ಬೆಂಗಳೂರು: ಅನಗತ್ಯ ಹುದ್ದೆಗಳ ಕಡಿತ, ಇಲಾಖೆಗಳ ವಿಲೀನ, ಜನಸಾಮಾನ್ಯರಿಗೆ ಸರ್ಕಾರಿ ಸೇವೆ ತಲುಪಿಸುವಲ್ಲಿ ಆಗುವ ಲೋಪಗಳಿಗೆ ಇಲಾಖೆ ಮುಖ್ಯಸ್ಥರನ್ನೇ ಹೊಣೆಗಾರರನ್ನಾಗಿಸುವುದು, ಏಕಗವಾಕ್ಷಿಯಲ್ಲಿ 800 ಸೇವೆಗಳು ಸಿಗುವಂತೆ ಮಾಡುವುದು, ಮಿತವ್ಯಯ, ಕೆಳಹಂತದಲ್ಲಿಯೂ ಇ -ಆಫೀಸ್ ವ್ಯವಸ್ಥೆ ಸೇರಿದಂತೆ ಆಡಳಿತ ಸುಧಾರಣೆಗೆ ಹೊಸ ಸ್ಪರ್ಶ ನೀಡುವ ಮಹತ್ಕಾರ್ಯಕ್ಕೆ ರಾಜ್ಯ ಸರ್ಕಾರ ಸಜ್ಜಾಗುತ್ತಿದೆ. ಸಿಎಂ ಬಸವರಾಜ ಬೊಮ್ಮಾಯಿ ನ.1ರಿಂದ ಆಡಳಿತ ಸುಧಾರಣೆ ಜಾರಿಗೆ ತರುವುದಾಗಿ ಈಗಾಗಲೇ ಘೋಷಿಸಿದ್ದಾರೆ. ಅದಕ್ಕೆ ಪೂರಕವಾಗಿ ಏನೇನು ಕ್ರಮ ಕೈಗೊಳ್ಳಬೇಕೆಂದು ಸರ್ಕಾರ ಕ್ರಿಯಾ ಯೋಜನೆ ಸಿದ್ಧಪಡಿಸುತ್ತಿದೆ. ಅದಕ್ಕಾಗಿಯೇ ಆಡಳಿತ ಸುಧಾರಣಾ ಇಲಾಖೆ ಸರಣಿ ಸಭೆ ನಡೆಸುತ್ತಿದೆ. ಕಳೆದ ಕೆಲವು ವರ್ಷಗಳಿಂದ ಸರ್ಕಾರದ ವರ್ಚಸ್ಸು ತಗ್ಗಿದ್ದು, ಅಧಿಕಾರಿಗಳು ಆಡಳಿತಕ್ಕೆ ಸ್ಪಂದಿಸುತ್ತಿಲ್ಲ. ಜಿಡ್ಡುಗಟ್ಟಿರುವ ವ್ಯವಸ್ಥೆಯನ್ನು ಸರಿದಾರಿಗೆ ತರುವುದಕ್ಕೆ ಪೂರಕವಾಗಿ ಸರ್ಕಾರವೇ ಸುಧಾರಣಾ ಕ್ರಮ ಕೈಗೊಳ್ಳಲೇಬೇಕಾಗಿದೆ. ಆ ಕಾರ್ಯಕ್ಕೆ ತಿಂಗಳಿನಿಂದ ಚಾಲನೆ ನೀಡಲಾಗಿದೆ.
