26 ಸಾವಿರ ದಿಕ್ಕಿಲ್ಲದ ಮಕ್ಕಳಿಗಿಲ್ಲ ಮಾಸಾಶನ; ಏಳು ತಿಂಗಳುಗಳಿಂದ ಸಿಗದ ಸಹಾಯಧನ

ಪ್ರಾಯೋಜಕತ್ವ ಯೋಜನೆಯಡಿ ಪಾಲನೆ- ಪೋಷಣೆ ಕಾಣುತ್ತಿರುವ ರಾಜ್ಯದ 26,334 ಮಕ್ಕಳಿಗೆ ಕಳೆದ 7 ತಿಂಗಳಿನಿಂದ ಮಾಸಾಶನ ಬರುತ್ತಿಲ್ಲ. ಇದರಿಂದಾಗಿ ದಿಕ್ಕಿಲ್ಲದ ಮಕ್ಕಳೀಗ ಅನ್ನ-ಆಸರೆ ಇಲ್ಲದೆ ಸಂಕಷ್ಟಕ್ಕೆ ಒಳಗಾಗಿದ್ದಾರೆ.

ಕುಷ್ಠಪೀಡಿತ ಮಕ್ಕಳು, ಅನಾಥರು, ಜೈಲು ಶಿಕ್ಷೆ ಗುರಿಯಾದವರ ಕಂದಮ್ಮಗಳು, ಕೋವಿಡ್​ನಿಂದ ತಂದೆ ಅಥವಾ ತಾಯಿ ಕಳೆದಕೊಂಡು ಏಕಪಾಲಕರಾದ ಮಕ್ಕಳ ಶಿಕ್ಷಣ, ಪೌಷ್ಟಿಕ ಆಹಾರ, ಟ್ಯೂಷನ್ ಭತ್ಯೆ ಮತ್ತಿತರ ಖರ್ಚಿಗೆ ನೆರವು ನೀಡುವ ಉದ್ದೇಶದಿಂದ ರಾಜ್ಯದಲ್ಲಿ ಪ್ರಾಯೋಜಕತ್ವ ಯೋಜನೆ ಜಾರಿಗೆ ತರಲಾಗಿದೆ. ಆದರೆ ಮಾಸಾಶನ ದೊರೆಯದ ಪರಿಣಾಮ ಪಾಲಕರು ಮತ್ತು ಮಕ್ಕಳು ಜಿಲ್ಲಾಧಿಕಾರಿ ಕಚೇರಿಗೆ ಅಲೆಯುವಂತಾಗಿದೆ.

ಪ್ರಾಯೋಜಕತ್ವ ಯೋಜನೆಯಡಿ ರಾಜ್ಯದಲ್ಲಿ 26,334 ಮಕ್ಕಳು ನೆರವು ಪಡೆಯುತ್ತಿದ್ದಾರೆ. ಪ್ರತಿ ತಿಂಗಳು ತಲಾ 4000 ರೂ. ಮಾಸಾಶನ ನೀಡುವ ಯೋಜನೆ ಇದಾಗಿದೆ. ಹಣ ನೇರವಾಗಿ ಫಲಾನುಭವಿಗಳ ಬ್ಯಾಂಕ್ ಖಾತೆಗೆ ಜಮೆ ಆಗುತ್ತದೆ. ಇವರಿಗೆ 7 ತಿಂಗಳಿನಿಂದ ಅಂದಾಜು 73.73 ಕೋಟಿ ರೂ. ಮಾಸಾಶನ ಬಾಕಿ ಉಳಿದಿದೆ.

2025ರ ಜುಲೈನಲ್ಲಿ ಮಾಸಾಶನ ಬಂದಿದ್ದೇ ಕೊನೆ. 2025- 2026ರಲ್ಲಿ ರಾಜ್ಯದಲ್ಲಿ ಧಾರವಾಡ ಜಿಲ್ಲೆಯಲ್ಲಿ ಅತ್ಯಧಿಕ 2653 ಮಕ್ಕಳಿಗೆ ಮಾಸಾಶನ ಬಿಡುಗಡೆ ಆಗಬೇಕಿದೆ. ಬಳ್ಳಾರಿ, ಚಿತ್ರದುರ್ಗ, ಗದಗ, ಹಾವೇರಿ, ಕೊಪ್ಪಳ ಮತ್ತು ಮೈಸೂರಿನಲ್ಲಿ 1000ಕ್ಕೂ ಅಧಿಕ ಏಕಪಾಲಕ ಮಕ್ಕಳಿಗೆ ಮಾಸಾಶನ ದೊರೆಯಬೇಕಿದೆ.

ಏನಿದು ಯೋಜನೆ?: ಕೇಂದ್ರ ಹಾಗೂ ರಾಜ್ಯ ಸರ್ಕಾರ 60:40 ಅನುಪಾತದಲ್ಲಿ ಹಣ ನೀಡುವ ಪುರಸ್ಕೃತ ಯೋಜನೆ ಇದಾಗಿದೆ. 18 ವರ್ಷದ ಒಳಗಿನ ಮಕ್ಕಳು ಯೋಜನೆ ವ್ಯಾಪ್ತಿಗೆ ಒಳಪಡುತ್ತಾರೆ. 18 ವರ್ಷದೊಳಗೆ 3 ವರ್ಷ ಮಾಸಾಶನ ಪಡೆಯಬಹುದು. 2024ರವರೆಗೆ ರಾಜ್ಯದಲ್ಲಿ 6 ಸಾವಿರಕ್ಕೂ ಕಡಿಮೆ ಮಕ್ಕಳು ಮಾಸಾಶನಕ್ಕೆ ಅರ್ಜಿ ಸಲ್ಲಿಸುತ್ತಿದ್ದರು. ನಂತರ ಯೋಜನೆಗೆ ವ್ಯಾಪಕ ಪ್ರಚಾರ ಸಿಕ್ಕು, 2026ರಲ್ಲಿ ಒಟ್ಟು 26,334 ಮಕ್ಕಳು ಪ್ರಾಯೋಜಕತ್ವ ಯೋಜನೆಗೆ ಅರ್ಹರಾಗಿದ್ದಾರೆ.