ಶಾಲಾ ಶಿಕ್ಷಕರಿಗೆ ತವರಿನ ಸಿರಿ?: ಒಂದು ಬಾರಿ ವರ್ಗಕ್ಕೆ ಅಭ್ಯಾಸ, ಹೊಸ ನೇಮಕ ಬಳಿಕ ಕ್ರಮ ಸಾಧ್ಯತೆ

| ಶ್ರೀಕಾಂತ್ ಶೇಷಾದ್ರಿ ಬೆಂಗಳೂರು

ಹತ್ತು ಹದಿನೈದು ವರ್ಷಗಳಿಂದ ವರ್ಗಾವಣೆ ಬಯಸಿ, ಅವಕಾಶ ಸಿಗದೇ ರೋಸಿಹೋದ ಪ್ರಾಥಮಿಕ ಮತ್ತು ಪ್ರೌಢ ಶಾಲಾ ಶಿಕ್ಷಕರಿಗೆ ‘ಒಂದು ಬಾರಿ’ಗೆ ಸೀಮಿತವಾಗಿ ಅವರ ಸ್ವಂತ ಜಿಲ್ಲೆಗೆ ವರ್ಗಾಯಿಸಿಕೊಡಬೇಕೆಂಬ ರಾಜ್ಯ ಸರ್ಕಾರಿ ನೌಕರರ ಸಂಘದ ಪ್ರಸ್ತಾವನೆಯನ್ನು ಶಿಕ್ಷಣ ಇಲಾಖೆ ವಿಶ್ಲೇಷಣೆಗೊಳಪಡಿಸಿ ಸಾಧ್ಯಾಸಾಧ್ಯತೆ ಬಗ್ಗೆ ಕಸರತ್ತು ನಡೆಸಿದೆ. ಬೊಮ್ಮಾಯಿ ಸರ್ಕಾರ 15 ಸಾವಿರ ಶಿಕ್ಷಕರ ನೇಮಕಕ್ಕೆ ಪ್ರಕ್ರಿಯೆ ಆರಂಭಿಸಿದೆ, ಇದೇ ವೇಳೆ ಒಂದು ಬಾರಿಗೆ ಅನ್ವಯವಾಗುವಂತೆ ವರ್ಗಾವಣೆ ಮಾಡುವ ಬೇಡಿಕೆ ಸಹ ಹೆಚ್ಚಾಗಿದೆ. 15 ಸಾವಿರ ಹೊಸ ಶಿಕ್ಷಕರನ್ನು ನೇಮಕ ಮಾಡಿಕೊಳ್ಳುತ್ತಿರುವುದರಿಂದ ಅನ್ಯ ಜಿಲ್ಲೆಯವರು ವರ್ಗಾವಣೆ ಆಪೇಕ್ಷೆ ಪಟ್ಟರೆ ಅವರನ್ನು ಅವರ ಜಿಲ್ಲೆಗಳಿಗೆ ಕಳಿಸಿಕೊಡಲು ಒಂದೊಳ್ಳೆ ಅವಕಾಶ ಸರ್ಕಾರದ ಮುಂದಿದೆ ಎಂಬುದು ಸರ್ಕಾರಿ ನೌಕರರ ಸಂಘ ಮತ್ತು ಶಿಕ್ಷಕರ ಸಂಘಟನೆ ಪ್ರತಿನಿಧಿಗಳ ವಾದವಾಗಿದೆ.

ಅಂದಹಾಗೆ ಸರ್ಕಾರಿ ನೌಕರರ ಸಂಘ ಆನ್​ಲೈನ್ ಮೂಲಕ ಶಿಕ್ಷಕರ ಮಾಹಿತಿ ಮತ್ತು ವರ್ಗಾವಣೆ ಆಪೇಕ್ಷೆ ಮಾಹಿತಿ ಸಂಗ್ರಹಿಸಿ, ಅದನ್ನು ವಿಶ್ಲೇಷಿಸಿ ಶಿಕ್ಷಣ ಇಲಾಖೆ ಮುಂದಿಟ್ಟಿದೆ. ಅದರಲ್ಲೂ ಯಾವ ಜಿಲ್ಲೆಯಿಂದ ಯಾವ ಜಿಲ್ಲೆಗೆ ವರ್ಗಾವಣೆ ಬಯಸುವವ ಎಷ್ಟು ಶಿಕ್ಷಕರಿದ್ದಾರೆ, ಕಲ್ಯಾಣ ಕರ್ನಾಟಕ ಜಿಲ್ಲೆಗಳಿಂದ ಇತರ ಜಿಲ್ಲೆಗಳಿಗೆ ವರ್ಗಾವಣೆ ಬಯಸಿದವರು ಎಷ್ಟು? ಇತರ ಜಿಲ್ಲೆಗಳಲ್ಲಿ ವರ್ಗಾವಣೆ ಬೇಡಿಕೆ ಎಷ್ಟಿದೆ ಎಂಬ ನಿಖರ ಸಂಖ್ಯೆಯನ್ನು ವಿಶ್ಲೇಷಿಸಲಾಗಿದೆ. ಇದಿಷ್ಟೇ ಅಲ್ಲದೇ, ವರ್ಗಾವಣೆ ಬಯಸಿರುವ ವಿಷಯವಾರು ಶಿಕ್ಷಕರ ಮಾಹಿತಿ, ತೀವ್ರತರ ಅನಾರೋಗ್ಯಕರ ಕಾರಣದಿಂದ ಸ್ವಂತ ಜಿಲ್ಲೆಗೆ ಹೋಗಲು ಬಯಸಿದ ಶಿಕ್ಷಕರು, ವಿಧವೆ, ವಿಚ್ಛೇದಿತ, ಅಂಗವಿಕಲ, ಮಾಜಿ ಸೈನಿಕ, ಪತಿ-ಪತ್ನಿ ಪ್ರಕರಣಗಳೆಷ್ಟು, ಮಹಿಳಾ-ಪುರುಷ ಶಿಕ್ಷರೆಷ್ಟು? ಎಂಬಿತ್ಯಾದಿ ಸೂಕ್ಷ್ಮ ಮಾಹಿತಿ ಯನ್ನೂ ಸಹ ಸರ್ಕಾರಿ ನೌಕರರ ಸಂಘ ಸರ್ಕಾರದ ಮುಂದಿಟ್ಟಿದೆ.

