ಸರಳವಿಲ್ಲ, ಗೊಂದಲವೇ ಎಲ್ಲ: ಪ್ರಮುಖವಾಗಿ ಮಾರ್ಗಸೂಚಿ ಕನ್ನಡದಲ್ಲಿ ಪ್ರಕಟಿಸುವುದೇ ಇಲ್ಲ. ತಾಂತ್ರಿಕ ಕಾರಣ ನೆಪವೊಡ್ಡಿ ಇಂಗ್ಲಿಷ್ನಲ್ಲಿ ಹೊರತರಲಾಗುತ್ತದೆ. ಸರ್ಕಾರಿ ಭಾಷೆ ಅರ್ಥವಾಗುವಂತಿಲ್ಲ. ಗೊಂದಲ ಇದ್ದರೆ ಯಾರನ್ನು ಕೇಳುವುದೆಂಬ ಬಗ್ಗೆಯೂ ಸ್ಪಷ್ಟತೆ ಇಲ್ಲ. ಎಲ್ಲ ಊರುಗಳಲ್ಲಿ ಇ-ಕಾಮರ್ಸ್, ಡೋಂಜೋ, ಡೋರ್ ಡೆಲಿವರಿ ವ್ಯವಸ್ಥೆ ಇರುವುದಿಲ್ಲ. ಅಂತಹ ಕಡೆ ಪರ್ಯಾಯ ವ್ಯವಸ್ಥೆ ಏನೆಂಬ ಬಗ್ಗೆ ಮಾರ್ಗಸೂಚಿಯಲ್ಲಿ ಮಾಹಿತಿ ಇಲ್ಲ. ಪಾಸ್ ನೀಡುವುದರಿಂದ ದುರುಪಯೋಗವಾಗುತ್ತದೆ ಎಂದು ಸರ್ಕಾರ ಹೇಳುತ್ತದೆ, ಹಾಗಿದ್ದರೆ ಆಕಸ್ಮಿಕವಾಗಿ ಎದುರಾಗುವ ಸಮಸ್ಯೆಗೆ ಪರಿಹಾರ ಯಾರಲ್ಲಿ ಕಂಡು ಕೊಳ್ಳಬೇಕೆಂಬ ಸ್ಪಷ್ಟತೆಯನ್ನಾದರೂ ನೀಡಬೇಕಾಗುತ್ತದೆ. ಕೆಲ ಪ್ರಕರಣದಲ್ಲಿ ಪರ ಊರಿನಲ್ಲಿರುವ ಅನಾರೋಗ್ಯಪೀಡಿತ ವಯೋವೃದ್ಧ ಪಾಲಕರನ್ನು ಭೇಟಿ ಮಾಡುವ ಜರೂರತ್ತು ಎದುರಾದಾಗ ವಾಹನ ಸಂಚಾರ ಹೇಗೆ? ಯಾರಲ್ಲಿ ಅನುಮತಿ ಪಡೆಯಬೇಕು ಎಂದು ಕೇಳುವ ಅವಕಾಶವನ್ನೂ ಸರ್ಕಾರ ನೀಡಿಲ್ಲ.
