ಬೆಂಗಳೂರು: ವಿಧಾನಸಭಾ ಅಧಿವೇಶನದಲ್ಲಿ ಸರ್ಕಾರದ ವಿರುದ್ಧ ಮುಗಿಬೀಳಲು ಕಾರ್ಯತಂತ್ರ ರೂಪಿಸುವ ಉದ್ದೇಶದಿಂದ ಕಾಂಗ್ರೆಸ್ ಸೋಮವಾರ ಸಂಜೆ ಖಾಸಗಿ ಹೋಟೆಲ್ನಲ್ಲಿ ಶಾಸಕಾಂಗ ಪಕ್ಷದ ಸಭೆ ಕರೆದಿದೆ. ಇನ್ನೂ 8 ದಿನ ಕಲಾಪ ನಡೆಯಲಿದ್ದು, ಈ ಅವಧಿಯನ್ನು ಸದ್ಬಳಕೆ ಮಾಡಿಕೊಳ್ಳಲು ಪಕ್ಷ ಬಯಸಿದೆ. ಶೇ.40 ಪರ್ಸೆಂಟ್ ಕಮೀಷನ್ ಆರೋಪ ಪ್ರಕರಣವನ್ನು ಹೆಚ್ಚೆಚ್ಚು ಚರ್ಚೆಯಾಗುವಂತೆ ಮಾಡುವ ನಿಟ್ಟಿನಲ್ಲಿ ನಿಲುವಳಿ ಸೂಚನೆ ಮಂಡಿಸಬೇಕೆಂಬ ಅಭಿಪ್ರಾಯ ಪಕ್ಷದ ಪ್ರಮುಖ ನಾಯಕರಲ್ಲಿದೆ. ಇದೇ ವೇಳೆ ಕ್ಷೇತ್ರದ ಬಗ್ಗೆ ಮಾತನಾಡಲು ಅವಕಾಶ ಸಿಕ್ಕಿಲ್ಲ, ಅನುದಾನ ಬೇಡಿಕೆ ಮೇಲಿನ ಚರ್ಚೆಯಲ್ಲಿ ಮಾತನಾಡಬೇಕೆಂಬ ಅಭಿಪ್ರಾಯ ಹೊಸ ಶಾಸಕರಲ್ಲಿದೆ. ಹೀಗಾಗಿ ಎಲ್ಲರನ್ನು ವಿಶ್ವಾಸಕ್ಕೆ ತೆಗೆದುಕೊಂಡು ಸ್ಪಷ್ಟತೆ ತರಲು ಶಾಸಕಾಂಗ ಪಕ್ಷದ ನಾಯಕ ಸಿದ್ದರಾಮಯ್ಯ ಸಭೆ ಕರೆದಿದ್ದಾರೆ. ರಾಜ್ಯದ ಕಾನೂನು ಸುವ್ಯವಸ್ಥೆ ಕುರಿತಂತೆ ಕಾಂಗ್ರೆಸ್ ಕಡೆಯಿಂದ ಸಲ್ಲಿಕೆಯಾದ ನಿಲುವಳಿ ಸೂಚನೆ ಪ್ರಸ್ತಾವನೆ ತಿರಸ್ಕಾರವಾಗಿ ನಿಯಮ 69ರಡಿ ಸಾರ್ವಜನಿಕ ಮಹತ್ವದ ಜರೂರು ಚರ್ಚೆಗೆ ಅವಕಾಶ ದೊರೆತಿದೆ. ಆದರೆ ಜೆಡಿಎಸ್ ಹಿಜಾಬ್ ಹಾಗೂ ಕಾಡಾನೆ ದಾಳಿ ವಿಷಯದಲ್ಲಿ ನಿಯಮ 69ರಡಿ ಚರ್ಚೆಗೆ ಅವಕಾಶ ಕೋರಿದೆ. ಹೀಗಿರುವಾಗ ಜೆಡಿಎಸ್ ಹೆಚ್ಚೆಚ್ಚು ಅವಕಾಶ ಬಳಸಿಕೊಳ್ಳಬಹುದು, ಸರ್ಕಾರ ಕೂಡ ಜೆಡಿಎಸ್ ಪರ ವರ್ತಿಸುವ ಸಾಧ್ಯತೆ ಹೆಚ್ಚಿದೆ. ಇದು ಕಾಂಗ್ರೆಸ್ ಪಾಲಿಗೆ ಕಸಿವಿಸಿ ಉಂಟು ಮಾಡಿದೆ. ಹೀಗಾಗಿಯೇ ಮಂಗಳವಾರ ಕಲಾಪದಲ್ಲಿ ಹೋರಾಟಕ್ಕೆ ಧುಮುಕಲು ಕಾಂಗ್ರೆಸ್ ಬಯಸಿದೆ. ಜತೆಗೆ ಜೆಡಿಎಸ್ ಬಿಜೆಪಿಯ ಬಿ ಟೀಂ ಎಂದು ಹೆಚ್ಚೆಚ್ಚು ಬಿಂಬಿಸಬೇಕೆಂದು ಈಗಾಗಲೆ ಪಕ್ಷದ ಹಿರಿಯ ನಾಯಕರ ಸಭೆಯಲ್ಲಿ ನಿರ್ಧಾರವಾಗಿದ್ದು, ಶಾಸಕರ ಸಮ್ಮುಖವೂ ಸಭೆಯ ನಿಲುವಳಿ ತಿಳಿಸಲಾಗುತ್ತದೆ.
