ಕೈಗಾರಿಕೆ ಆರಂಭಕ್ಕೆ ಒಂದೇ ಅನುಮತಿ; ಬಂಡವಾಳ ಆಕರ್ಷಣೆ, ಉದ್ಯೋಗ ಸೃಷ್ಟಿಗೆ ಮಹತ್ವದ ಹೆಜ್ಜೆ

ಬೆಂಗಳೂರು: ಉದ್ಯಮ ಆರಂಭಿಸಲು ಅನುಕೂಲಕರ ವಾತಾವರಣ ನಿರ್ವಿುಸುವ ನಿಟ್ಟಿನಲ್ಲಿ ರಾಜ್ಯ ಸರ್ಕಾರ ಮಹತ್ವದ ಸುಗ್ರೀವಾಜ್ಞೆ ತರುತ್ತಿದ್ದು, ಗುರುವಾರ ನಡೆದ ಸಂಪುಟ ಸಭೆಯಲ್ಲಿ ಕರ್ನಾಟಕ ಕೈಗಾರಿಕಾ ಸೌಲಭ್ಯ ವಿಧೇಯಕಕ್ಕೆ ಅನುಮೋದನೆ ನೀಡಲಾಯಿತು.

ಸರ್ಕಾರದ ಈ ತೀರ್ಮಾನ ದೇಶದಲ್ಲೇ ಮೊದಲು ಎಂಬುದು ವಿಶೇಷ ಸಂಗತಿ. ಗುಜರಾತ್ ಮತ್ತು ರಾಜಸ್ಥಾನದಲ್ಲಿ ಇದೇ ರೀತಿ ರಿಯಾಯಿತಿ ಸಣ್ಣ ಕೈಗಾರಿಕೆಗಳಿಗೆ ಮಾತ್ರ ಇದೆ. ಆದರೆ, ಇಲ್ಲಿ ಸಣ್ಣ, ಮಧ್ಯಮ, ಬೃಹತ್ ಉದ್ದಿಮೆ ಸ್ಥಾಪನೆಗೆ ಈ ಕಾಯ್ದೆ ಅನ್ವಯವಾಗಲಿದೆ.

ಸಂಪುಟ ಸಭೆ ಬಳಿಕ ಈ ಬಗ್ಗೆ ವಿವರಣೆ ನೀಡಿದ ಕೈಗಾರಿಕೆ ಸಚಿವ ಜಗದೀಶ್ ಶೆಟ್ಟರ್, ಕರ್ನಾಟಕ ಕೈಗಾರಿಕಾ ಸೌಲಭ್ಯ ಅಧಿನಿಯಮ 2002 ಇದಕ್ಕೆ ತಿದ್ದುಪಡಿಯನ್ನು ಸೇರಿಸಿ ಸಂಪುಟದಲ್ಲಿ ಅನುಮತಿ ಪಡೆದಿದ್ದೇವೆ. ಇಡೀ ಕೈಗಾರಿಕಾ ಕ್ಷೇತ್ರದಲ್ಲಿ ಬದಲಾವಣೆ ತರುವ ಐತಿಹಾಸಿಕ ನಿರ್ಧಾರ ಕೈಗೊಂಡಿದ್ದೇವೆ ಎಂದರು.

ಪ್ರಧಾನಿ ನರೇಂದ್ರ ಮೋದಿ ಹಾಗೂ ನಮ್ಮ ಕೈಗಾರಿಕೆ ಇಲಾಖೆ ಈಸ್ ಆಫ್ ಡೂಯಿಂಗ್ ಬಿಜಿನೆಸ್ ಎಂದು ಹೇಳುತ್ತಿರುತ್ತೇವೆ, ಕೈಗಾರಿಕೆ ಆರಂಭಿಸಲು ಬರುವವರಿಗೆ ತಕ್ಷಣವೇ ಅನುಮತಿ ಸಿಗಬೇಕು. ಏಕಗವಾಕ್ಷಿ ಪದ್ಧತಿ ಸೌಲಭ್ಯ ಅಥವಾ ಭೂಪರಿವರ್ತನೆ ಇರಬಹುದು, ಎಲ್ಲವೂ ಬೇಗನೇ ಆಗಬೇಕೆಂಬ ವಿಚಾರದಲ್ಲಿ ಈ ತೀರ್ಮಾನ ಸಹಕಾರಿಯಾಗಲಿದೆ ಎಂದರು.

