ರಾಜ್ಯ

5ರಂದು ಅಂಬೇಡ್ಕರ್​ ಪುತ್ಥಳಿ ಅನಾವರಣ / HOSAKOTE

ಹೊಸಕೋಟೆಯ ತಾಲೂಕು ಕಚೇರಿಯಲ್ಲಿ ಹಮ್ಮಿಕೊಂಡಿದ್ದ ಸಭೆಯಲ್ಲಿ ಶಾಸಕ ಶರತ್​ ಬಚ್ಚೇಗೌಡ, ತಹಸೀಲ್ದಾರ್​ ಶೀತಲ್​, ತಾಪಂ ಇಒ ಮುನಿಯಪ್ಪ, ಡಿವೈಎಸ್​ಪಿ ಮಲ್ಲೇಶ್​, ನಗರಸಭೆ ಆಯುಕ್ತ ನೀಲಾಲೋಚನ ಪ್ರಭು ಇದ್ದರು.
ಹೊಸಕೋಟೆಯ ತಾಲೂಕು ಕಚೇರಿಯಲ್ಲಿ ಹಮ್ಮಿಕೊಂಡಿದ್ದ ಸಭೆಯಲ್ಲಿ ಶಾಸಕ ಶರತ್​ ಬಚ್ಚೇಗೌಡ, ತಹಸೀಲ್ದಾರ್​ ಶೀತಲ್​, ತಾಪಂ ಇಒ ಮುನಿಯಪ್ಪ, ಡಿವೈಎಸ್​ಪಿ ಮಲ್ಲೇಶ್​, ನಗರಸಭೆ ಆಯುಕ್ತ ನೀಲಾಲೋಚನ ಪ್ರಭು ಇದ್ದರು.
ಬೆಂಗಳೂರು ಗ್ರಾಮಾಂತರ ಡೆಸ್ಕ್
Published on: 
ಹೊಸಕೋಟೆ : ದೇವನಹಳ್ಳಿ ತಾಲೂಕಿನ ಚಪ್ರದಕಲ್​ನಲ್ಲಿ ನಿರ್ಮಿಸಿರುವ ಡಾ.ಅಂಬೇಡ್ಕರ್​ ಪುತ್ಥಳಿ ಜು.5ರಂದು ಅನಾವರಣ ಮಾಡುತ್ತಿದ್ದು, ತಾರತಮ್ಯ ಇಲ್ಲದೆ ಪ್ರತಿಯೊಬ್ಬರೂ ಭಾಗವಹಿಸಲು ನಗರ ಪ್ರದೇಶ ಸೇರಿ ಒಟ್ಟು ನೂರು ಬಸ್​ಗಳ ವ್ಯವಸ್ಥೆ ಮಾಡಲಾಗಿದ್ದು, ಮುಖಂಡರು ತಮ್ಮ ತಮ್ಮ ಗ್ರಾಮಗಳಿಂದ ಜನರನ್ನು ಕರೆತರುವ ಮೂಲಕ ಕಾರ್ಯಕ್ರಮ ಯಶಸ್ವಿಗೊಳಿಸೋಣ ಎಂದು ಶಾಸಕ ಶರತ್​ ಬಚ್ಚೇಗೌಡ ತಿಳಿಸಿದರು.
ನಗರದ ತಾಲೂಕು ಕಚೇರಿಯಲ್ಲಿ ಹಮ್ಮಿಕೊಂಡಿದ್ದ ಅಧಿಕಾರಿಗಳು ಹಾಗೂ ವಿವಿಧ ಸಂಘಟನೆಗಳ ಮುಖಂಡರ ಸಭೆಯಲ್ಲಿ ಮಾತನಾಡಿದ ಅವರು, ಪಂಚಾಯಿತಿಗಳಿಗೆ ಬೆಳಗ್ಗೆ 6.30ಕ್ಕೆ ಬಸ್​ಗಳು ಬರಲಿದೆ. ಆಯಾ ಪಂಚಾಯಿತಿಯ ಪಿಡಿಒಗಳು ಹಾಗೂ ಆಡಳಿತಾಧಿಕಾರಿಗಳಿಗೆ ಮಾಹಿತಿ ನೀಡಲಾಗುತ್ತದೆ ಎಂದರು.