ಹೆಚ್ಚಲಿದೆ ಸಂಖ್ಯೆ: ಪ್ರೌಢಶಾಲಾ ವಿಭಾಗದಲ್ಲಿ 964 ಶಿಕ್ಷಕಿಯರು, 1940 ಶಿಕ್ಷಕರು ಹಾಗೂ ಪ್ರಾಥಮಿಕ ಶಾಲೆಯ 2702 ಶಿಕ್ಷಕಿಯರು, 3484 ಶಿಕ್ಷಕರು ತಮ್ಮ ಜಿಲ್ಲೆಗೆ ಹೋಗಲು ಬಯಸಿದ್ದಾರೆ. ಇದು ಸರ್ಕಾರಿ ನೌಕರರ ಸಂಘ ಸಂಗ್ರಹಿಸಿದ ಮಾಹಿತಿ, ಅನೇಕರು ಮಾಹಿತಿ ದಾಖಲಿಸದೇ ಇರಬಹುದು, ಸರ್ಕಾರ ಪ್ರಕ್ರಿಯೆ ಆರಂಭಿಸಿದರೆ ಈ ಸಂಖ್ಯೆ ಹೆಚ್ಚಬಹುದೆಂಬ ಅಭಿಪ್ರಾಯ ಶಿಕ್ಷಣ ಇಲಾಖೆಯಲ್ಲಿದೆ.

ಕಾಯ್ದೆಗೆ ತಿದ್ದುಪಡಿ: ರಾಜ್ಯದಲ್ಲಿ ಶಿಕ್ಷಕರ ವರ್ಗಾವಣೆಗೆ ಪ್ರತ್ಯೇಕ ಕಾಯ್ದೆ ಇದೆ. ಹೀಗಾಗಿ ಒಂದು ಬಾರಿಗೆ ಅನ್ವಯವಾಗುವಂತೆ ಪ್ರಕ್ರಿಯೆ ನಡೆಸಲು ಕಾನೂನಿಗೆ ತಿದ್ದುಪಡಿ ಮಾಡಬೇಕಾಗುತ್ತದೆ. ಪ್ರಸ್ತುತ ಅಧಿವೇಶನದಲ್ಲಿ ವಿಧೇಯಕ ಮಂಡನೆ ಕಷ್ಟ ಎಂದು ಶಿಕ್ಷಣ ಇಲಾಖೆ ಅಧಿಕಾರಿಗಳು ಹೇಳುತ್ತಾರೆ. ಸರ್ಕಾರಿ ನೌಕರರ ಸಂಘ ನೀಡಿದ ವರದಿಯನ್ನು ಅವಲೋಕಿಸಲಾಗುತ್ತಿದೆ. ಸಾಧಕ ಬಾಧಕದ ಬಗ್ಗೆ ಮಾಹಿತಿ ಕಲೆಹಾಕ ಲಾಗುತ್ತಿದೆ ಎಂದು ಅಧಿಕಾರಿ ಗಳು ವಿಜಯವಾಣಿಗೆ ತಿಳಿಸಿದರು. ಒಂದು ವೇಳೆ ನಿರ್ಣಯಕೈಗೊಂಡರೆ ಸುಗ್ರೀವಾಜ್ಞೆ ತರಲೂ ಅವಕಾಶವಿದೆ, ನಂತರದ ಅಧಿವೇಶನದಲ್ಲಿ ಶಾಸನ ಸಭೆ ಅನುಮೋದನೆ ಪಡೆದುಕೊಳ್ಳಬಹುದಾಗಿದೆ.