ಕಾರ್ಯನಿರ್ವಹಣೆ:

1. ಉದ್ಯಮ ಆರಂಭಿಸಲು ಮುಂದೆ ಬರುವವರು ನೇರವಾಗಿ ಕೈಗಾರಿಕೆ ಇಲಾಖೆಯ ಉದ್ಯೋಗ ಮಿತ್ರಕ್ಕೆ ಅರ್ಜಿ ಸಲ್ಲಿಸಬೇಕು. ಸರ್ಕಾರದ ಉನ್ನತ ಮಟ್ಟದ ಸಮಿತಿ ದಾಖಲಾತಿ ಪರಿಶೀಲಿಸಿ ಅನುಮತಿ ನೀಡುತ್ತದೆ.

2. ಅನುಮತಿ ನೀಡಲು ರಾಜ್ಯಮಟ್ಟದಲ್ಲಿ ಉನ್ನತ ಮಟ್ಟದ ಸಮಿತಿ, ಜಿಲ್ಲಾ ಮಟ್ಟದಲ್ಲಿ ಒಂದು ಸಮಿತಿ ಇರಲಿದೆ. ಪ್ರಾಜೆಕ್ಟ್ ರಿಪೋರ್ಟ್ ಆಧಾರದಲ್ಲಿ ಯಾವ ಸಮಿತಿ ಅನುಮತಿ ನೀಡಬೇಕೆಂಬುದು ನಿರ್ಧಾರವಾಗುತ್ತದೆ.

3. 15 ಕೋಟಿ ರೂ. ಒಳಗಿನ ಉದ್ದಿಮೆಗೆ ಜಿಲ್ಲಾ ಮಟ್ಟದ ಸಮಿತಿ ಅನುಮತಿ ಸಾಕಾಗುತ್ತದೆ. ಸಮಿತಿ ಕ್ಲಿಯರೆನ್ಸ್ ಕೊಟ್ಟ ಬಳಿಕ ಅಕ್ನಾಲೆಡ್ಜ್​ಮೆಂಟ್ ಇಟ್ಟುಕೊಂಡು ಉದ್ದಿಮೆ ಕೆಲಸ ಆರಂಭಿಸಬಹುದು. ಬೇರೆ ಯಾವ ಅನುಮತಿ ಬೇಕಿಲ್ಲ.

4. ಸಮಿತಿ ಅನುಮತಿ ಪಡೆದು ಸಿವಿಲ್ ಕೆಲಸ, ಕಟ್ಟಡ ಕಾಮಗಾರಿ, ಯಂತ್ರೋಪಕರಣ ಸ್ಥಾಪನೆ ಕೆಲಸ ಮಾಡಿಕೊಳ್ಳಬಹುದು. ಉತ್ಪಾದನೆ ಆರಂಭಿಸುವುದರೊಳಗೆ ಅಗತ್ಯ ಅನುಮತಿ ಪಡೆದುಕೊಂಡರೆ ಸಾಕು.

5. ಮೂರು ವರ್ಷದೊಳಗೆ ಗ್ರಾಮ ಪಂಚಾಯಿತಿ ಅನುಮತಿ, ಕಟ್ಟಡ ಪ್ಲ್ಯಾನ್​ಗೆ ಅನುಮತಿ, ಕಂದಾಯ ಇಲಾಖೆ, ಮಾಲಿನ್ಯ ನಿಯಂತ್ರಣ ಅನುಮತಿ ಪಡೆದರೆ ಸಾಕಾಗುತ್ತದೆ. ಆದರೆ ಸ್ವಯಂ ದೃಢೀಕರಣ ಕಡ್ಡಾಯ.

