ಸಮಗ್ರ ವ್ಯಕ್ತಿತ್ವ ವಿಕಸನಕ್ಕೆ ಕಲೆ ಅಗತ್ಯ

ಕಲಬುರಗಿ: ಕಲೆ ಎಂಬುದು ಮಾನವನ ಅಭಿವ್ಯಕ್ತಿಗಿರುವ ಉತ್ತಮ ಸಾಧನ. ಕಲೆಯ ಮೂಲಕ ಮನಸ್ಸಿನ ತುಡಿತ ಸಮಾಜಕ್ಕೆ ತಲುಪಿಸಬಹುದಾಗಿದೆ. ಕಲೆ ಮನುಷ್ಯನ ಬದುಕಿಗೆ ಪೂರಕವಾಗುವುದರ ಜತೆಗೆ ಸಮಗ್ರ ವ್ಯಕ್ತಿತ್ವ ವಿಕಸನಕ್ಕೆ ಅಗತ್ಯ ಎಂದು ಹಿರಿಯ ಸಾಹಿತಿ ಡಾ.ನಾಗೇಂದ್ರ ಮಸೂತಿ ಹೇಳಿದರು.

ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್​ ಹಾಗೂ ಕ್ರಿಯಾಶೀಲ ಗೆಳೆಯರ ಬಳಗದ ವತಿಯಿಂದ ನಗರದ ಕನ್ನಡ ಭವನದ ಕಲಾ ಸೌಧದಲ್ಲಿ 47 ಜನರ ಚಿತ್ರಕಲಾವಿದರಿಂದ ಎರಡು ದಿನಗಳ ಕಾಲ ಏರ್ಪಡಿಸಿರುವ ಚಿತ್ರಕಲಾ ಪ್ರದರ್ಶನಕ್ಕೆ ಮಂಗಳವಾರ ಚಾಲನೆ ನೀಡಿ ಮಾತನಾಡಿದರು. 

ಚಿತ್ರಕಲಾ ಪ್ರದರ್ಶನಗಳಿಗೆ ಇನ್ನಷ್ಟು ಅವಕಾಶಗಳು ದೊರಕಬೇಕಿದೆ. ಆಗ ಮತ್ತಷ್ಟೂ ಕಲಾವಿದರು ಬೆಳಕಿಗೆ ಬರಲು ಸಾಧ್ಯ. ಚಿತ್ರಕಲೆ ಮನುಷ್ಯನ ಕಲ್ಪನೆ ವಿಸ್ತರಿಸುತ್ತದೆ. ಪರಿಷತ್​ ವತಿಯಿಂದ ಇಂಥ ಸಾವಿರಾರು ಕಾರ್ಯಕ್ರಮಗಳು ಆಯೋಜಿಸುವ ಮೂಲಕ ತೇಗಲತಿಪ್ಪಿ ಸಮಾಜ ಕಂಡ ಅದ್ಭುತ ಸಂಟಕ ಎನಿಸಿಕೊಂಡಿದ್ದಾರೆ ಎಂದು ಬಣ್ಣಿಸಿದರು.

ಕನ್ನಡ ಸಾಹಿತ್ಯ ಪರಿಷತ್​ ಜಿಲ್ಲಾಧ್ಯಕ್ಷ ವಿಜಯಕುಮಾರ ಪಾಟೀಲ ತೇಗಲತಿಪ್ಪಿ ಮಾತನಾಡಿ, ಚಿತ್ರಕಲಾ ಪ್ರದರ್ಶನಗಳು ಈ ಸಮಾಜದ ನಿಜವಾದ ಕನ್ನಡಿ. ಸಮಾಜದ ಆಲೋಚನಾ ಲಹರಿ ಬದಲಾಯಿಸುವ, ಸಾಂಸತಿಕ ಮೌಲ್ಯ ಬಿಂಬಿಸುವ ಮತ್ತು ನಾಡಿನ ಜನರಲ್ಲಿ ಸೃಜನಶೀಲತೆ ಜಾಗೃತಗೊಳಿಸುವ ಪ್ರಬಲ ಮಾಧ್ಯಮವಾಗಿದ್ದು, ಈ ನಿಟ್ಟಿನಲ್ಲಿ ಕನ್ನಡ ಸಾಹಿತ್ಯ ಪರಿಷತ್​ ಕವಿ&ಕಲಾವಿದರಿಗೆ ಪ್ರೋತ್ಸಾಹಿಸುವ ಕಾರ್ಯ ನಿರಂತರವಾಗಿ ಮಾಡುತ್ತಿದೆ ಎಂದರು.