ಅಂಬೇಡ್ಕರ್​ ಒಂದು ಸಮುದಾಯಕ್ಕೆ ಸೀಮಿತಗೊಳಿಸುವ ಹಾಗೂ ಪುತ್ಥಳಿಯನ್ನು ಇನ್ನೂ ಎತ್ತರ ಮಾಡಬೇಕು ಎಂದು ಕಳೆದ ಸಭೆಯಲ್ಲಿ ಸಂಬಂಧಪಟ್ಟವರಿಗೆ ತಿಳಿಸಲಾಗಿತ್ತು. ಆದರೆ ಪುತ್ಥಳಿ ಎತ್ತರ ಹಾಗೆ ಇದ್ದು, ನಮ್ಮ ಮಾತಿಗೆ ಸರ್ಕಾರ ಕಿಮ್ಮತ್ತು ನೀಡುತಿಲ್ಲ ಹಾಗೂ ತರಾತುರಿಯಲ್ಲಿ ಕಾರ್ಯಕ್ರಮ ಮಾಡುತ್ತಿದ್ದು, ಜನರನ್ನು ಸೇರಿಸಲು ಕಷ್ಟವಾಗುತ್ತದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು.
ಇದಕ್ಕುತ್ತರಿಸಿದ ಶಾಸಕರು, ಉನ್ನತ ಮಟ್ಟದಲ್ಲಿ ಅಧಿಕಾರಿಗಳು ಹಾಗೂ ಸಚಿವರು ಸಭೆ ನಡೆಸಿ ಕಾರ್ಯಕ್ರಮಕ್ಕೆ ಮುಂದಾಗಿದ್ದಾರೆ. ಸಾಮಾಜಿಕ ಜಾಲತಾಣಗಳಲ್ಲಿ ಪುತ್ಥಳಿ ಸಿದ್ಧವಿದ್ದರೂ ಲೋಕಾರ್ಪಣೆ ಮಾಡುತಿಲ್ಲ ಎಂಬ ಚರ್ಚೆಗಳು ಹುಟ್ಟಿಕೊಂಡಿದ್ದು, ಎಲ್ಲ ನಾಯಕರ ಸಮ್ಮತಿಯಂತೆ ಕಾರ್ಯಕ್ರಮ ಮಾಡಲಾಗುತ್ತಿದೆ. ಕಾರ್ಯಕ್ರಮಕ್ಕೆ ರೈತ ಸಂಘಟನೆಗಳು, ಕನ್ನಡ ಪರ ಸಂಘಟನೆಗಳು ಎಲ್ಲ ರಾಜಕೀಯ ಮುಖಂಡರು, ನಾಯಕರು ಹಾಗೂ ಸಾರ್ವಜನಿಕರಿಗೆ ಆಹ್ವಾನ ನೀಡಲಾಗಿದ್ದು, ಅಂಬೇಡ್ಕರ್​ ಅವರನ್ನು ಒಂದು ಸಮುದಾಯಕ್ಕೆ ಮೀಸಲಿಡುವ ಪ್ರಶ್ನೆಯೇ ಇಲ್ಲ ಎಂದರು.
ಪ್ರತಿ ಬಸ್​ಗಳಿಗೆ ಬ್ಯಾನರ್​ ಅಳವಡಿಕೆ, ತಿಂಡಿ ನೀರಿನ ವ್ಯವಸ್ತೆ ಹಾಗೂ ಪ್ರತಿ ಬಸ್​ನಲ್ಲಿ ಮೇಲ್ವಿಚಾರಕರಿದ್ದು, ಕಾರ್ಯಕ್ರಮ ಮುಗಿದ ನಂತರ ಪ್ರತಿಯೊಬ್ಬರನ್ನು ಅವರವರ ಗ್ರಾಮಗಳಿಗೆ ಕರೆತರಲಾಗುವುದು ಎಂದರು.
ಸಮಾಜ ಕಲ್ಯಾಣ ಇಲಾಖೆ ಸಹಾಯಕ ನಿರ್ದೇಶಕ ಸಿದ್ಧರಾಜು, ಕ್ಷೇತ್ರ ಶಿಕ್ಷಣಾಧಿಕಾರಿ ಪದ್ಬನಾಭ್​, ಯೋಜನಾ ಪ್ರಾಧಿಕಾರದ ಅಧ್ಯಕ್ಷ ಕೇಶವ್​ಮೂರ್ತಿ, ನಿರ್ದೇಶಕ ಡಾ.ಎಚ್​.ಎಂ.ಮುನಿರಾಜ್​, ಮುಖಂಡರಾದ ವಿಜಯ್​ ಕುಮಾರ್​, ವೈ.ಎಸ್​.ಎಂ.ಮಂಜುನಾಥ್​, ಚಿನ್ನಸ್ವಾಮಿ, ಐ.ಆರ್​.ನಾರಾಯಣಸ್ವಾಮಿ, ಶಿವಕುಮಾರ್​, ಮಂಜುನಾಥ್​, ರವಿಕುಮಾರ್​ ಇತರರು ಇದ್ದರು.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net