ಸಚಿವರಿಗೆ ಸಮನ್ವಯದ ಜವಾಬ್ದಾರಿ: ಬೆಂಗಳೂರಿನ ಕರೊನಾ ಪರಿಸ್ಥಿತಿ ಹತೋಟಿಗೆ ತರುವ ವಿಚಾರದಲ್ಲಿ ಬೆಂಗಳೂರಿನ ಸಚಿವರಿಗೆ ಪರಸ್ಪರ ಸಮನ್ವಯದಿಂದ ಜವಾಬ್ದಾರಿ ನಿರ್ವಹಿಸುವಂತೆ ಮುಖ್ಯಮಂತ್ರಿ ಕಟ್ಟುನಿಟ್ಟಾಗಿ ಸೂಚಿಸಿದ್ದಾರೆ. ಕರೊನಾ ನಿಯಂತ್ರಣ, ನಿರ್ವಹಣಾ ಉಪಕ್ರಮಗಳ ವಿಷಯದಲ್ಲಿ ಬೆಂಗಳೂರು ದೇಶಕ್ಕೆ ಮಾದರಿಯಾಗಿದೆ. ಹೀಗಾಗಿ ಹೆಚ್ಚುತ್ತಿರುವ ಸೋಂಕು ನಿಯಂತ್ರಿಸಲು, ಮಾಡಿಕೊಂಡಿರುವ ಪ್ಲಾ್ಯನ್ ಜಾರಿ ಸಂಬಂಧ ಸಚಿವರು ಪರಸ್ಪರ ಸಮನ್ವಯ ಸಾಧಿಸಿ, ಆಯಾ ಇಲಾಖೆಗಳಿಂದ ಕೆಲಸ ತೆಗೆದುಕೊಳ್ಳುವಂತೆ ಸಿಎಂ ಸಲಹೆ ನೀಡಿದರು ಎಂದು ಮೂಲಗಳು ತಿಳಿಸಿವೆ. ಕ್ವಾರಂಟೈನ್​ನಲ್ಲಿರುವ ವೈದ್ಯಕೀಯ ಶಿಕ್ಷಣ ಸಚಿವ ಡಾ.ಕೆ.ಸುಧಾಕರ್ ಆನ್​ಲೈನ್ ಮೂಲಕ ಮುಖ್ಯಮಂತ್ರಿ ಕರೆದಿದ್ದ ಸಭೆಯಲ್ಲಿ ಭಾಗವಹಿಸಿದ್ದರು. ಖಾಸಗಿ ಆಸ್ಪತ್ರೆಗಳ ಜತೆ ರ್ಚಚಿಸಲು ಸಚಿವ ಆರ್.ಅಶೋಕ್ ಅವರಿಗೆ ನೆರವಾಗುವಂತೆ ಮುಖ್ಯಮಂತ್ರಿ ಸೂಚನೆ ನೀಡಿದರು.

ಎಲೆಕ್ಟ್ರಿಕ್ ವಾಹನ ಉದ್ಯಮಕ್ಕೆ ಶೇ.100 ವಿನಾಯಿತಿ: ಕರ್ನಾಟಕ ವಿದ್ಯುತ್ ವಾಹನ ಮತ್ತು ಇಂಧನ ಸಂಗ್ರಹಣಾ ನೀತಿ ಇದೆ. ಅದಕ್ಕೆ ಪೂರಕವಾಗಿ ಎಲೆಕ್ಟ್ರಿಕ್ ವೆಹಿಕಲ್ ಉದ್ಯಮಕ್ಕೆ ಸಂಬಂಧಪಟ್ಟಂತೆ ನೋಂದಣಿ, ಸ್ಟ್ಯಾಂಪ್ ಡ್ಯೂಟಿಗೆ ಶೇ.100 ವಿನಾಯಿತಿ ನೀಡಲು ಸರ್ಕಾರ ನಿರ್ಧರಿಸಿದೆ. ‘ಇನ್ನು ನಾಲ್ಕೈದು ವರ್ಷದಲ್ಲಿ ಇಡೀ ದೇಶದಲ್ಲಿ ಎಲೆಕ್ಟ್ರಿಕಲ್ ವಾಹನ ಉತ್ಪಾದನೆ, ಬಳಕೆ ಹೆಚ್ಚಾಗುತ್ತದೆ ಎಂದು ಕೇಂದ್ರ ಸಚಿವ ನಿತಿನ್ ಗಡ್ಕರಿ ಅಭಿಪ್ರಾಯಪಟ್ಟಿದ್ದಾರೆ, ಕರ್ನಾಟಕದಲ್ಲಿ ಸಹ ಎಲೆಕ್ಟ್ರಿಕ್ ವೆಹಿಕಲ್ ಉತ್ಪಾದನೆ ಮತ್ತು ಬಳಕೆಗೆ ಹೆಚ್ಚಿನ ಸ್ಕೋಪ್ ಇದೆ. ಆ ದೃಷ್ಟಿಯಿಂದ ಕಂದಾಯ ಇಲಾಖೆಯು ಈ ತೀರ್ಮಾನ ಮಾಡಿದೆ’ ಎಂದು ಸಚಿವ ಜಗದೀಶ್ ಶೆಟ್ಟರ್ ಹೇಳಿದರು.

