ಅಪರಿಚಿತ ಶವ ಗುರುತು ಪತ್ತೆಗೆ ಆಧಾರ್ ದತ್ತಾಂಶ ನೀಡಲಾಗದು

ಮಾಹಿತಿ ನೀಡಲು ಯುಐಡಿಎಐಗೆ ನಿರ್ದೇಶನ ನೀಡುವಂತೆ ಕೋರಿ ಬ್ಯಾಟರಾಯನಪುರ ಪೊಲೀಸರು ಸಲ್ಲಿಸಿದ್ದ ಅರ್ಜಿ ವಿಚಾರಣೆ ನಡೆಸಿದ ನ್ಯಾಯಮೂರ್ತಿ ಸೂರಜ್​ ಗೋವಿಂದರಾಜ್​ ಅವರ ಏಕಸದಸ್ಯ ನ್ಯಾಯಪೀಠ, ಮೃತ ವ್ಯಕ್ತಿಯ ಬೆರಳಚ್ಚು ಹೊಂದಿಸಲು ತಾಂತ್ರಿಕ ನಿರ್ಬಂಧಗಳಿವೆ. ವ್ಯಕ್ತಿಗತ ಖಾಸಗಿತನ ಕಾಪಾಡಬೇಕಿದ್ದು, ದೃಢೀಕರಣಕ್ಕೆ ಜೀವಂತ ಬೆರಳಚ್ಚು ಅಗತ್ಯ ಎಂದು ಹೇಳಿ ಅರ್ಜಿ ವಜಾಗೊಳಿಸಿದೆ.

ಪ್ರಸ್ತುತ ಪ್ರಕರಣದಲ್ಲಿ ಮೃತ ವ್ಯಕ್ತಿಯ ಗುರುತನ್ನು ಬಹಿರಂಗಪಡಿಸಲು ಆಧಾರ್​ ಸಂಖ್ಯೆಯೊಂದಿಗೆ ಬೆರಳಚ್ಚು ಹೊಂದಾಣಿಕೆ ಮಾಡಲು ಸಾಧ್ಯವಾಗುವುದಿಲ್ಲ. ಅರ್ಜಿದಾರರು ಕೋರಿದ ಮಾಹಿತಿಯನ್ನು ಯುಐಡಿಎಐ ಹಂಚಿಕೊಳ್ಳಲು ಸಾಧ್ಯವಿಲ್ಲ. ಆದ್ದರಿಂದ, ಪೊಲೀಸರ ಕೋರಿಕೆಯಂತೆ ನಿರ್ದೇಶನ ಹೊರಡಿಸುವುದರಲ್ಲಿ ಯಾವುದೇ ಅರ್ಥವಿರುವುದಿಲ್ಲ ಎಂದು ನ್ಯಾಯಾಲಯ ಹೇಳಿದೆ.

ಆಧಾರ್​ ಸಂಖ್ಯೆ ಪತ್ತೆ ಮಾಡಲು ಬೆರಳಚ್ಚನ್ನು ಡೇಟಾಬೇಸ್​ನಲ್ಲಿ ಶೋಧಿಸಲಾಗದು. ಹಾಗೆಯೇ ಬೆರಳಚ್ಚು ಪತ್ತೆ ಮಾಡಲು ಆಧಾರ್​ ಸಂಖ್ಯೆ ಮಾತ್ರ ಬಳಕೆ ಮಾಡಲಾಗದು. ಎರಡೂ ಇದ್ದಾಗ ಮಾತ್ರ ಗುರುತು ಪತ್ತೆ ಮಾಡಬಹುದಾಗಿದೆ ಎಂದು ಪ್ರಾಧಿಕಾರ ತಿಳಿಸಿತ್ತು.

ಬ್ಯಾಟರಾಯನಪುರದ ಕಾಲುವೆಯೊಂದರಲ್ಲಿ ಮಹಿಳೆಯ ಮೃತ ದೇಹ ಪತ್ತೆಯಾಗಿದ್ದು, ಪ್ರಕರಣ ದಾಖಲಾಗಿತ್ತು. ಗುರುತು ಪತ್ತೆಯಾಗದೆ ತನಿಖೆ ಮುಂದುವರಿಸಲು ಕಷ್ಟವಾಗಿತ್ತು. ಆದ್ದರಿಂದ, ಆಧಾರ್​ ದತ್ತಾಂಶದ ಜೊತೆ ಮೃತ ಮಹಿಳೆಯ ಬೆರಳಚ್ಚು ಹೊಂದಿಸುವಂತೆ ಪ್ರಾಧಿಕಾರಕ್ಕೆ ತನಿಖಾಧಿಕಾರಿ ಮನವಿ ಸಲ್ಲಿಸಿದ್ದರು. ಹೈಕೋರ್ಟ್​ ಆದೇಶ ಮಾಡದ ಹೊರತು ಯಾವುದೇ ವಿಚಾರ ಬಹಿರಂಗಪಡಿಸಲಾಗದು ಎಂದು ಮನವಿ ತಿರಸ್ಕರಿಸಲಾಗಿತ್ತು.