44 ದಿನಗಳ ನಂತರ ಶವ ಮರು ಪರೀಕ್ಷೆ

44 ದಿನಗಳ ಹಿಂದೆ ಅಂತ್ಯ ಸಂಸ್ಕಾರ ಮಾಡಲಾಗಿತ್ತು. ಬಸವನಬಾಗೇವಾಡಿ ತಾಲೂಕು ಹಂಗರಗಿ ಕ್ರಾಸ್‌ನ ಮದರಿ ಅವರ ಕಂಪನಿ ಎದುರಿಗೆ ಇರುವ ಮರಕ್ಕೆ ನೇಣು ಬಿಗಿದ ಸ್ಥಿತಿಯಲ್ಲಿ ಮೇ 25ರಂದು ರವಿಚಂದ್ರನ ಶವ ದೊರಕಿತ್ತು.

ವಿಜಯಪುರದ ಬಿಎಲ್‌ಡಿಇ ಆಸ್ಪತ್ರೆಯಲ್ಲಿ ಶವದ ಮರಣೋತ್ತರ ಪರೀಕ್ಷೆ ನಡೆಸಲಾಗಿತ್ತು. ಆದರೆ ರವಿಚಂದ್ರನ ಮರಣದಲ್ಲಿ ಸಂಶಯ ಇದ್ದು, ಇದು ವ್ಯವಸ್ಥಿತವಾಗಿ ನಡೆದ ಕೊಲೆ ಎಂದು ರವಿಚಂದ್ರನ ಕುಟುಂಬದವರು ಆರೋಪಿಸಿದ್ದರು.

ಈ ಕುರಿತು ಪೊಲೀಸ್ ಠಾಣೆಯಲ್ಲೂ ಪ್ರಕರಣ ದಾಖಲಿಸಲಾಗಿತ್ತು. ಶವವನ್ನು ಮುದ್ದೇಬಿಹಾಳ ನಗರದ ಅಂಬೇಡ್ಕರ್ ವೃತ್ತದಲ್ಲಿ ಇಟ್ಟು ದಲಿತ ಸಂಘಟನೆಗಳ ಸದಸ್ಯರು ಪ್ರತಿಭಟನೆಯನ್ನೂ ನಡೆಸಿದ್ದರು. ಶವ ಪರೀಕ್ಷೆ ಲಿತಾಂಶದಲ್ಲಿ ಅನುಮಾನವಿದೆ ಎಂದು ರವಿಚಂದ್ರನ ಕುಟುಂಬದವರು, ದಲಿತ ಸಂಘಟನೆಗಳ ಮುಖಂಡರು ಬೇರೆ ಆಸ್ಪತ್ರೆಯಲ್ಲಿ ಶವ ಪರೀಕ್ಷೆ ಮಾಡಲು ಕೋರ್ಟ್ ಮೆಟ್ಟಿಲೇರಿದ್ದರು.

ಬೆಳಗಾವಿ ಕಿಮ್ಸ್ ಆಸ್ಪತ್ರೆ ತಜ್ಞರು ಶವ ಪರೀಕ್ಷೆಗೆ ನಡೆಸಿದರು. ಒಂದು ತಿಂಗಳೊಳಗೆ ವರದಿ ಸಿಗುವ ಸಾಧ್ಯತೆ ಇದೆ ಎಂದು ಮೂಲಗಳು ತಿಳಿಸಿವೆ.

