ರಾಜ್ಯ

ಗ್ರಾಮೀಣ ಸೊಗಡಿನ ಪಾರಂಪರಿಕ ಕಡಲೆಕಾಯಿ ಪರಿಷೆಗೆ ಅದ್ದೂರಿ ಚಾಲನೆ

ಕಡಲೆಕಾಯಿ ಪರಿಷೆಗೆ ಕಂಚಿನ ಬಸವಣ್ಣನ ತುಲಾಭಾರ ಮಾಡುವ ಮೂಲಕ ಕಡಲೆಕಾಯಿ ಪರಿಷೆಗೆ ಚಾಲನೆ ನೀಡಲಾಯಿತು.
ಕಡಲೆಕಾಯಿ ಪರಿಷೆಗೆ ಕಂಚಿನ ಬಸವಣ್ಣನ ತುಲಾಭಾರ ಮಾಡುವ ಮೂಲಕ ಕಡಲೆಕಾಯಿ ಪರಿಷೆಗೆ ಚಾಲನೆ ನೀಡಲಾಯಿತು.
Published on: 

ಪ್ರಮುಖ ಮುಖ್ಯಾಂಶಗಳು

  • ಗ್ರಾಮೀಣ ಸೊಗಡಿನ ಕಡಲೆಕಾಯಿ ಪರಿಷೆ
  • 5 ದಿನಗಳಿಗೆ ಪರಿಷೆ ವಿಸ್ತರಣೆ
  • ಮೈಸೂರು ದಸರಾ ಮಾದರಿಯಲ್ಲಿ ಪರಿಷೆ ಆಚರಣೆ
 ಬೆಂಗಳೂರು: ಬಸವನಗುಡಿಯಲ್ಲಿ ಆರಂಭವಾಗಿರುವ ಗ್ರಾಮೀಣ ಸೊಗಡಿನ ಪಾರಂಪರಿಕ ಕಡಲೆಕಾಯಿ ಪರಿಷೆಗೆ ಸೋಮವಾರ ಅದ್ದೂರಿ ಚಾಲನೆ ದೊರೆತಿದ್ದು, ದೊಡ್ಡಬಸವಣ್ಣ ದೇವಾಲಯದ ಎದುರು ಕಂಚಿನ ಬಸವಣ್ಣನಿಗೆ ಕಡಲೆಕಾಯಿ ತುಲಾಭಾರ ಮಾಡುವ ಮೂಲಕ ಅಧಿಕೃತವಾಗಿ ಚಾಲನೆ ನೀಡಲಾಯಿತು. 
ಮುಜರಾಯಿ ಸಚಿವ ರಾಮಲಿಂಗಾರೆಡ್ಡಿ ಪರಿಷೆಯನ್ನು ಉದ್ಘಾಟಿಸಿದರು. ಸಂಸದ ತೇಜಸ್ವಿ ಸೂರ್ಯ, ಶಾಸಕರಾದ ರವಿಸುಬ್ರಮಣ್ಯ, ಉದಯ ಗರುಡಾಚಾರ್, ವಿಧಾನಪರಿಷತ್ ಸದಸ್ಯ ಟಿ.ಎ. ಶರವಣ, ವಿಧಾನಪರಿಷತ್ ಮಾಜಿ ಸದಸ್ಯ ಯು.ಬಿ. ವೆಂಕಟೇಶ್, ಮಾಜಿ ಮೇಯರ್ ಕಟ್ಟೆ ಸತ್ಯನಾರಾಯಣ, ಮುಜರಾಯಿ ಇಲಾಖೆ, ಜಿಬಿಎ ಅಧಿಕಾರಿಗಳು ಪಾಲ್ಗೊಂಡು ಬಸವಣ್ಣನಿಗೆ ಕಡಲೆಕಾಯಿಯಿಂದ ತುಲಾಭಾರ ಮಾಡಿದರು. ನಂತರ ನೆರೆದಿದ್ದ ಭಕ್ತರಿಗೆ ಕಡಲೆಕಾಯಿಯನ್ನು ಪ್ರಸಾದವಾಗಿ ವಿತರಿಸಲಾಯಿತು. 
ಇದೇ ವೇಳೆ ವಿಶೇಷವಾಗಿ ಹೂವುಗಳಿಂದ ಅಲಂಕೃತಗೊಂಡಿದ್ದ ಐದು ರಾಸುಗಳಿಗೆ ಅಕ್ಕಿ- ಬೆಲ್ಲ ತಿನ್ನಿಸಿ ಪೂಜೆ ಸಲ್ಲಿಸಲಾಯಿತು. ಪರಿಷೆ ಅಂಗವಾಗಿ ದೊಡ್ಡ ಗಣಪನಿಗೆ ಕಡಲೆಕಾಯಿ ಅಭಿಷೇಕ ಮಾಡಿ 75 ಕೆ.ಜಿ. ಬೆಣ್ಣೆಯಿಂದ ವಿಶೇಷ ಅಲಂಕಾರ ಹಾಗೂ ದೊಡ್ಡ ಬಸವಣ್ಣನಿಗೆ 100 ಸೇರು ಕಡಲೆಕಾಯಿಯಿಂದ ಅಭಿಷೇಕ ಮಾಡಲಾಗಿತ್ತು. ಕಡೆಯ ಕಾರ್ತೀಕ ಸೋಮವಾರ ಹಾಗೂ ಕಡಲೆಕಾಯಿ ಪರಿಷೆ ಹಿನ್ನೆಲೆಯಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಆಗಮಿಸಿದ್ದ ಜನರು ಸರದಿಯಲ್ಲಿ ನಿಂತು ದೊಡ್ಡಬಸವಣ್ಣ ಹಾಗೂ ದೊಡ್ಡ ಗಣಪತಿ ದೇವರ ದರ್ಶನ ಪಡೆದರು.  

