ಖಲಿಸ್ತಾನಿ ಬೆಂಬಲಿಗರು ಕೆನಡಾದಲ್ಲಿ ಭಾರತವಿರೋಧಿ ಚಟುವಟಿಕೆಗಳನ್ನು ನಡೆಸುತ್ತಿರುವುದು ತಲ್ಲಣ ಸೃಷ್ಟಿಸಿದೆ. ಆದರೆ, ಅಮೆರಿಕದಲ್ಲೂ ಖಲಿಸ್ತಾನಿ ಚಳವಳಿಯ ಬೆಂಬಲಿಗರು ದೊಡ್ಡಸಂಖ್ಯೆಯಲ್ಲಿದ್ದು, ಮಂದಿರಗಳ ಮೇಲಿನ ದಾಳಿಯಂಥ ಕೃತ್ಯಗಳ ಹಿಂದೆ ಅವರೇ ಇದ್ದಾರೆ ಎಂದು ಅಮೆರಿಕದ ಹಿಂದು ಸಂಘಟನೆಗಳು ಹೇಳಿವೆ. ಕ್ಯಾಲಿಫೋರ್ನಿಯಾದ ಲಾಸ್ ಏಂಜಲೀಸ್ನಲ್ಲಿ ಖಲಿಸ್ತಾನಿ ಆಂದೋಲನದ ಬೆಂಬಲಿಗರು ‘ಖಲಿಸ್ತಾನಿ ರೆಫರೆಂಡಮ್ ಅಂದರೆ ‘ಜನಾಭಿಪ್ರಾಯ ಸಂಗ್ರಹ’ವನ್ನು ಶೀಘ್ರದಲ್ಲೇ ನಡೆಸಲಿದ್ದಾರೆ. ಇದು ಯಾವುದೋ ಸ್ಥಳೀಯ ಸಮಸ್ಯೆಯ ಪರಿಹಾರಕ್ಕಲ್ಲ. ಬದಲಾಗಿ ಭಾರತದಲ್ಲಿನ ಪಂಜಾಬ್ನ್ನು ಹೊರತುಪಡಿಸಿ, ಒಂದು ಸ್ವತಂತ್ರ ಖಲಿಸ್ತಾನಿ ರಾಜ್ಯಕ್ಕಾಗಿ ಇವರ ‘ಹೋರಾಟ’! ಇದೇ ವಿಷಯದ ಕುರಿತು ಬ್ರಿಟನ್, ಕೆನಡಾ ಸೇರಿದಂತೆ ಹಲವು ದೇಶಗಳಲ್ಲಿ ಜನಾಭಿಪ್ರಾಯ ಸಂಗ್ರಹ ನಡೆಸುವ ಪ್ರಹಸನ ನಡೆಸಲಾಗಿದೆ ಮತ್ತು ಅದರಿಂದ ಯಾವುದೇ ನಿಖರ ಫಲಿತಾಂಶ ಅಥವಾ ಬೆಂಬಲ ಖಲಿಸ್ತಾನಿ ಸಂಘಟನೆಗಳಿಗೆ ಪ್ರಾಪ್ತವಾಗಿಲ್ಲ. ಹೀಗಾಗಿ, ಅಮೆರಿಕದ ಬೇರೆ ಬೇರೆ ಪ್ರಾಂತ್ಯಗಳಲ್ಲಿ ರೆಫರೆಂಡಮ್ ನಡೆಸಲು ಅವು ಮುಂದಾಗಿವೆ. ಅಲ್ಲದೆ, ಖಲಿಸ್ತಾನ್ ಚಳವಳಿಗೆ ಜಾಗತಿಕವಾಗಿ ಬೆಂಬಲ ಗಿಟ್ಟಿಸಿಕೊಳ್ಳಬೇಕೆಂಬ ಇರಾದೆಯೂ ಇಂಥ ಆಯೋಜನೆಗಳ ಹಿಂದಿದೆ. ಆದರೆ, ಇಂಥ ಪ್ರಯತ್ನಗಳು ಭಾರತದ ಏಕತೆ ಮತ್ತು ಅಖಂಡತೆಗೆ ಸವಾಲು ಒಡ್ಡುತ್ತವೆ ಎಂದು ಕೇಂದ್ರ ಸರ್ಕಾರ ಇಂಥ ಜನಾಭಿಪ್ರಾಯ ಸಂಗ್ರಹವನ್ನು ವಿರೋಧಿಸಿದೆ.
