ಅಪಹರಣ ಪ್ರಕರಣದ ನಿಜಾಂಶ ತಿಳಿಸಿದ ಪ್ರೇಮಪತ್ರ| High court

ಬೆಂಗಳೂರು: 

ಅಪ್ರಾಪ್ತೆಯನ್ನು ಅಪಹರಿಸಿ, ಬಲವಂತದ ಮದುವೆಯಾಗಿ ಲೈಂಗಿಕ ದೌರ್ಜನ್ಯ ಎಸಗಲಾಗಿದೆ ಎಂದು ಆರೋಪಿಸಿ ದಾಖಲಾಗಿದ್ದ ಪೋಕ್ಸೊ ಪ್ರಕರಣದಲ್ಲಿ, ಸಂತ್ರಸ್ತೆ ತಾನೇ ಬರೆದಿದ್ದ ಪ್ರೇಮಪತ್ರವನ್ನು ಪ್ರಮುಖ ಸಾಕ್ಷಿಯಾಗಿ ಪರಿಗಣಿಸಿ 12 ಆರೋಪಿಗಳನ್ನು ಖುಲಾಸೆಗೊಳಿಸಿದ ವಿಚಾರಣಾ ನ್ಯಾಯಾಲಯದ ಆದೇಶವನ್ನು ಹೈಕೋರ್ಟ್​ ಎತ್ತಿಹಿಡಿದಿದೆ.

ಶಿವಮೊಗ್ಗದ ಮಹಮ್ಮದ್​ ಇಬ್ರಾಹಿಂ ಸೇರಿ 10 ಮಂದಿ ಕುಟುಂಬಸ್ಥರು ಮತ್ತು ಮದುವೆ ನಡೆಸಿಕೊಟ್ಟ ಒಬ್ಬರು ಖಾಜಿಗಳನ್ನು ಪೋಕ್ಸೊ ಪ್ರಕರಣದಲ್ಲಿ ಆರೋಪಮುಕ್ತಗೊಳಿಸಿದ್ದ ವಿಚಾರಣಾ ನ್ಯಾಯಾಲಯದ ಆದೇಶ ಪ್ರಶ್ನಿಸಿ ದೂರುದಾರಳಾದ ಯುವತಿ ಮತ್ತು ರಾಜ್ಯ ಸರ್ಕಾರ ಸಲ್ಲಿಸಿದ್ದ ಮೇಲ್ಮನವಿ ವಜಾಗೊಳಿಸಿ ನ್ಯಾಯಮೂರ್ತಿಗಳಾದ ಎಚ್​.ಪಿ. ಸಂದೇಶ್​ ಮತ್ತು ಬಿ. ಪ್ರಮೋದ್​ ಅವರಿದ್ದ ವಿಭಾಗೀಯ ನ್ಯಾಯಪೀಠ ಆದೇಶ ನೀಡಿದೆ.

ಕೋರ್ಟ್​ಗೆ ಸಲ್ಲಿಕೆಯಾಗಿದ್ದ ಪ್ರೇಮಪತ್ರಗಳನ್ನು ತಾನೇ ಬರೆದಿದ್ದೆ ಎಂದು ಯುವತಿ ಒಪ್ಪಿಕೊಂಡಿದ್ದಳು. ಆ ಪತ್ರಗಳಲ್ಲಿ ಆಕೆ ಮಹಮ್ಮದ್​ ಇಬ್ರಾಹಿಂನನ್ನು ತೀವ್ರವಾಗಿ ಪ್ರೀತಿಸುತ್ತಿರುವುದು ಮತ್ತು ಪಾಲಕರ ರ್ನಿಬಂಧಗಳಿಂದಾಗಿ ತನ್ನ ಸ್ವಂತ ನಿರ್ಧಾರದ ಮೇಲೆಯೇ ಆತನೊಂದಿಗೆ ತೆರಳಿ ಮದುವೆಯಾಗಿದ್ದಾಗಿ ಬರೆದುಕೊಂಡಿದ್ದಳು. ಈ ಪತ್ರವನ್ನು ಪ್ರಮುಖ ಸಾಕ್ಷಿಯಾಗಿ ಪರಿಗಣಿಸಿದ ನ್ಯಾಯಪೀಠ, ಇದು ಬಲವಂತದ ಅಪಹರಣವಲ್ಲ. ಬದಲಿಗೆ ಪ್ರೇಮಿಗಳಿಬ್ಬರ ಸ್ವಇಚ್ಛೆಯ ಪಲಾಯನದ ಪ್ರಕರಣ ಎಂದು ಕರೆದಿದೆ. 