ಜಾತ್ರೆಯ ಸೊಬಗು:

ಪರಿಷೆಯುದ್ದಕ್ಕೂ ಜನರು ಕಡಲೆಕಾಯಿ ರುಚಿ ನೋಡಿ ಖರೀದಿಸುತ್ತಿದ್ದ ದೃಶ್ಯ ಸಾಮಾನ್ಯವಾಗಿತ್ತು. ತಿಂಡಿ, ಆಟಿಕೆಗಳತ್ತ ಮಕ್ಕಳು, ಯುವಜನರು ಆಕರ್ಷಿತರಾಗಿದ್ದರೆ, ಅಲಂಕಾರಿಕ ಹಾಗೂ ಗೃಹಬಳಕೆ ವಸ್ತುಗಳತ್ತ ಮಹಿಳೆಯರ ನೋಟ, ಚೌಕಾಸಿ ವ್ಯಾಪಾರ ಸಾಗಿತ್ತು. ಮತ್ತೊಂದೆಡೆ ಆಕಾಶಬುಟ್ಟಿ, ಟೋರಾ ಟೋರಾ, ಕುದುರೆ ಮತ್ತು ತೊಟ್ಟಿಲುಗಳ ರಾಟೆಗಳಲ್ಲಿ ಮಕ್ಕಳೊಂದಿಗೆ ಮಕ್ಕಳಾಗಿ ಹಿರಿಯರೂ ಆಡಿ ಆನಂದಿಸಿದರು.
ಈ ಬಾರಿ ಪರಿಷೆಯ ಪ್ರಮುಖ ಆಕರ್ಷಣೆ ದೇವಾಲಯಕ್ಕೆ ಮಾಡಿರುವ ಹೂವಿನ ಅಲಂಕಾರ, ಹಾಸನದ ಹಾಸನಾಂಬ ದೇವಾಲಯದ ಮಾದರಿಯಲ್ಲಿ ಅಲಂಕಾರ ಮಾಡಲಾಗಿದೆ. ಇದಲ್ಲದೆ ಕೇವಲ ಬಸನವನಗುಡಿ ರಸ್ತೆಗೆ ಸೀಮಿತವಾಗಿರುತ್ತಿದ್ದ ವಿದ್ಯುತ್ ದೀಪಾಲಂಕಾರವನ್ನು ಈ ಬಾರಿ ಗಾಂಧಿಬಜಾರ್, ಎನ್.ಆರ್. ರಸ್ತೆ, ಕೆ.ಆರ್. ರಸ್ತೆ, ಆರ್.ವಿ. ರಸ್ತೆ ಮತ್‌ಇತರ ರಸ್ತೆಗಳಿಗೆ ವಿಸ್ತರಿಸಲಾಗಿದ್ದು, ಸಂಜೆಯಾಗುತ್ತಲೇ ಎಲ್ಲೆಡೆ ದೀಪಗಳಿಂದ ರಸ್ತೆಗಳು ಕಂಗೊಳಿಸುತ್ತಿದ್ದವು. 

