾ ನೀಡುವ ಇ-ಆಸ್ತಿಯ ತಾಂತ್ರಿಕ ಸಮಸ್ಯೆ ಬಗೆಹರಿಸುವ ಯತ್ನ ಅಧಿಕಾರಿಗಳಿಂದ ನಡೆಯುತ್ತಿಲ್ಲ ಎಂಬ ಆರೋಪ ಒಂದೆಡೆ ಆದರೆ, ಗ್ರಾ.ಪಂ ವ್ಯಾಪ್ತಿಯ ಆಸ್ತಿಗಳಿಗೆ ಡಿಜಿಟಲ್ ಖಾತಾ ನೀಡುವ ಇ-ಸ್ವತ್ತು 2.0 ತಂತ್ರಾಂಶಕ್ಕೆ ಸಿಎಂ ಸಿದ್ದರಾಮಯ್ಯ ಅವರೇ ಚಾಲನೆ ಕೊಟ್ಟು ತಿಂಗಳೇ ಕಳೆದರೂ ಸ್‌ಟಾವೇರ್ ಸಿದ್ಧವಾಗಿಲ್ಲ. ಈ ನೆಪ ಹೇಳಿಕೊಂಡೇ ಪಂಚಾಯಿತಿಗಳಲ್ಲಿ ಇಂದು-ನಾಳೆ ಎಂದು ಕಾಲ ಮುಂದೂಡುತ್ತಿರುವುದು ಜನರನ್ನು ಸಂಕಷ್ಟಕ್ಕೆ ಸಿಲುಕಿಸಿದೆ.

ಗ್ರಾಮೀಣಾಭಿವೃದ್ಧಿ ಮತ್ತು ಪಂಚಾಯತ್‌ರಾಜ್ ಇಲಾಖೆ ಕರ್ನಾಟಕ ಗ್ರಾಮ ಸ್ವರಾಜ್ ಮತ್ತು ಪಂಚಾಯತ್ ರಾಜ್ (ಗ್ರಾಮ ಪಂಚಾಯಿತಿಗಳ ತೆರಿಗೆ, ದರ ಮತ್ತು ಶುಲ್ಕಗಳು) ನಿಯಮ, 2025 ಅಧಿಸೂಚನೆ ಹೊರಡಿಸಿದೆ. ಹಳೆಯ ಇ-ಸ್ವತ್ತು (eswathu) ತಂತ್ರಾಂಶವನ್ನು ನಾಗರಿಕ ಸ್ನೇಹಿಯಾಗಿ ಮಾರ್ಪಡಿಸಿ ಇ-ಸ್ವತ್ತು 2.0ಕ್ಕೆ ಅಪ್‌ಗ್ರೇಡ್ ಮಾಡಲಾಗಿದೆ. ಇದಕ್ಕೆ ಡಿ.1ರಂದು ಸಿದ್ದರಾಮಯ್ಯ ಚಾಲನೆ ನೀಡಿದ್ದರು. ಆದರೆ ಹೊಸ ಸ್‌ಟಾವೇರ್ ಈವರೆಗೂ ಗ್ರಾಮ ಪಂಚಾಯಿತಿ ಕಚೇರಿ ತಲುಪದಿರುವುದು ವಾಸ್ತವ.

ಇ-ಸ್ವತ್ತು 1.0ರಲ್ಲಿ ತಾಲೂಕು ಪಂಚಾಯಿತಿ ಕಾರ್ಯನಿರ್ವಾಹಕ ಅಧಿಕಾರಿ (ಇಒ) ಮತ್ತು ಗ್ರಾಮ ಪಂಚಾಯಿತಿ ಅಧಿಕಾರಿ (ಪಿಡಿಒ), ಕಾರ್ಯದರ್ಶಿ ಸಹಿ ಅಥವಾ ಎ್ಡಿಎ/ಎಸ್‌ಡಿಎ ಸಹಿ ಇತ್ತು. ಇದೀಗ ಇ-ಸ್ವತ್ತು 2.0 ತಂತ್ರಾಂಶಕ್ಕೆ ಗ್ರಾಮ ಪಂಚಾಯಿತಿ ಅಧ್ಯಕ್ಷರ ಸಹಿ ಸೇರಿಸಲಾಗಿದೆ. ಆದರೆ, ಆಸ್ತಿಗಳಿಗೆ ತೆರಿಗೆ ವಿಧಿಸುವುದು, ಆನ್‌ಲೈನ್‌ನಲ್ಲಿ ರಸೀದಿ ಸೃಜನೆಯಲ್ಲೂ ತಾಂತ್ರಿಕ ಸಮಸ್ಯೆ ಆಗಿರುವುದು ತಲೆನೋವಾಗಿದೆ. ಹಳೇ ಇ-ಸ್ವತ್ತು ಆಸ್ತಿಗಳಿಗೆ ಮತ್ತು ಪ್ರಸ್ತುತ ರೆವಿನ್ಯೂ ಸೈಟ್‌ಗಳಿಗೆ ನೀಡಲಾಗುವ ಹೊಸ ಆಸ್ತಿಗೆ ಆನ್‌ಲೈನ್‌ನಲ್ಲಿಯೇ ತೆರಿಗೆ ಜನರೇಟ್ ಆಗುತ್ತಿಲ್ಲ. ಅರ್ಜಿಗಳ ವಿಲೇವಾರಿ ಮಾಡಲು ಗ್ರಾಮ ಪಂಚಾಯಿತಿ ಅಧಿಕಾರಿಗಳಿಗೆ ಅವಕಾಶ ಕಲ್ಪಿಸಿಲ್ಲ.

