13 ಮಕ್ಕಳು, ಇಬ್ಬರು ಶಿಕ್ಷಕರಿಗೆ ಗಾಯ

ಅಕ್ಕಲಕೋಟ: ಬಬಲಾದ ಗ್ರಾಮದ ಜಿಲ್ಲಾ ಪರಿಷತ್​ ಪ್ರಾಥಮಿಕ ಕನ್ನಡ ಶಾಲೆಯಲ್ಲಿ ಮಂಗಳವಾರ ಬೆಳಗ್ಗೆ ಪ್ರಾರ್ಥನೆ ಬಳಿಕ ಛಾವಣಿ ಕಾಂಕ್ರೀಟ್​ ಪದರು ಕುಸಿದು ಬಿದ್ದು 13 ಮಕ್ಕಳು ಮತ್ತು ಇಬ್ಬರು ಶಿಕ್ಷಕರು ಗಾಯಗೊಂಡಿದ್ದಾರೆ.

ಎಂದಿನಂತೆ ಪ್ರೇಯರ್​ ಬಳಿಕ ಕ್ಲಾಸ್​ ರೂಮ್​ಗೆ ಸಾಲಿನಲ್ಲಿ ತೆರಳುತ್ತಿದ್ದಾಗ ಏಕಾಏಕಿ ಮೇಲ್ಛಾವಣಿ ಸಿಮೆಂಟ್​ ಪದರು ಕಳಚಿ ಬೀಳುತ್ತಿದ್ದಂತೆ ಆತಂಕದ ಸ್ಥಿತಿ ಉಂಟಾಯಿತು. ಕಾಂಕ್ರೀಟ್​ ಪದರಿನಡಿ ಸಿಲುಕಿದ್ದ ಕೆಲ ಮಕ್ಕಳನ್ನು ಶಿಕ್ಷಕರು ಹೊರತೆಗೆದಿದ್ದು, ಗಾಯಗೊಂಡ ವಿದ್ಯಾರ್ಥಿಗಳು ಹಾಗೂ ಶಿಕ್ಷಕರಾದ ರಮೇಶ ಶಿವಮೂರ್ತಿ, ಭೀಮಣ್ಣ ಗವಳಿ ಅವರನ್ನು ಮೈಂದರ್ಗಿ ಮತ್ತು ದುಧನಿ ಆರೋಗ್ಯ ಕೇಂದ್ರಗಳಿಗೆ ಕರೆದೊಯ್ದು ಚಿಕಿತ್ಸೆ ಕೊಡಿಸಲಾಗಿದೆ. ಗಂಭೀರ ಗಾಯಗೊಂಡಿರುವ ಪ್ರಜ್ವಲ್​ ಬೋಳದೆ ಹಾಗೂ ಪ್ರಶಾಂತ ಚಾಂಬಾರ್​ನನ್ನು ಹೆಚ್ಚಿನ ಚಿಕಿತ್ಸೆಗಾಗಿ ಅಕ್ಕಲಕೋಟಗೆ ಕಳುಹಿಸಲಾಗಿದೆ.

ವಿಷಯ ತಿಳಿಯುತ್ತಲೇ ಪಂಚಾಯಿತಿ ಸಮಿತಿ ಉಪಸಭಾಪತಿ ಸಾಗರ ಕಲ್ಯಾಣಶೆಟ್ಟಿ, ದುಧನಿ ನಗರಾಧ್ಯಕ್ಷ ಪ್ರಥಮೇಶ ಮೇತ್ರೆ, ಬಿಡಿಒ ಶಂಕರ ಕವಿತಕೆ, ಡಾ.ಮಂಜುನಾಥ ಪಾಟೀಲ, ಷಣ್ಮುಖ ವಿಭುತೆ, ಇಸ್ಮಾಯಿಲ್​ ಮುಜಾವರ್​, ಚಿದಾನಂದ ಗುರುವ, ಜಯ ನಾಟಕರ್​, ರೇಣುಕಾ ಪವಾರ್​ ಇತರರು ಸ್ಥಳಕ್ಕೆ ಧಾವಿಸಿ ಆಸ್ಪತ್ರೆಗೆ ಸಾಗಿಸಲು ನೆರವಾದರು.

ಘಟನೆ ಹಿನ್ನೆಲೆಯಲ್ಲಿ ಜಿಲ್ಲಾ ಪರಿಷತ್​ ಶಾಲೆ ಕಟ್ಟಡಗಳ ಸುರಕ್ಷತೆಯನ್ನು ನಿಯಮಿತ ಪರಿಶೀಲಿಸಲಾಗುತ್ತಿದೆಯೇ? ಅಪಾಯಕಾರಿ ಕಟ್ಟಡಗಳ ದುರಸ್ತಿ ಅಥವಾ ಮರು ನಿಮಾರ್ಣಕ್ಕಾಗಿ ಆಡಳಿತ ಇನ್ನೆಷ್ಟು ಅಪಘಾತಗಳಿಗಾಗಿ ಕಾಯಬೇಕು? ಬಬಲಾದ ಶಾಲೆ ಕಟ್ಟಡದ ಸ್ಟ್ರಕ್ಚರಲ್​ ಆಡಿಟ್​ ನಡೆಸಿ ಅಪಾಯಕಾರಿ ಭಾಗಗಳಲ್ಲಿ ದುರಸ್ತಿ ಅಥವಾ ಹೊಸದಾಗಿ ನಿರ್ಮಿಸಬೇಕು ಎಂಬುದು ಸ್ಥಳಿಯರ ಒತ್ತಾಯವಾಗಿದೆ.