ಸಂತ್ರಸ್ತೆಯು ಅಪ್ರಾತ್ತೆ ಎಂದು ವಾದಿಸಿ ಪ್ರಾಸಿಕ್ಯೂಷನ್​ ಸಲ್ಲಿಸಿದ್ದ ಆಕೆಯ ಎಸ್ಸೆಸ್ಸೆಲ್ಸಿ ಅಂಕಪಟ್ಟಿಯ ಜೆರಾಕ್ಸ್​ ಪ್ರತಿಯನ್ನು ಕೋರ್ಟ್​ ಮಾನ್ಯ ಮಾಡಲಿಲ್ಲ. ಬಾಲನ್ಯಾಯ ಕಾಯ್ದೆಯ ಸೆಕ್ಷನ್​ 94ರ ಅಡಿಯಲ್ಲಿ ಕಡ್ಡಾಯವಾಗಿರುವ ಪ್ರಾಥಮಿಕ ಶಾಲೆಯ ಮೂಲ ದಾಖಲಾತಿ ಅಥವಾ ಜನನ ಪ್ರಮಾಣಪತ್ರವನ್ನು ತನಿಖಾಧಿಕಾರಿ ಸಂಗ್ರಹಿಸಿರಲಿಲ್ಲ. ಆದ್ದರಿಂದ, ಪೋಕ್ಸೊ ಕಾಯ್ದೆಯ ಅನ್ವಯವನ್ನೇ ನ್ಯಾಯಪೀಠ ನಿರಾಕರಿಸಿದೆ.

ವಾದ ನಿರಾಕರಿಸಿದ ಪೀಠ:

ಯುವತಿಯನ್ನು ಬಲವಂತವಾಗಿ ಕರೆದೊಯ್ಯಲಾಗಿದೆ ಎಂಬ ವಾದವನ್ನು ನ್ಯಾಯಪೀಠ ತಳ್ಳಿಹಾಕಿದೆ. ಕೋವಿಡ್​- ಲಾಕ್​ಡೌನ್​ ವೇಳೆಯಲ್ಲಿ ಶಿವಮೊಗ್ಗದಿಂದ ಸಿಕಂದರಾಬಾದ್​ ಮತ್ತು ಬೆಂಗಳೂರಿಗೆ ಒಂದು ತಿಂಗಳಿಗೂ ಹೆಚ್ಚು ಕಾಲ ಪ್ರಯಾಣಿಸುವಾಗ ಯುವತಿ ಎಲ್ಲಿಯೂ ಸಹಾಯ ಕೋರಲಿಲ್ಲ. ತಂದೆಗೆ ಹಲವು ಬಾರಿ ಫೋನ್​ ಮಾಡಿ ಮಾತನಾಡಿದ್ದರೂ ದೂರು ನೀಡಿರಲಿಲ್ಲ. ವೈದ್ಯಕಿಯ ಪರೀಕ್ಷೆಯಲ್ಲೂ ಲೈಂಗಿಕ ದೌರ್ಜನ್ಯ ನಡೆದಿರುವುದಕ್ಕೆ ಆಧಾರಗಳಿರಲಿಲ್ಲ ಎಂಬುದನ್ನು ಪರಿಗಣಿಸಿ ವಿಚಾರಣಾ ನ್ಯಾಯಾಲಯದ ಆದೇಶ ಎತ್ತಿಹಿಡಿದಿದೆ. High court