ಸಂಪುಟದ ಪ್ರಮುಖ ನಿರ್ಧಾರಗಳು: 

• ಪಾಂಡವಪುರ ಸಕ್ಕರೆ ಕಾರ್ಖಾನೆಯನ್ನು ನಿರಾಣಿ ಮೆ.ಶುಗರ್ಸ್​ಗೆ 405 ಕೋಟಿ ರೂ.ಗೆ 40 ವರ್ಷಕ್ಕೆ ಗುತ್ತಿಗೆ ನೀಡಲು ನಿರ್ಧಾರ, ಮಂಡ್ಯ ಮೈಶುಗರ್ಸ್ ಬಗ್ಗೆ ಇನ್ನೊಂದು ಸಭೆ ಮಾಡಲು ತೀರ್ಮಾನ.
• ಜೀವರಕ್ಷಣ ಉಪಕರಣ ಹೊಂದಿರುವ ಉನ್ನತ ಮಾದರಿಯ 120 ಅಂಬುಲೆನ್ಸ್ ಖರೀದಿಗೆ 32.04 ಕೋಟಿ ರೂ.
• ವಿವಿಧ ವಸತಿ ಯೋಜನೆಗಳನ್ನು ಪೂರ್ಣಗೊಳಿಸಲು 10,194 ಕೋಟಿ ರೂ. ಬಿಡುಗಡೆ
• ಪದ್ಮ ಪುರಸ್ಕಾರಗಳಿಗೆ ರಾಜ್ಯದಿಂದ ಅರ್ಹ ವ್ಯಕ್ತಿಗಳ ಹೆಸರು ಶಿಫಾರಸು ಮಾಡಲು ಸಂಪುಟ ಉಪಸಮಿತಿ ರಚನೆ
• ಸಚಿವರು, ಶಾಸಕರು, ವಿಧಾನಸಭಾಧ್ಯಕ್ಷ, ಉಪಸಭಾಧ್ಯಕ್ಷ, ವಿಧಾನಪರಿಷತ್ ಸಭಾಪತಿ ಮತ್ತು ಉಪಸಭಾಪತಿ
• ವೇತನವನ್ನು ಒಂದು ವರ್ಷದ ಅವಧಿಗೆ ಶೇ.30 ಕಡಿತ ಮಾಡಲು ಮಸೂದೆ.
• ಹಾಸನ ಜಿಲ್ಲೆ ಮೊಸಳೆ ಹೊಸಳ್ಳಿಯಲ್ಲಿ ಸರ್ಕಾರಿ ಶಾಲೆಯ 20 ಎಕರೆ ಜಮೀನಿನಲ್ಲಿ 15 ಎಕರೆಯನ್ನು ಸರ್ಕಾರಿ ಇಂಜಿನಿಯರಿಂಗ್ಕಾ ಲೇಜಿಗೆ, 5 ಎಕರೆ ಸರ್ಕಾರಿ ಪಾಲಿಟೆಕ್ನಿಕ್​ಗೆ ನೀಡಲು ತೀರ್ವನ.
• ಬೈಯ್ಯಪ್ಪನ ಪಾಳ್ಯ- ಹೊಸೂರು ನಡುವೆ 48 ಕಿ.ಮಿ, ಯಶವಂತ ಪುರ- ಚೆನ್ನಸಂದ್ರ ನಡುವೆ 21.7 ಕಿ.ಮೀ. ಎರಡು ರೈಲ್ವೆ ಹಳಿ ಜೋಡಿ ಮಾರ್ಗಕ್ಕೆ ರಾಜ್ಯದ ಪಾಲು 406 ಕೋಟಿ ನೀಡಲು ಒಪ್ಪಿಗೆ.
• ಖಾಸಗಿ ಸಾರ್ವಜನಿಕ ಸಹಭಾಗಿತ್ವದಲ್ಲಿ ಬೆಂಗಳೂರು ಉಪನಗರ ರೈಲು ಯೋಜನೆಯನ್ನು ವಿಶೇಷ ವಾಹನ ಉದ್ದೇಶದ ಮೂಲಕ ಪರಿಷ್ಕೃತ ಅಂದಾಜು 15,765 ಕೋಟಿ ರೂ.ಗೆ ತಾತ್ವಿಕ ಅನುಮೋದನೆ.
• ಕಾವೇರಿ ಜಲ ನಿರ್ವಹಣೆ ಪ್ರಾಧಿಕಾರಕ್ಕೆ ರಾಜ್ಯದ ಪಾಲು 4 ಕೋಟಿ ರೂ. ಕೊಡಲು ತೀರ್ವನ.
• ಬೆಂಗಳೂರು ನಗರ ಜಿಲ್ಲಾ ಪಂಚಾಯಿತಿಗೆ ಸೇರಿದ ಆಸ್ಪತ್ರೆ, ಆರೋಗ್ಯ ಕೇಂದ್ರಗಳನ್ನು ಕೋವಿಡ್ ಅವಧಿವರೆಗೆ ಬಿಬಿಎಂಪಿ ಅಧಿಕಾರ ವ್ಯಾಪ್ತಿಗೆ ಹಸ್ತಾಂತರ.
• ಅಥಣಿ ತಾಲೂಕಿನ ಗುರು ಸಿದ್ದರಾಮೇಶ್ವರ ನೀರಾವರಿ ಸಂಘದಿಂದ ಜಮೀನುಗಳಿಗೆ ನೀರು ಕೊಡಲು ಎಸ್​ಸಿಪಿ ಟಿಎಸ್​ಪಿ ಯೋಜನೆ ಅಡಿ 21 ಕೋಟಿ ರೂ. ಕೊಡಲು ಅನುಮತಿ ನೀಡಲಾಗಿದೆ. 147 ಫಲಾನುಭವಿಗಳಿಗೆ ಅನುಕೂಲವಾಗಲಿದ್ದು, 202 ಹೆಕ್ಟೇರ್​ಗೆ ನೀರು ಕೊಡಲಾಗುತ್ತದೆ.
• ಕೆ.ಸಿ.ವ್ಯಾಲಿ ಯೋಜನೆಯಲ್ಲಿ ಕಾಡ ಬೀಸನಹಳ್ಳಿ ಎಸ್​ಟಿಪಿಯಿಂದ 40 ಎಂಎಲ್​ಡಿ ನೀರನ್ನು ವಿವಿಧ ಕೈಗಾರಿಕಾ ಪ್ರಾಂಗಣಕ್ಕೆ ಒದಗಿಸಲು ತೀರ್ಮಾನ. ಈಗಾಗಲೇ ಅನೇಕ ಕೈಗಾರಿಕಾ ಕಟ್ಟಡಗಳು ಕಾರ್ಯನಿರತವಾಗಿವೆ. ಆ ಕೈಗಾರಿಕೆಗಳಿಗೆ ನೀರು ಪೂರೈಸುವ ಅಗತ್ಯವಿದೆ. ವೆಚ್ಚವನ್ನು ಕೆಐಡಿಬಿ ಭರಿಸಲಿದೆ.