ಪ್ಲಾಸ್ಟಿಕ್ ಕವರ್ ವಶಕ್ಕೆ

ಪ್ಲಾಸ್ಟಿಕ್‌ಮುಕ್ತ ಪರಿಷೆಯ ಸಂಕಲ್ಪದೊಂದಿಗೆ ಎಲ್ಲೆಡೆ ‘ಬನ್ನಿ ಕೈ ಚೀಲ ತನ್ನಿ’ ಎಂಬ ಪೋಸ್ಟರ್‌ಗಳನ್ನು ಹಾಕಿ ಜನಜಾಗೃತಿ ಮೂಡಿಸಲಾಗುತ್ತಿದೆ. ಎನ್‌ಜಿಒಗಳ ಸಹಕಾರದೊಂದಿಗೆ ಬಟ್ಟೆ ಬ್ಯಾಗ್ ಹಾಗೂ ಪೇಪರ್ ಬ್ಯಾಗ್‌ಗಳನ್ನು ವಿತರಿಸಲಾಗುತ್ತಿದೆ. ಆದರೂ ಕೆಲ ವ್ಯಾಪಾರಿಗಳು ಪ್ಲಾಸ್ಟಿಕ್ ಚೀಲಗಳ ಮಾರಾಟ ಮಾಡುತ್ತಿದದ್ದನ್ನು ಪತ್ತೆ ಮಾಡಿದ ಜಿಬಿಎ ಅಧಿಕಾರಿಗಳು, 4-5 ಮಳಿಗೆಗಳಿಂದ ಪ್ಲಾಸ್ಟಿಕ್ ಚೀಲ ವಶಪಡಿಸಿಕೊಂಡು ದಂಡ ವಿಧಿಸಿದರು.


ತರಹೇವಾರಿ ಬೆಲ್ಲದುಂಡೆ

ಪ್ರತಿ ವರ್ಷದಂತೆ ಮಂಡ್ಯ ಕೃಷಿ ಇಲಾಖೆಯು ‘ಬೆಲ್ಲದ ಪರಿಷೆ’ ಆಯೋಜಿಸಿದ್ದು, ರೋಲ್ ಬೆಲ್ಲ, ಗುಂಡು ಬೆಲ್ಲ, ಬಕೆಟ್ ಬೆಲ್ಲ, ಅಚ್ಚು ಬೆಲ್ಲ ಹೀಗೆ ತರಹೇವಾರಿ ಬೆಲ್ಲದುಂಡೆಗಳನ್ನು ಆಕರ್ಷಣೆಯಾಗಿವೆ. 

1,500 ಸ್ವಯಂಸೇವಕರು

ಪರಿಷೆಯಲ್ಲಿ ಸಾರ್ವಜನಿಕರ ನೆರವಿಗೆ ವಿವಿಧ ಕಾಲೇಜುಗಳಿಂದ 1,500 ಸ್ವಯಂಸೇವಕರನ್ನು ನಿಯೋಜಿಸಲಾಗಿದೆ. ಎನ್‌ಜಿಒಗಳ ಮೂಲಕ 2 ಲಕ್ಷ ಪೇಪರ್ ಬ್ಯಾಗ್ ವಿತರಿಸಲಾಗುತ್ತಿದೆ. ಇದಲ್ಲದೆ ವ್ಯಾಪಾರಿಗಳಿಗೆ ಅನುಕೂಲವಾಗುವಂತೆ ಕುಡಿಯುವ ನೀರು, ಶೌಚಗೃಹ ವ್ಯವಸ್ಥೆ ಸಹ ಮಾಡಲಾಗಿದೆ. ತಳ್ಳಾಟ- ನೂಕಾಟ ತಪ್ಪಿಸಲು ಈ ಬಾರಿ ಬ್ಯಾರಿಕೇಡ್ ಅಳವಡಿಸಿ ಪ್ರತ್ಯೇಕವಾಗಿ ನಾಲ್ಕು ಪಥಗಳನ್ನು ಮಾಡಲಾಗಿದೆ. 

