ಕೆಎಚ್‌ಬಿಯಿಂದ 290 ಎಕರೆ ಭೂಸ್ವಾಧೀನ

ಬೆಂಗಳೂರು: ಬಿಡದಿ ಉಪನಗರ ನಿರ್ಮಾಣಕ್ಕೆ ರೈತರ ಮತ್ತು ಪ್ರತಿಪಕ್ಷಗಳ ತೀವ್ರ ವಿರೋಧ ವ್ಯಕ್ತವಾಗುತ್ತಿರುವ ಬೆನ್ನಲ್ಲೇ ರಾಜ್ಯ ಸರ್ಕಾರ ಮತ್ತೊಂದು ವಸತಿ ಯೋಜನೆಗೆ ಮುಂದಾಗಿದೆ. ಮೈಸೂರು ರಸ್ತೆ ಕೂಗಳತೆ ದೂರದಲ್ಲಿ ಇರುವ ಕೆಂಗೇರಿ ಹೋಬಳಿ ಬಿಎಂ ಕಾವಲ್ನಲ್ಲಿ ಕರ್ನಾಟಕ ವಸತಿ ಮಂಡಳಿ (ಕೆಎಚ್‌ಬಿ) ಟೌನ್‌ಶಿಪ್‌ಗಾಗಿ 290 ಎಕರೆ 22 ಗುಂಟೆ ಜಮೀನು ಸ್ವಾಧೀನಕ್ಕೆ ಅಂತಿಮ ಅಧಿಸೂಚನೆ ಹೊರಡಿಸಿದೆ.

ಬಿಎಂ ಕಾವಲ್ ಮತ್ತು ಪಕ್ಕದ ಹಳ್ಳಿಗಳಲ್ಲಿ 500 ಎಕರೆಯ ಯೋಜನೆ ಇದಾಗಿದೆ. ಮೊದಲ ಹಂತದಲ್ಲಿ 290 ಎಕರೆ ಭೂಪ್ರದೇಶ ಒಳಗೊಂಡಿದ್ದು, ಆರ್ಥಿಕವಾಗಿ ದುರ್ಬಲ ವರ್ಗಗಳಿಗೆ (ಇಡಬ್ಲ್ಯೂಎಸ್), ಕಡಿಮೆ ಆದಾಯ ಗುಂಪು (ಎಲ್‌ಐಜಿ) ಮತ್ತು ಮಧ್ಯಮ ಆದಾಯ ಗುಂಪು (ಎಂಐಜಿ) ಫಲಾನುಭವಿಗಳಿಗೆ ವಸತಿ ಮತ್ತು ಮೂಲಸೌಕರ್ಯಗಳನ್ನು ಒದಗಿಸುವ ಅಂತಾರಾಷ್ಟ್ರೀಯ ಮಟ್ಟದ ಟೌನ್‌ಶಿಪ್ ಅನ್ನು ಅಭಿವೃದ್ಧಿಪಡಿಸುವ ಗುರಿಯನ್ನು ಕೆಎಚ್‌ಬಿ ಹೊಂದಿದೆ.

ಅಧಿಸೂಚನೆ ಹೊರಡಿಸಿರುವ 290 ಎಕರೆ ಮತ್ತು 22 ಗುಂಟೆಗಳ ಪೈಕಿ 45 ಎಕರೆ ಖರಾಬ್ (ಸರ್ಕಾರಿ) ಜಮೀನು ಒಳಗೊಂಡಿದೆ. ಇದು ಸರ್ಕಾರಿ ಸ್ವಾಮ್ಯದ ಭೂಮಿ ಆಗಿರುವುದರಿಂದ, ಕೆಎಚ್‌ಬಿ ಪರಿಹಾರವನ್ನು ಪಾವತಿಸಬೇಕಾಗಿಲ್ಲ ಅಥವಾ ಸ್ವಾಧೀನಕ್ಕೆ ಬದಲಾಗಿ ಅಭಿವೃದ್ಧಿಪಡಿಸಿದ ಭೂಮಿಯನ್ನು ಒದಗಿಸಬೇಕಾಗಿಲ್ಲ.

2025ರ ಮೇ 5ರಂದು ಪ್ರಾಥಮಿಕ ಅಧಿಸೂಚನೆ ಪ್ರಕಟಿಸಲಾಯಿತು. ಕಾನೂನಿನ ಅನ್ವಯ ಭೂಮಾಲೀಕರಿಂದ ಬಂದ ಆಕ್ಷೇಪಣೆಗಳನ್ನು ಪರಿಗಣಿಸಿ ಅಂತಿಮ ಅಧಿಸೂಚನೆ ಹೊರಡಿಸಲಾಗಿದೆ. ಸರ್ಕಾರ ೋಷಿತ ಹಣಕಾಸಿನ ಪರಿಹಾರದ ಬದಲಿಗೆ 50:50 ಭೂ ಹಂಚಿಕೆ ಮಾದರಿಯಲ್ಲಿ ಈ ಯೋಜನೆಯನ್ನು ಅನುಷ್ಠಾನಕ್ಕೆ ತರಲಾಗುತ್ತಿದೆ.