ಅಂತರ ಜಿಲ್ಲಾ ವರ್ಗಾವಣೆ ಬಯಸಿರುವವರು

• ಪ್ರಾಥಮಿಕ ಶಾಲಾ ಶಿಕ್ಷಕರು- 6186
• ಕಲ್ಯಾಣ ಕರ್ನಾಟಕದಿಂದ ಅಪೇಕ್ಷಿತರು- 2032
• ಪ್ರೌಢಶಾಲಾ ಶಿಕ್ಷಕರು- 2904
• ಕಲ್ಯಾಣ ಕರ್ನಾಟಕದಿಂದ ಅಪೇಕ್ಷಿತರು- 1254

ಇಲಾಖೆಗೆ ಆತಂಕ: ‘ಒಂದು ಬಾರಿಗೆ’ ವರ್ಗಾವಣೆ ಮಾಡುತ್ತೇವೆಂಬುದು ಗೊತ್ತಾದರೆ ಸಾಕು ದಲ್ಲಾಳಿಗಳು ಹುಟ್ಟಿಕೊಳ್ಳುತ್ತಾರೆ, ಪಾರದರ್ಶಕವಾಗಿ ಪ್ರಕ್ರಿಯೆ ನಡೆಸಲು ಇಲಾಖೆ ಪ್ರಯತ್ನಿಸಿದರೂ ಶಿಕ್ಷಕರು ದಲ್ಲಾಳಿಗಳನ್ನು ನಂಬಿ ಹಣ ಕೊಟ್ಟುಬಿಡುತ್ತಾರೆ. ವಿವಿಧ ರೀತಿಯ ಒತ್ತಡ ಹೆಚ್ಚಾಗುತ್ತದೆ. ಈ ಕಾರಣಕ್ಕೆ ಹೊಸ ನೇಮಕ ಪ್ರಕ್ರಿಯೆ ಮುಗಿದ ಬಳಿಕವಷ್ಟೇ ಕಲ್ಯಾಣ ಕರ್ನಾಟಕ ಭಾಗದ ಶಿಕ್ಷಕರು-ಮಕ್ಕಳ ಅನುಪಾತ ನೋಡಿಕೊಂಡು ತೀರ್ಮಾನ ಮಾಡಲಾಗುತ್ತದೆ ಎಂದು ಶಿಕ್ಷಣ ಇಲಾಖೆಯ ಉನ್ನತ ಮೂಲಗಳು ತಿಳಿಸಿವೆ.

ನೌಕರರ ಸಂಘದ ವಾದವೇನು?

• ಶಿಕ್ಷಕರು ಮಾನಸಿಕ ನೆಮ್ಮದಿಯಿಂದಿದ್ದರೆ ಮಾತ್ರ ಬೋಧನೆ, ಕಲಿಕೆ ಗುಣಮಟ್ಟದಲ್ಲಿರುತ್ತದೆ. 10-15 ವರ್ಷಗಳಿಗೂ ಹೆಚ್ಚು ಕಾಲ ಶಿಕ್ಷಕರು ತಮ್ಮ ಕುಟುಂಬದಿಂದ ದೂರ ಇದ್ದರೆ ಹೇಗೆ ನೆಮ್ಮದಿ ಸಾಧ್ಯ?
• ಕುಟುಂಬದಿಂದ 400-500 ಕಿಮೀ ದೂರ ಇದ್ದರೆ, ಮಹಿಳಾ ಶಿಕ್ಷಕರು ಅನ್ಯ ಜಿಲ್ಲೆಗಳಿದ್ದರೆ ಕುಟುಂಬದ ಭೇಟಿಗೆ ಆಗಾಗ್ಗೆ ಹೋಗಿ ಬರುವ ಒತ್ತಡ ತರಗತಿ ಮೇಲೂ ಪರಿಣಾಮ ಬೀರುವುದು.
• ಶಿಕ್ಷಕರ ಕುಟುಂಬ ಸಮಸ್ಯೆಗೆ ಸಿಲುಕಿದಾಗ ಸ್ಪಂದಿಸಲು ಸಾಧ್ಯವಾಗದು. ಅವರ ಮಕ್ಕಳ ಶಿಕ್ಷಣದ ಮೇಲೂ ಪರಿಣಾಮ ಬೀರಲಿದೆ.
• ಎಲ್ಲ ಇಲಾಖೆಗಳು ಅವರವರ ಕೋರಿಕೆ ಸ್ಥಳಗಳಿಗೆ ವರ್ಗಾವಣೆ ಗೊಳ್ಳುವ ಅವಕಾಶ ಇರುವಾಗ ಶಿಕ್ಷಣ ಇಲಾಖೆಯಲ್ಲೂ ಅವಕಾಶ ಕೊಡಬೇಕು.

https://www.vijayavani.net/son-felt-happy-about-mothers-love-marriage-at-her-52nd-age/

https://www.vijayavani.net/once-again-china-daily-corona-cases-are-increased/