ಮೊದಲ ರಥೋತ್ಸವ: ರಾಯಚೋಟಿ ವೀರಭದ್ರಸ್ವಾಮಿಯ ವಾರ್ಷಿಕ ಜಾತ್ರಾ ಮಹೋತ್ಸವ ಜರುಗಿದರೂ ರಥೋತ್ಸವ ಇರಲಿಲ್ಲ. ಇದನ್ನು ಗಮನಿಸಿದ ಹುಬ್ಬಳ್ಳಿಯ ಭಕ್ತರು ಸ್ವಾಮಿಗೆ ಹೊಸದಾಗಿ ರಥ ನಿರ್ವಿುಸುವ ನಿರ್ಣಯ ಕೈಗೊಂಡರು. ಒಟ್ಟು 360 ಭಕ್ತರು ನೀಡಿದ ಸುಮಾರು 10.5 ಲಕ್ಷ ರೂ. ಭಕ್ತಿ ಕಾಣಿಕೆಯಿಂದ 2011ರಲ್ಲಿ ಹೊಸ ರಥ ನಿರ್ಮಾಣಗೊಂಡಿತು. ಹಾನಗಲ್ಲ ತಾಲೂಕು ಹೊಳೆಆಲೂರಿನ ರೇವಣಸಿದ್ಧಪ್ಪ ಬಡಿಗೇರ ಹಾಗೂ ಅವರ ಮಕ್ಕಳು ಈ ಸುಂದರ ರಥದ ಶಿಲ್ಪಿಗಳು. ಆ ರಥದಲ್ಲಿ ಭದ್ರಕಾಳಿಸಮೇತ ವೀರಭದ್ರಸ್ವಾಮಿಯ ಮೊದಲ ರಥೋತ್ಸವ ಜರುಗಿತು. ಕೇದಾರ ವೈರಾಗ್ಯಪೀಠದ ಜಗದ್ಗುರು, ರಾವಲ್ವಿಭೂಷಿತ ಶ್ರೀ ಭೀಮಾಶಂಕರಲಿಂಗ ಶಿವಾಚಾರ್ಯ ಭಗವತ್ಪಾದರು ಮೊದಲ ರಥೋತ್ಸವವನ್ನು ಉದ್ಘಾಟಿಸಿದರು. ಗದಗ-ಬೆಟಗೇರಿಯ ಸುಮಾರು ಐವತ್ತು ಜನ ಸದ್ಭಕ್ತರು ಮೊದಲ ರಥೋತ್ಸವದಿಂದ ಇಂದಿನವರೆಗೂ ಪ್ರತಿವರ್ಷ ಜಾತ್ರಾ ಮಹೋತ್ಸವದಲ್ಲಿ ಪಾಲ್ಗೊಂಡು ರಥೋತ್ಸವದ ಸಕಲ ಸಿದ್ಧತೆಗಳನ್ನು ಮಾಡುತ್ತಾರೆ. ರಥದ ಕಳಸವನ್ನು ಇಳಿಸುವ ತನಕ ಕ್ಷೇತ್ರದಲ್ಲಿದ್ದು ಎಲ್ಲ ಸೇವೆಗಳನ್ನು ಅಚ್ಚುಕಟ್ಟಾಗಿ ನಿರ್ವಹಿಸುವರು.