ಮತ್ತೊಂದೆಡೆ ಗ್ರಾಮ ಪಂಚಾಯಿತಿ ವ್ಯಾಪ್ತಿಯ ಕೃಷಿಯೇತರ ಆಸ್ತಿಗಳು ಮತ್ತು ರೆವಿನ್ಯೂ ಸೈಟ್‌ಗಳಿಗೆ ಇ-ಸ್ವತ್ತು ತಂತ್ರಾಂಶದಲ್ಲಿ ಇ-ಖಾತಾ ನೀಡಲಾಗುತ್ತದೆ ಎಂದು ಸರ್ಕಾರ ೋಷಿಸಿತ್ತು. ಇದರ ಪರಿಣಾಮ ಪಂಚಾಯಿತಿ ಕಚೇರಿಗೆ ಜನರು ಸಾಲುಗಟ್ಟಿ ನಿಲ್ಲುತ್ತಿದ್ದಾರೆ. ಆದರೆ, ಅಧಿಕಾರಿಗಳ ಸಬೂಬು ಉತ್ತರಗಳನ್ನು ಕೇಳಿಕೊಂಡು ಜನರು ನಿರಾಸೆಯಿಂದ ವಾಪಸ್ ಆಗುತ್ತಿದ್ದಾರೆ.

ಇ-ಸ್ವತ್ತು ತಂತ್ರಾಂಶ ಬಳಕೆಗೆ ಸಂಬಂಧಿಸಿದಂತೆ ಸಾರ್ವಜನಿಕರ ಸಹಾಯಕ್ಕಾಗಿ ಇಲಾಖೆಯಿಂದ ಹೆಲ್ಪ್‌ಲೈನ್ ಆರಂಭಿಸಲಾಗಿದೆ. ಅರ್ಜಿ ಸಲ್ಲಿಸುವಾಗ ಎದುರಾಗುವ ಸಮಸ್ಯೆಗಳ ಪರಿಹಾರಕ್ಕಾಗಿ ದಿನಕ್ಕೆ 3-4 ಸಾವಿರ ಕರೆಗಳು ಬರುತ್ತಿವೆ. ಹೆಚ್ಚಿನ ಪ್ರಶ್ನೆಗಳು ಅರ್ಜಿ ಸಲ್ಲಿಸುವ ಪ್ರಕ್ರಿಯೆ, ಅನುಮೋದನೆ ಪ್ರಕ್ರಿಯೆ, ಆಸ್ತಿ ವರ್ಗೀಕರಣ ಆಯ್ಕೆ ವಿಧಾನ, ಇ-ಸ್ವತ್ತು ನಮೂನೆ ವಿತರಿಸಲು ನಿಗದಿಯಾಗಿರುವ ಕಾಲಾವಧಿ ಸೇರಿದಂತೆ ತಾಂತ್ರಿಕ ಸಮಸ್ಯೆಗಳಿಗೆ ಸಂಬಂಧಿಸಿದ್ದಾಗಿವೆ.

ಗ್ರೇಟರ್ ಬೆಂಗಳೂರು ಪ್ರಾಧಿಕಾರ (ಜಿಬಿಎ) ವ್ಯಾಪ್ತಿಯ ಆಸ್ತಿಗಳಿಗೆ ಇ-ಖಾತಾ ನೀಡಲು ಅಭಿವೃದ್ಧಿ ಪಡಿಸಿರುವ ಇ-ಆಸ್ತಿ ತಂತ್ರಾಂಶ ದೋಷಗಳ ಕಣಜವಾಗಿದೆ. ಇ-ಖಾತಾ ವಿತರಣೆ ಮಾಡಲು ಶುರು ಮಾಡಿ ವರ್ಷಗಳೇ ಕಳೆದರೂ ಅಧಿಕಾರಿಗಳು ಮಾತ್ರ ಸಮಸ್ಯೆ ಬಗೆಹರಿಸಲು ಆಸಕ್ತಿ ತೋರಿಸಿಲ್ಲ. ಮುಖ್ಯವಾಗಿ ಆಸ್ತಿಗಳ ವಿಭಜನೆ ಖಾತಾ, ಪೌತಿ ಖಾತಾ, ಉಂಡೆ ಖಾತಾ ಆಸ್ತಿಯನ್ನು ಬೇರ್ಪಡಿಸಿ ಖಾತಾ ವಿತರಣೆ, ಪಿತ್ರಾರ್ಜಿತ ಆಸ್ತಿ ವರ್ಗಾವಣೆಗೆ ಸಾಧ್ಯವಾಗುತ್ತಿಲ್ಲ.

ಜತೆಗೆ ಇ-ಖಾತಾ ಡ್ರ್‌ಟಾನಲ್ಲಿ ಮತ್ತು ಇ-ಖಾತಾದಲ್ಲಿ ಕಂಡುಬರುತ್ತಿರುವ ದೋಷಗಳ ತಿದ್ದುಪಡಿಗೆ ಅವಕಾಶವೇ ಕೊಟ್ಟಿಲ್ಲ. ಇದರಿಂದ ಲಕ್ಷಾಂತರ ಆಸ್ತಿ ಮಾಲೀಕರು ಇ-ಖಾತಾ ಸಿಗದೆ ಮನೆ ನಿರ್ಮಾಣ, ಆಸ್ತಿ ಮಾರಾಟ, ವರ್ಗಾವಣೆ, ವಿಲ್, ದಾನ ಪತ್ರ ಮಾಡಿಸಲು ಸಾಧ್ಯವಾಗದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ.