ರೀಲ್ಸ್ ತೋರಿಸಿ ಉದ್ಯಮಿಗಳಿಗೆ ಗಾಳ: ಎಮರ್ಜೆನ್ಸಿ ಸಾಲ ಕೊಡಿ ಎಂದು ಲಕ್ಷ ಲಕ್ಷ ವಂಚಿಸುತ್ತಿದ್ದ ಮಹಿಳೆ ಅರೆಸ್ಟ್..Bengaluru

ಶ್ರೀಮಂತ ಉದ್ಯಮಿಗಳಿಗೆ ವಂಚಿಸುತ್ತಿದ್ದ 31 ವರ್ಷದ ಸುಂಕದಕಟ್ಟೆ ನಿವಾಸಿ ವನಿತಾ ಎಂಬುವವರನ್ನು ಮಹಾಲಕ್ಷ್ಮಿ ಲೇಔಟ್ ಪೊಲೀಸರು ಬಂಧಿಸಿದ್ದಾರೆ.

ವನಿತಾ ಸೋಶಿಯಲ್​ ಮೀಡಿಯಾದ ಮೂಲಕ ಉದ್ಯಮಿಗಳನ್ನು ಹುಡುಕಿ ಫಾಲೋ ರಿಕ್ವೆಸ್ಟ್​ ಕಳುಹಿಸಿ, ತಾನು ಮಾಡಿದ್ದ ರೀಲ್ಸ್‌ ಹಾಗೂ ವಿಡಿಯೋಗಳನ್ನು ಅವರಿಗೆ ಕಳುಹಿಸುತ್ತಿದ್ದಳು. ಈ ಮೂಲಕ ಅವರ ಸಂಪೂರ್ಣ ನಂಬಿಕೆ ಗಳಿಸುತ್ತಿದ್ದಳು. ಆಕೆಯ ಜೊತೆಗೆ ಆತ್ಮೀಯವಾಗಿ ಮಾತನಾಡಲು ಶುರು ಮಾಡಿದ ನಂತರ ತನ್ನ ಚಾಲಾಕಿ ತನವನ್ನು ತೋರಿಸುತ್ತಿದ್ದಳು.

'ನನಗೆ ಹಣದ ತುರ್ತು ಅಗತ್ಯವಿದೆ. ಒಡವೆ ಅಡವಿಟ್ಟಿದ್ದೇನೆ, ಸಾಲ ಕೊಡಿ ಅದನ್ನು ಎರಡರಿಂದ ಮೂರು ದಿನದೊಳಗೆ ವಾಪಸ್ ಕೊಡುತ್ತೇನೆ' ಎಂದು ಹೇಳಿ ನಂಬಿಸುತ್ತಿದ್ದಳು. ಹಣ ಪಡೆಯುವಾಗ, ಸಿಸಿಟಿವಿ ಕ್ಯಾಮೆರಾಗಳು ಇಲ್ಲದ ನಿರ್ಜನ ಪ್ರದೇಶಗಳಿಗೆ ಉದ್ಯಮಿಗಳನ್ನು ಕರೆಸಿಕೊಂಡು ನಗದನ್ನು ಪಡೆದುಕೊಳ್ಳುತ್ತಿದ್ದಳು. ಹಣ ಕೈ ಸೇರಿದ ನಂತರ ಸಂತ್ರಸ್ತರ ಕರೆ ಸ್ವೀಕರಿಸುತ್ತಿರಲಿಲ್ಲ. ಸಂದೇಶಗಳಿಗೆ ಪ್ರತಿಕ್ರಿಯಿಸುತ್ತಿರಲಿಲ್ಲ. ಫೋನ್​, ಮೆಸೇಜ್​, ರೀಲ್ಸ್​ ಕಳಿಸುವುದುನ್ನು ಸಂಪೂರ್ಣವಾಗಿ ನಿಲ್ಲಿಸಿ ವಂಚಿಸುತ್ತಿದ್ದಳು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.

ಹಣ ಕಳೆದುಕೊಂಡ ಸಂತ್ರಸ್ತ ಯುವಕನೊಬ್ಬ ಮಹಾಲಕ್ಷ್ಮಿ ಲೇಔಟ್ ಪೊಲೀಸ್​ ಠಾಣೆಯಲ್ಲಿ ದೂರು ನೀಡಿದ್ದ. ಆತನ ದೂರಿನ ಮೇರೆಗೆ ತನಿಖೆ ನಡೆಸಿ, ಪ್ರಕರಣ ದಾಖಲಿಸಿಕೊಂಡ ಪೊಲೀಸರು ಆಕೆಯನ್ನು ಬಂಧಿಸಿದ್ದಾರೆ. ಕಳೆದ ಕೆಲವು ತಿಂಗಳುಗಳಲ್ಲಿ ಈಕೆಯ ವಿರುದ್ಧ ಗೋವಿಂದರಾಜನಗರ ಮತ್ತು ಜ್ಞಾನಭಾರತಿ ಪೊಲೀಸ್ ಠಾಣೆಗಳಲ್ಲೂ ಇದೇ ರೀತಿಯ ವಂಚನೆ ಪ್ರಕರಣಗಳು ದಾಖಲಾಗಿರುವುದು ವಿಚಾರಣೆ ವೇಳೆ ತಿಳಿದುಬಂದಿದೆ, (ಏಜೆನ್ಸೀಸ್)