ಸುಡುಸುಡು ಕಡಲೆಕಾಯಿ

ಪರಿಷೆಗೆ ಬೆಂಗಳೂರು ಸುತ್ತಮುತ್ತಲ ಹಳ್ಳಿಗಳು, ತುಮಕೂರು, ರಾಮನಗರ, ಚನ್ನಪಟ್ಟಣ, ಕೋಲಾರ, ಚಿಂತಾಮಣಿ, ಹೊಸೂರು, ಸೇಲಂ, ಧರ್ಮಪುರಿ, ತಿರುವಣ್ಣಾಮಲೈ ಸೇರಿ ದೂರದ ಬಿಜಾಪುರದಿಂದಲೂ ರೈತರು, ವ್ಯಾಪಾರಿಗಳು ಕಡಲೆಕಾಯಿ ಮಾರಾಟಕ್ಕೆ ಆಗಮಿಸಿದ್ದಾರೆ. ಪರಿಷೆಯಲ್ಲಿ ಗುಣಮಟ್ಟದ ಕಡಲೆಕಾಯಿ ಕಡಿಮೆ ದರಕ್ಕೆ ಸಿಗುತ್ತದೆ ಎಂದು ಬಂದವರಿಗೆ ದರ ಕೇಳಿ ಕೈಸುಡುವಂತಾಗಿದೆ. ಲೀಟರ್‌ಗೆ 40-60 ರೂ.ವರೆಗೆ ಮಾರಾಟವಾಗುತ್ತಿದೆ. ಆದರೆ ಜನರಿಗೆ ಕಡಲೆಕಾಯಿ ದರಕ್ಕಿಂತ ಲೀಟರ್ ಬಗೆಗೆ ಅಸಮಾಧಾನವಿದೆ. ವ್ಯಾಪಾರಿಗಳು ಸರಿಯಾದ ಅಳತೆಯ ಲೀಟರ್ ಬಳಸುತ್ತಿಲ್ಲ ಎಂಬ ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.

ತೆಪ್ಪೋತ್ಸವದ ಮೆರುಗು

ಈ ವರ್ಷ ಪರಿಷೆಯನ್ನು ಐದು ದಿನಗಳಿಗೆ ವಿಸ್ತರಿಸಲಾಗಿದೆ. 5 ರಾಸುಗಳನ್ನು ತಂದು ವಿಶೇಷವಾಗಿ ಪೂಜೆ ಸಲ್ಲಿಸಲಾಗಿದೆ. ವ್ಯಾಪಾರಿಗಳಿಗೆ ಅಗತ್ಯ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ. ಪ್ಲಾಸ್ಟಿಕ್‌ಮುಕ್ತ ಪರಿಷೆಗೆ ಕ್ರಮ ವಹಿಸಲಾಗಿದ್ದು, ಕಳೆದ ಆಗಸ್ಟ್‌ನಿಂದಲೇ ಮುಜರಾಯಿ ದೇವಾಲಯಗಳಲ್ಲಿ ಪ್ಲಾಸ್ಟಿಕ್ ನಿಷೇಧ ಮಾಡಲಾಗಿದೆ. ಇನ್ನುಮುಂದೆ ಪರಿಷೆಯನ್ನು ಮೈಸೂರು ದಸರಾ ರೀತಿಯಲ್ಲಿ ವಿಜೃಂಭಣೆಯಿಂದ ಆಚರಿಸಲಾಗುವುದು.

ಪರಿಷೆಗೆ ಲಕ್ಷಾಂತರ ಜನರು ಸೇರುತ್ತಾರೆ. ಬೆಂಗಳೂರು ಆಧುನಿಕವಾಗಿ ಬೆಳೆಯುತ್ತಿರುವುದರ ನಡುವೆ 400-500 ವರ್ಷಗಳ ಸಂಪ್ರದಾಯವನ್ನು ಉಳಿಸಿಕೊಂಡು ಬಂದಿರುವುದಕ್ಕೆ ಪರಿಷೆ ನಿದರ್ಶನ. ಇಂತಹ ಪರಿಷೆಗೆ ಮಕ್ಕಳನ್ನು ಕರೆತಂದು ನಮ್ಮ ಪರಂಪರೆ ತಿಳಿಸಿ, ಗ್ರಾಮೀಣ ಸೊಗಡನ್ನು ಅನುಭವಿಸಲು ಅನುವುಮಾಡಿಕೊಡಿ.

basavanagudi festival
kadalakai parishe
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net