ಕನ್ನಡ ಭೂಮಿ ಜಾಗೃತಿ ಸಮಿತಿ ಅಧ್ಯಕ್ಷ ಡಾ.ಲಿಂಗರಾಜ ಸಿರಗಾಪೂರ ಮಾತನಾಡಿ, ಚಿತ್ರಕಲಾವಿದರು ರಚಿಸುವ ಕಲಾಕೃತಿಗಳು ಪ್ರಕೃತಿಯ ಸೌಂದರ್ಯ ಜೀವಂತವಾಗಿರಿಸುವದರ ಜತೆಗೆ, ಮುಂದಿನ ಪೀಳಿಗೆಗೆ ನಮ್ಮ ಸಂಸತಿ ಪರಿಚಯಿಸುವ ಕಾರ್ಯವನ್ನೂ ಮಾಡುತ್ತದೆ ಎಂದು ಹೇಳಿದರು.

ನ್ಯಾಯವಾದಿ ಹುಲಿಗೆಪ್ಪಾ ಕನಕಗಿರಿ, ಜಿಲ್ಲಾ ಫೋಟೋಗ್ರಾಫರ್ಸ್​ ಅಸೋಸಿಯಷನ್​ ಅಧ್ಯಕ್ಷ ಬಸವರಾಜ ತೋಟದ, ಕಲಾ ಸೌಧ ಸಂಚಾಲಕ ಡಾ.ರೆಹಮಾನ್​ ಪಟೇಲ್​, ರವಿಕುಮಾರ ಶಹಾಪುರಕರ್​ ಮಾತನಾಡಿದರು. ಪ್ರಮುಖರಾದ ಸೈಯ್ಯದ್​ ನಜಿರುದ್ದಿನ್​ ಮುತ್ತವಲ್ಲಿ, ಧರ್ಮರಾಜ ಜವಳಿ, ಗಣೇಶ ಚಿನ್ನಾಕಾರ, ರಾಜೇಂದ್ರ ಮಾಡಬೂಳ, ಮಹ್ಮದ್​ ಅಯಾಜದ್ದಿನ್​ ಪಟೇಲ್​, ಬಸವರಾಜ ಉಪ್ಪಿನ್​, ರಾಜಶೇಖರ ಶಾಮಣ್ಣ, ಡಾ.ಎಸ್​.ಎಂ.ನೀಲಾ, ಜ್ಯೋತಿ ಕೋಟನೂರ್​, ಶ್ವೇತಾ ಪಾಟೀಲ್​, ಅಮೃತಪ್ಪ ಅಣೂರ  ಸೇರಿ ಅನೇಕರು ಭಾಗವಹಿಸಿದ್ದರು.

ಜಿಲ್ಲೆಯ ವಿವಿಧ ಭಾಗಗಳಿಂದ ಆಗಮಿಸಿರುವ 47 ಜನ ಕಲಾವಿದರ ಚಿತ್ರಗಳು ಪ್ರದರ್ಶನಗೊಂಡಿವೆ. ಅವರ ಪ್ರತಿಯೊಂದು ಚಿತ್ರಗಳು ಭಿನ್ನ, ವಿಭಿನ್ನವಾಗಿದ್ದು, ಕಲಾ ಶ್ರೀಮಂತಿಕೆ ತೆರೆದಿಟ್ಟಿವೆ. 

"

ಚಿತ್ರಕಲಾವಿದರು ಸಮಾಜದ ಜೀವನಾಡಿಯಾಗಿದ್ದಾರೆ. ಅವರ ಕಲೆಗೆ ಕೇವಲ ಬಣ್ಣದ ಸ್ಪರ್ಶ ಮಾತ್ರವಲ್ಲ, ಅದರಲ್ಲಿ ವಿಶಾಲ ಹೃದಯವಂತಿಕೆ, ಇಂದಿನ ಸಮಾಜದ ನೋವಿಗೆ ಸ್ಪಂದಿಸುವ ಧ್ವನಿ ಇರುತ್ತದೆ. ಈ ಸಮಾಜದಲ್ಲಿ ಅಂಕು ಡೊಂಕು ತಿದ್ದುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ. ಪರಿಷತ್​ನಿಂದ ಈ ಭಾಗದ ಅನೇಕ ಕಲಾವಿದರಿಗೆ ಪ್ರೋತ್ಸಾಹ ದೊರೆಯುತ್ತಿದೆ.

— ಡಾ.ರೆಹಮಾನ್​ ಪಟೇಲ್​ ಸಂಚಾಲಕ, ಕಲಾ ಸೌಧ ಕಲಬುರಗಿ.