ಆರಂಭದಲ್ಲಿ ಮಂಡಳಿಯು ಭೂಮಾಲೀಕರಿಗೆ ಎಕರೆಗೆ 20 ಲಕ್ಷ ರೂ. ಮುಂಗಡ ಪಾವತಿಸುತ್ತದೆ. ಪೂರ್ಣಗೊಂಡ ನಂತರ, ಭೂಮಾಲೀಕರು ಮುಂಗಡ ಮೊತ್ತವನ್ನು ವಾಪಸ್ ನೀಡಿದರೆ ಅಭಿವೃದ್ಧಿಪಡಿಸಿದ ಭೂಮಿಯ ಪೂರ್ಣ ಶೇ.50 ಪಾಲನ್ನು ಮರಳಿ ಪಡೆಯಬಹುದು. ಮುಂಗಡ ಹಣವನ್ನು ವಾಪಸ್ ಮಾಡದೆ ಇದ್ದರೆ ಅಷ್ಟು ಸರಿಸಮಾನ ಮೌಲ್ಯದ ಭೂಮಿಯನ್ನು ಬಿಟ್ಟು ಉಳಿದ ಅಭಿವೃದ್ಧಿ ಹೊಂದಿದ ನಿವೇಶನ ಹಸ್ತಾಂತರಿಸಲಾಗುತ್ತದೆ ಎಂದು ಕೆಎಚ್‌ಬಿ ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಅಪಾರ್ಟ್‌ಮೆಂಟ್ ಬ್ಲಾಕ್‌ಗಳ ನಿರ್ಮಾಣದ ಜತೆಗೆ ಎಲ್ಲ ನಾಗರಿಕ ಸೌಲಭ್ಯಗಳೊಂದಿಗೆ ವಸತಿ ವಿನ್ಯಾಸದ ಯೋಜನೆಯು ಒಳಗೊಂಡಿದೆ. ವಿನ್ಯಾಸಕ್ಕಾಗಿ ವಾಸ್ತುಶಿಲ್ಪ ಇಂಜಿನಿಯರಿಂಗ್ ಸಂಸ್ಥೆಯನ್ನು ನೇಮಕ ಮಾಡಿಕೊಂಡಿದ್ದು, ಅನುಮೋದಿತ ಮಾಸ್ಟರ್ ಪ್ಲ್ಯಾನ್ ಪ್ರಕಾರ ಜಾರಿಗೆ ತರಲಾಗುತ್ತದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಉದ್ದೇಶಿತ ಯೋಜನಾ ಸ್ಥಳವು ಮೈಸೂರು ರಸ್ತೆ, ನೈಸ್ ರಸ್ತೆ ಮತ್ತು ಮೆಟ್ರೋ ನಿಲ್ದಾಣಕ್ಕೆ ಸಂಪರ್ಕ ನೀಡಲು ಉತ್ತಮ ಸ್ಥಳವಾಗಿದೆ. ನಗರ ಪ್ರದೇಶದ ವಸತಿರಹಿತರಿಗೆ ವಸತಿ ಒದಗಿಸಲು ಕೆಎಚ್‌ಬಿ ಟೌನ್‌ಶಿಪ್‌ನ ಭಾಗವಾಗಿ ಜಿ+3 ಅಪಾರ್ಟ್‌ಮೆಂಟ್ ಬ್ಲಾಕ್‌ಗಳನ್ನು ನಿರ್ಮಿಸಲು ಯೋಜಿಸಿದೆ. ನಗರ ಪ್ರದೇಶದ ಬಡವರಿಗೆ 10 ಸಾವಿರ ಮನೆಗಳನ್ನು ನಿರ್ಮಿಸುವ ಗುರಿಯನ್ನು ರಾಜ್ಯ ಸರ್ಕಾರ ಹೊಂದಿದೆ. ಬಿಎಂ ಕಾವಲ್ ಟೌನ್‌ಶಿಪ್ ಆ ಉದ್ದೇಶವನ್ನು ಸಾಧಿಸುವಲ್ಲಿ ಮಹತ್ವದ ಪಾತ್ರ ವಹಿಸುವ ನಿರೀಕ್ಷೆಯಿದೆ.

ಬಿಎಂ ಕಾವಲ್ 1, 2 ಮತ್ತು 3ನೇ ಹಂತದಲ್ಲಿ 290 ಎಕರೆ ಭೂಮಿ ಸ್ವಾಧೀನಪಡಿಸಿಕೊಳ್ಳಲಾಗುತ್ತಿದೆ. ಅಂದರೆ ಗಂಗಸಂದ್ರ, ಚಿನ್ನಕುರ್ಚಿ, ಉತ್ತರಿ ಗ್ರಾಮಗಳ ಗಡಿ ಭಾಗದವರೆಗೂ ವಿಸ್ತರಿಸಿಕೊಂಡಿದೆ. ಉದ್ದೇಶಿತ 500 ಎಕರೆ ಬಡಾವಣೆ ನಿರ್ಮಾಣಕ್ಕೆ ಬಾಕಿ ಇರುವ 200 ಎಕರೆ ಜಮೀನನ್ನು 2ನೇ ಹಂತದಲ್ಲಿ ಗಡಿಭಾಗದ ಗ್ರಾಮಗಳಿಂದ ಸ್ವಾಧೀನಪಡಿಸಿಕೊಳ್ಳಲು ಕೆಎಚ್‌ಬಿ ಉದ್ದೇಶಿಸಿದೆ.