ಇಂಥ ಶ್ರೇಷ್ಠ ಸಂಸ್ಕೃತಿಯ ಹೆಮ್ಮೆಯ ಮಹಾಪುರುಷ ಶ್ರೀರಾಮ. ಇವನನ್ನು ಭಾರತೀಯ ಸನಾತನ ಚಿಂತನೆಗಳು ಪುರುಷೋತ್ತಮ ಎಂದು ಸಂಬೋಧಿಸುವ ಮುಖೇನ ಅವನ ವ್ಯಕ್ತಿತ್ವ ಮತ್ತು ತತ್ವಾದರ್ಶಗಳನ್ನು ಅನಾವರಣಗೊಳಿಸಿವೆ. ಇಂದಿಗೂ ಅವುಗಳನ್ನು ಶಾಶ್ವತವಾಗಿ ಇರಿಸಿಕೊಂಡಿವೆ. ಶ್ರೀರಾಮನು ಆದರ್ಶ ಸುಪುತ್ರ, ವಾತ್ಸಲ್ಯದ ಸಹೋದರ, ಪರಿಶುದ್ಧಪತಿ ಹಾಗೂ ಪ್ರಾಮಾಣಿಕ ಪ್ರಭುವಾಗಿ ಬದುಕುವ ಪರಿಯನ್ನು ತೋರಿಸಿದ ಮಹಾಪುರುಷನಾಗಿದ್ದಾನೆ. ಅನಾಥ ರಕ್ಷಣೆ, ದುಷ್ಟರ ಸಂಹಾರ, ಧರ್ವನುಸರಣೆ, ಸತ್ಯಸಂಧತೆ, ಪಿತೃವಾಕ್ಯ ಪರಿಪಾಲನೆ, ಸಹನಶೀಲತೆ, ಧೈರ್ಯ, ದಯಾಭಾವನೆ, ಸ್ನೇಹಪರತೆ ಮುಂತಾದ ಮಾನವೀಯ ಮೌಲ್ಯಗಳನ್ನು ತನ್ನ ಬದುಕಿನಲ್ಲಿ ನಿರೂಪಿಸಿಕೊಂಡ ರೀತಿ ಅಷ್ಟೇ ಅನನ್ಯವಾಗಿದೆ.