ಟಿಟಿಡಿ ಕಾಮಗಾರಿ: ತಿರುಪತಿಯ ತಿರುಮಲದಲ್ಲಿ ರಾಜ್ಯ ಎಕರೆ 5 ಸೆಂಟ್ಸ್ ಜಮೀನು ಹೊಂದಿದೆ. ಅಲ್ಲಿ ಯಾತ್ರಾರ್ಥಿಗಳಿಗೆ ಸೌಲಭ್ಯ ಒದಗಿಸಲು ಟಿಟಿಡಿ ಜತೆ ಸೇರಿ ಕಾಮಗಾರಿ ನಡೆಸಲು ಸಂಪುಟ ಒಪ್ಪಿಗೆ ನೀಡಿದೆ. ರಾಜ್ಯ ಸರ್ಕಾರ 200 ಕೋಟಿ ರೂ. ಬಂಡವಾಳ ಹಾಕಲಿದೆ. ಕಲ್ಯಾಣ ಮಂಟಪ, ಕಲ್ಯಾಣಿ, ಅತಿಥಿ ಗೃಹ, 300 ಕೊಠಡಿ ಮತ್ತಿತರ ಸೌಲಭ್ಯಗಳನ್ನು ಕಲ್ಪಿಸಲಾಗುತ್ತದೆ.