ಯುವಕನ ದೇಹದ ತುಂಬೆಲ್ಲಾ ಹೊಡೆದು ಕೊಲೆ ಮಾಡಿದ ಗುರುತುಗಳಿವೆ. ಖಾಸಗಿ ಅಂಗಾಂಗಗಳಲ್ಲಿ, ಎಲ್ಲೆಂದರಲ್ಲಿ ಇರಿದಿದ್ದಾರೆ. ಮೊದಲ ಹಂತದ ಶವ ಪರೀಕ್ಷೆ ವರದಿ ಸಂಶಯಾಸ್ಪದವಾಗಿದೆ. ಪಾರದರ್ಶಕವಾಗಿ ಪರೀಕ್ಷೆ ನಡೆಯಬೇಕು ಎನ್ನುವ ಉದ್ದೇಶದಿಂದ ಮರು ಪರೀಕ್ಷೆಗೆ ವಹಿಸಿಕೊಟ್ಟಿದ್ದೇವೆ. ದಲಿತ ಕುಟುಂಬಗಳನ್ನು ಹತ್ತಿಕ್ಕಲು ಇಂತಹ ವ್ಯವಸ್ಥೆಗಳು ನಡೆಯುತ್ತಿದ್ದು ನೊಂದ ಕುಟುಂಬಕ್ಕೆ ನ್ಯಾಯ ಸಿಗುವವರೆಗೂ ನಾವು ಹೋರಾಟ ನಿಲ್ಲಿಸಲ್ಲ ಎಂದು ಜಿಲ್ಲಾ ದೌರ್ಜನ್ಯ ಸಮಿತಿ ಸದಸ್ಯರಾದ ಅಭಿಷೇಕ ಚಕ್ರವರ್ತಿ, ಮಲ್ಲು ತಳವಾರ ಬಿಜ್ಜೂರ, ತಿಪ್ಪಣ್ಣ ದೊಡಮನಿ ಇನ್ನಿತರರು ಸ್ಥಳದಲ್ಲಿದ್ದ ಅಧಿಕಾರಿಗಳನ್ನು ಒತ್ತಾಯಿಸಿದರು.

ಶವವನ್ನು ನಾಗರಬೆಟ್ಟ ಗ್ರಾಮ ಪಂಚಾಯಿತಿ, ನಾಲತವಾಡ ಪಟ್ಟಣ ಪಂಚಾಯಿತಿ ಸಿಬ್ಬಂದಿ ಸಹಕಾರದೊಂದಿಗೆ ಅಧಿಕಾರಿಗಳ ಸಮ್ಮುಖ ಹೊರ ತೆಗೆಯಲಾಯಿತು. ಮುದ್ದೇಬಿಹಾಳ, ತಾಳಿಕೋಟೆ ಠಾಣೆಗಳ ಪೊಲೀಸರು ಬಿಗಿ ಬಂದೋಬಸ್ತ್ ಕೈಗೊಂಡಿದ್ದರು.

ವಿಜಯಪುರ ಉಪ ವಿಭಾಗಾಧಿಕಾರಿಗಳಾದ ಗುರುನಾಥ ದಡ್ಡೆ, ಕಿಮ್ಸ್ ವೈದ್ಯರಾದ ಡಾ. ಸುನೀಲ ಬಿರಾದಾರ, ಮುದ್ದೇಬಿಹಾಳ ತಾಲೂಕು ಆಸ್ಪತ್ರೆ ಆಡಳಿತ ವೈದ್ಯಾಧಿಕಾರಿ ಡಾ. ರಂಗನಾಥ, ತಹಸೀಲ್ದಾರ್ ಕೀರ್ತಿ ಚಾಲಕ, ಸಿಪಿಐ ಮಹ್ಮದ ಶಿವುದ್ದೀನ್, ಡಿಸಿಆರ್‌ಇ ಡಿಎಸ್ಪಿ ಸಿದ್ಧೇಶ್ವರ, ತಾಳಿಕೋಟೆ ಪಿಎಸ್‌ಐ ಜ್ಯೋತಿ ಖೋತ, ಸಂದೀಪ್ ಸಿಂಗ್, ನಾಲತವಾಡ ಪಪಂ ಮುಖ್ಯಾಧಿಕಾರಿ ಪ್ರಶಾಂತ್ ಸಿ., ಕಂದಾಯ ನಿರೀಕ್ಷಕ ವಿ.ವಿ. ಅಂಬಿಗೇರ, ಪಿಡಿಒ ನಾರಾಯಣ, ಇತರರಿದ್ದರು.