ಕಲಬೆರಕೆ ಬಿಟ್ಟು ಸ್ಥಳಿಯ ಪದಾರ್ಥ ಖರೀದಿಸಿ

ಮಾದನಹಿಪ್ಪರಗಿ: ಇಂದು ಶುದ್ಧ ಗಾಳಿ, ನೀರು ಹಾಗೂ ಆಹಾರ ಮರೀಚಿಕೆಯಾಗಿದೆ. ಪ್ರತಿಯೊಂದರಲ್ಲೂ ಕಲಬೆರಕೆ ಹೆಚ್ಚಿರುವ ಇಂದಿನ ದಿನಗಳಲ್ಲಿ ಹಳ್ಳಿಗಳಲ್ಲಿ ನಡೆಯುವ ವಿನಿಮಯ ಸಂತೆ ಸ್ವಾವಲಂಬಿ ಬದುಕಿಗೆ ದಾರಿದೀಪವಾಗಿದೆ ಎಂದು ನಂದಗಾಂವ್​ ವಿರಕ್ತ ಮಠದ ಶ್ರೀ ಡಾ.ರಾಜಶೇಖರ ಸ್ವಾಮೀಜಿ ಅಭಿಪ್ರಾಯಪಟ್ಡರು.

ನಿಂಗದಳ್ಳಿಯ ಜೈ ಹನುಮಾನ ಮಂದಿರ ಆವರಣದಲ್ಲಿ ಸೋಮವಾರ ವಾರದ ಸಂತೆಯನ್ನು ಉದ್ಘಾಟಿಸಿ ಮಾತನಾಡಿದ ಅವರು, ನಾವು ಸೇವಿಸುವ ಆಹಾರ ಪರಿಶುದ್ಧವಾಗಿರದೆ ಕಲಬೆರಕೆಯಿಂದ ಕೂಡಿದೆ. ಅಡುಗೆಗೆ ಬಳಸುವ ವಿವಿಧ ಕಂಪನಿಗಳ ಎಣ್ಣೆಗಳು ಸುಟ್ಟ ತೈಲದಿಂದ ತಯ್ಯಾರಿಸಲಾಗಿದೆ. ಶುದ್ಧವಾದ ಒಂದು ಕೆಜಿ ಶೇಂಗಾ ಎಣ್ಣೆ ತಯಾರಿಸಲು 3 ಕೆಜಿ ಶೇಂಗಾ ಬೇಕು. ಇದಕ್ಕೆ ಸುಮಾರು 450 ರೂ. ರ್ಖಚಾಗುತ್ತದೆ. ಆದರೆ ಹಲವು ಕಂಪನಿಗಳು ಕಲಬೆರಕೆ ಮಾಡಿ ನಮಗೆ 190 ರೂ.ಗೆ 1 ಕೆಜಿ ಶೇಂಗಾ ಎಣ್ಣೆ ಕೊಡುತ್ತಿದ್ದಾರೆ ಎಂದು ಹೇಳಿದರು.

ನಮ್ಮ ಪೂರ್ವಜರು ಮಾಡುತ್ತಿದ್ದ ವ್ಯವಸಾಯ ಪದ್ಧತಿ ನಾವೆಲ್ಲರೂ ಅಳವಡಿಸಿಕೊಳ್ಳಬೇಕು. ತಿಪ್ಪೆ ಗೊಬ್ಬರ ಹಾಕಿ ಬೆಳೆದ ಬೆಳೆಗಳನ್ನು ನಮ್ಮ ಹಳ್ಳಿಗಳಲ್ಲಿಯೇ ಮಾರಾಟ ಮಾಡಿದರೆ ಮುಂದಿನ ಪೀಳಿಗೆ ಸದೃಢವಾಗಿರಲಿದೆ. ಪ್ರತಿ ಶನಿವಾರ ವಾರದ ಸಂತೆ ನಡೆಯುತ್ತದೆ. ಪ್ರತಿಯೊಬ್ಬರೂ ಸ್ಥಳಿಯ ಆಹಾರ ಪದಾರ್ಥ ಖರೀದಿ ಮಾಡಿ ರೈತರಿಗೆ ಸಾಥ್​ ನೀಡಬೇಕು ಎಂದು ಕರೆ ನೀಡಿದರು.

ಕಲಬುರಗಿ-ಯಾದಗಿರಿ ಡಿಸಿಸಿ ಬ್ಯಾಂಕ್​ ನಿರ್ದೇಶಕ ಅಶೋಕ ಸಾವಳೇಶ್ವರ ಮಾತನಾಡಿ, ರೈತರು ಪೋಷಕಾಂಶ ಹೆಚ್ಚಿರುವ ಸಜ್ಜೆ, ನವಣೆ, ಸಾಮೆ, ಕೊರಲೆ ಬೆಳೆಗಳನ್ನು ಹೆಚ್ಚಾಗಿ ಬೆಳೆಯಬೇಕು. ಸೂರ್ಯಕಾಂತಿ, ಕುಸಬಿ, ಪುಂಡಿ ಬೆಳೆಗಳನ್ನು ಬೆಳೆದರೆ ಅದರಿಂದ ಅಡುಗೆ ಎಣ್ಣೆ ತಯಾರಿಸಬಹುದು ಎಂದರು.

ಮಾದನಹಿಪ್ಪರಗಿಯ ಶ್ರೀ ಅಭಿನವ ಶಿವಲಿಂಗ ಸ್ವಾಮೀಜಿ, ಜಿಲ್ಲಾ ಪಂಚಾಯಿತಿ ಮಾಜಿ ಸದಸ್ಯ ಮಲ್ಲಿನಾಥ ಪಾಟೀಲ್​ ಮದಗುಣಕಿ ಮಾತನಾಡಿದರು. ಜಿಪಂ ಮಾಜಿ ಸದಸ್ಯ ಗುರುಶಾಂತಪ್ಪ ಪಾಟೀಲ್​, ಆಳಂದ ಎಪಿಎಂಸಿ ಅಧ್ಯಕ್ಷ ಶರಣಬಸಪ್ಪ ಭೂಸನೂರ, ಪ್ರಮುಖರಾದ ರಾಜಶೇಖರ ಎಸ್​.ಕಂಬಾರ, ಚಂದ್ರಕಾಂತ ಕಡಗಂಚಿ, ಮಲ್ಲಿನಾಥ ಸಗುಮಳೆ, ಬಸವರಾಜ ಪಾಟೀಲ್​, ಅಮೃತರಾವ ಪಾಟೀಲ್​, ಶರಣಬಸಪ್ಪ ಪಾಟೀಲ್​, ಕಲ್ಯಾಣಿ ಲೋಹಾರ, ಬಸವರಾಜ ನಿಂಬಾಳ, ಅಮೃತ ಟೊಣ್ಣೆ ಇದ್ದರು.

ಶಿವಶರಣಯ್ಯ ಸ್ವಾಮಿ, ಸಿದ್ದರಾಮ ಕಿರನಳ್ಳಿ ಸಂಗೀತ ಸೇವೆ ಸಲ್ಲಿಸಿದರು.