ಕುಸುಬೆ ಖರೀದಿಗೆ 42 ಕೇಂದ್ರ ಸ್ಥಾಪನೆ

ಕಲಬುರಗಿ: ರಾಜ್ಯ ಸಹಕಾರ ಎಣ್ಣೆ ಬೀಜ ಬೆಳೆಗಾರರ ಮಹಾಮಂಡಳ (ಕೆಒಎಫ್​) ಸಂಸ್ಥೆಯಡಿ ಜಿಲ್ಲೆಯಲ್ಲಿ ಕುಸುಬೆ ಖರೀದಿಗೆ 42 ಖರೀದಿ ಕೇಂದ್ರಗಳನ್ನು ತೆರೆಯಲು ಜಿಲ್ಲಾ ಟಾಸ್ಕ್​ ಫೋರ್ಸ್​ ಸಮಿತಿ ತೀರ್ಮಾನಿಸಿದೆ. ಖರೀದಿ ಪ್ರಕ್ರಿಯೆ ಪಾರದರ್ಶಕವಾಗಿ ನಿರ್ವಹಿಸಲು ಮೇಲ್ವಿಚಾರಣೆಗಾಗಿ ಸೂಕ್ತ ನೋಡಲ್​ ಅಧಿಕಾರಿಗಳನ್ನು ನೇಮಿಸಲು ನಿರ್ಧರಿಸಿದೆ.

ಕಲಬುರಗಿ ತಾಲೂಕಿನ ಅವರಾದ (ಬಿ), ಫರಹತಾಬಾದ್​, ಮಿಣಜಗಿ, ಹೊನ್ನಕಿರಣಗಿ, ಫಿರೋಜಾಬಾದ್​, ಭೀಮಳ್ಳಿ, ಹರಸೂರ. ಸೇಡಂ ತಾಲೂಕಿನ ರಂಜೋಳಾ, ಕೋಡ್ಲಾ, ಮೋತಕಪಲ್ಲಿ, ಕೋಡ್ಲಾ, ಮುಧೋಳ, ಊಡಗಿ, ಕಾನಗಡ್ಡಾ. ಅಫಜಲಪುರ ತಾಲೂಕಿನ ಮಲ್ಲಾಬಾದ್​, ಕರಜಗಿ, ಆಳಂದ ತಾಲೂಕು ಖಜೂರಿ, ಕಡಗಂಚಿ, ಸರಸಂಬಾ. ಚಿಂಚೋಳಿ ತಾಲೂಕಿನ ಐನೋಳ್ಳಿ, ಚಿಮ್ಮನಚೂಡ, ಪೋಲಕಪಳ್ಳಿ, ಚಿಂಚೋಳಿ. ಚಿತ್ತಾಪುರ ತಾಲೂಕಿನ ಡೊಣಗಾಂವ್​, ನಾಲವಾರ, ಆಲೂರ(ಬಿ), ಜೇವರ್ಗಿ ತಾಲೂಕಿನಲ್ಲಿ ಗುಡೂರ ಎಸ್​ಐ, ನೆಲೋಗಿ, ಅಂಕಲಗಾ, ಆಂದೋಲಾ, ಕಮಲಾಪುರ ತಾಲೂಕಿನ ಕಮಲಾಪುರ, ಮಹಾಗಾಂವ್​, ಶಹಾಬಾದ್​ ತಾಲೂಕಿನ ಮರತೂರ, ಭಂಕೂರ, ಕಾಳಗಿ ತಾಲೂಕಿನ ಅರಣಕಲ್​, ಕಾಳಗಿ, ಕೋಡ್ಲಿ, ಹೆಬ್ಬಾಳ್​, ಯಡ್ರಾಮಿ ತಾಲೂಕಿನಲ್ಲಿ ಸುಂಬಡ, ಇಜೇರಿ, ಯಡ್ರಾಮಿ, ಆಲೂರುಗಳಲ್ಲಿ ಖರೀದಿ ಕೇಂದ್ರ ಸ್ಥಾಪಿಸಲಾಗುತ್ತಿದೆ.

ಜಿಲ್ಲೆಯಲ್ಲಿ 2025&26ನೇ ಸಾಲಿಗೆ 9557.13 ಹೆಕ್ಟೇರ್​ ಪ್ರದೇಶದಲ್ಲಿ ಕುಸುಬೆ ಬಿತ್ತನೆಯಾಗಿದ್ದು, ಈ ಪೈಕಿ ಅಫಜಲಪುರ 140.8, ಆಳಂದ 1915.9, ಚಿಂಚೋಳಿ 529.8, ಚಿತ್ತಾಪುರ 966.4, ಕಾಳಗಿ 626.2, ಕಲಬುರಗಿ 1802.2, ಕಮಲಾಪುರ 799.4, ಜೇವರ್ಗಿ 793.6, ಯಡ್ರಾಮಿ 18.4, ಸೇಡಂ 1338.7 ಹೆಕ್ಟೇರ್​ ಪ್ರದೇಶದಲ್ಲಿ ಬಿತ್ತನೆಯಾಗಿದೆ. ಸುಮಾರು 7223 ಟನ್​ ಉತ್ಪಾದನೆ ನಿರೀಕ್ಷೆ ಇದೆ.

ರೈತರ ನೋಂದಣಿ ಕಾಲಾವಧಿಯನ್ನು 80 ದಿನ, ಖರೀದಿ ಅವಧಿ 90 ದಿನಗಳವರೆಗೆ ನಿಗದಿಪಡಿಸಿದೆ. ನೋಂದಣಿ ಪ್ರಕ್ರಿಯೆ ಈಗಾಗಲೇ ಶುರುವಾಗಿದೆ. ಕೇಂದ್ರ ಸರ್ಕಾರ ಪ್ರತಿ ಕ್ವಿಂಟಾಲ್​ ಕುಸುಬೆಗೆ 6,540 ರೂ. ಬೆಂಬಲ ಬೆಲೆ ನಿಗದಿಪಡಿಸಿದೆ. ಗರಿಷ್ಠ 6923 ಮೆ.ಟನ್​ ಗುಣಮಟ್ಟದ ಕುಸುಬೆ ಉತ್ಪನ್ನ ಖರೀದಿಸುವುದು, ಪ್ರತಿ ಎಕರೆಗೆ 5 ಕ್ವಿಂಟಾಲ್​ನಂತೆ ಪ್ರತಿ ರೈತರಿಂದ ಗರಿಷ್ಠ ಪ್ರಮಾಣ 20 ಕ್ವಿಂಟಾಲ್​ ಖರೀದಿಸಲು ನಿಗದಿಪಡಿಸಲಾಗಿದೆ. ಬೆಂಬಲ ಬೆಲೆ ಯೋಜನೆ ಮಾರ್ಗಸೂಚಿಯಂತೆ ರೈತರಿಗೆ ನಿಗದಿತ ಅವಧಿಯೊಳಗೆ ಖರೀದಿ ಪ್ರಮಾಣದ ಮೌಲ್ಯವನ್ನು ಆಧಾರ್​ ಜೋಡಣೆಯ ಬ್ಯಾಂಕ್​ ಖಾತೆಗೆ ಡಿಬಿಟಿ ಮೂಲಕ ಜಮೆ ಆಗುವಂತೆ ಪಾವತಿ ಮಾಡಬೇಕು. ಆವರ್ತ ನಿಧಿ ಮಾರ್ಗಸೂಚಿ ಕಡ್ಡಾಯವಾಗಿ ಪಾಲಿಸಲು ಸೂಚಿಸಲಾಗಿದೆ.