ಕ್ರಿಮಿನಲ್​ ನ್ಯಾಯಾಂಗ ನಿಂದನೆ ಪ್ರಕ್ರಿಯೆ ಆರಂಭಕ್ಕೆ ಎಜಿ ಅನುಮತಿ ಕಡ್ಡಾಯ| High court

ಖಾಸಗಿ ಕಂಪನಿಯೊಂದು ಐಪಿಎಸ್​ ಅಧಿಕಾರಿ ಸೇರಿ ನಾಲ್ವರ ವಿರುದ್ಧ ಸಲ್ಲಿಸಿದ್ದ ಕ್ರಿಮಿನಲ್​ ನ್ಯಾಯಾಂಗ ನಿಂದನೆ ಅರ್ಜಿಗೆ ಸಂಬಂಧಿಸಿ ಈ ಹಿಂದೆ ಜಾರಿಗೊಳಿಸಿದ್ದ ನೋಟಿಸ್​ ಹಿಂಪಡೆದಿರುವ ನ್ಯಾಯಮೂರ್ತಿಗಳಾದ ಅನು ಸಿವರಾಮನ್​ ಮತ್ತು ಟಿ. ವೆಂಕಟೇಶ್​ ನಾಯಕ್​ ಅವರಿದ್ದ ವಿಭಾಗೀಯ ನ್ಯಾಯಪೀಠ ಈ ಆದೇಶ ನೀಡಿದೆ. ನ್ಯಾಯಾಂಗ ನಿಂದನೆ ಕಾಯ್ದೆಯ ಸೆಕ್ಷನ್​ 15ರ ಅಡಿಯಲ್ಲಿ ಖಾಸಗಿ ವ್ಯಕ್ತಿಗಳು ಅಥವಾ ಸಂಸ್ಥೆಗಳು ಎಜಿ ಅನುಮತಿ ಇಲ್ಲದೆ ನೇರವಾಗಿ ಅರ್ಜಿ ಸಲ್ಲಿಸಲು ಸಾಧ್ಯವಿಲ್ಲ ಎಂದು ತಿಳಿಸಿದೆ.

ಕಂಪನಿಯ ರಹಸ್ಯ ಮಾಹಿತಿ ಮತ್ತು ದತ್ತಾಂಶವನ್ನು ದುರ್ಬಳಕೆ ಮಾಡಿಕೊಳ್ಳದಂತೆ ನೋಯ್ಡಾದ ಪ್ರಭಾತ್​ ಶರ್ಮಾ ಮತ್ತು ಗರಿಮಾ ಶರ್ಮಾ ಎಂಬವರ ವಿರುದ್ಧ ಕಂಪನಿಯು ಸಿವಿಲ್​ ದಾವೆ ಹೂಡಿತ್ತು. ಈ ಪ್ರಕರಣದಲ್ಲಿ 2024ರ ಡಿ. 6ರಂದು ಆದೇಶ ನೀಡಿದ್ದ ಹೈಕೋರ್ಟ್​, ಪ್ರತಿವಾದಿಗಳ ನಿವಾಸದಲ್ಲಿ ಸರ್ಚ್​ ನಡೆಸಲು ಕೋರ್ಟ್​ ಕಮಿಷನರ್​ ನಿಯೋಜಿಸಿತ್ತು. ಆದರೆ, ಸರ್ಚ್​ ನಡೆಸಲು ಜೈಪುರ ದಣ ಸಂಚಾರ ವಿಭಾಗದ ಎಡಿಜಿಪಿಯಾಗಿರುವ ಐಪಿಎಸ್​ ಅಧಿಕಾರಿ ರಾನು ಶರ್ಮಾ, ಬೆಂಗಳೂರು ಸಿಇಎನ್​ ಪೊಲೀಸ್​ ಠಾಣೆಯ ಎಸಿಪಿ ತನ್ವೀರ್​ ಮತ್ತು ಪ್ರತಿವಾದಿಗಳು ಅಡ್ಡಿಪಡಿಸಿದ್ದಾರೆ. ಇದು ನ್ಯಾಯಾಲಯದ ಆದೇಶದ ಉಲ್ಲಂನೆ ಎಂದು ಕ್ರಿಮಿನಲ್​ ನ್ಯಾಯಾಂಗ ನಿಂದನೆ ಅರ್ಜಿ ದಾಖಲಿಸಲಾಗಿತ್ತು. 

ವಿಚಾರಣೆ ನಡೆಸಿದ ನ್ಯಾಯಪೀಠ ನೋಟಿಸ್​ ಜಾರಿಗೊಳಿಸಿತ್ತು. ಆದರೆ, ಈ ಅರ್ಜಿ ದಾಖಲಿಸುವ ಮೊದಲು ಕಂಪನಿಯು ಎಜಿ ಅನುಮತಿ ಪಡೆದಿಲ್ಲ. ಆದ್ದರಿಂದ ಇಡೀ ಪ್ರಕ್ರಿಯೆಯೇ ಕಾನೂನುಬಾಹಿರವಾಗಿದೆ ಎಂದು ಪ್ರತಿವಾದಿಗಳು ಮಧ್ಯಂತರ ಅರ್ಜಿ ಸಲ್ಲಿಸಿದ್ದರು. ಇದನ್ನು ಪರಿಗಣಿಸಿರುವ ಹೈಕೋರ್ಟ್​ ಕಂಪನಿ ಸಲ್ಲಿಸಿದ್ದ ಅರ್ಜಿಯನ್ನು ವಜಾಗೊಳಿಸಿ ಆದೇಶಿಸಿದೆ. 

ವಿಭಾಗೀಯ ನ್ಯಾಯಪೀಠವು ಕಂಪನಿಯ ಅರ್ಜಿಯನ್ನು ವಜಾಗೊಳಿಸಿದೆಯಾದರೂ, ಕಂಪನಿ ಸಲ್ಲಿಸಿರುವ ಅರ್ಜಿಯನ್ನು ಕೇವಲ ಮಾಹಿತಿ ಎಂದು ಪರಿಗಣಿಸಿ ಮುಖ್ಯ ನ್ಯಾಯಮೂರ್ತಿಗಳ ಆಡಳಿತಾತ್ಮಕ ವಿಭಾಗಕ್ಕೆ ರವಾನಿಸಲು ರಿಜಿಸ್ಟ್ರಿಗೆ ತಿಳಿಸಿದೆ. ಈ ಮಾಹಿತಿಯನ್ನು ಪರಿಗಣಿಸಿ ಸ್ವಯಂಪ್ರೇರಿತ ನ್ಯಾಯಾಂಗ ಪ್ರಕ್ರಿಯೆ ಆರಂಭಿಸಬೇಕೇ ಅಥವಾ ಬೇಡವೇ ಎಂಬುದನ್ನು ಮುಖ್ಯ ನ್ಯಾಯಮೂರ್ತಿಗಳು ನಿರ್ಧರಿಸಲಿದ್ದಾರೆ.