ಕನ್ನಡದ ‘ಹಾಲು ಜೇನು’, ‘ದೇವತಾ ಮನುಷ್ಯ’, ಮೂಕಿ ಸಿನಿಮಾ ‘ಪುಷ್ಪಕ ವಿಮಾನ’ ಸೇರಿ 60ಕ್ಕೂ ಅಧಿಕ ಸಿನಿಮಾಗಳಿಗೆ ಆ್ಯಕ್ಷನ್ ಕಟ್ ಹೇಳಿರುವ ಖ್ಯಾತಿ ಸಿಂಗೀತಂ ಶ್ರೀನಿವಾಸ ರಾವ್ ಅವರಿಗೆ ಸಲ್ಲುತ್ತದೆ. ಅವರಿಗೆ ಈಗ 94 ವರ್ಷ ವಯಸ್ಸು. ಈ ಇಳಿ ವಯಸ್ಸಿನಲ್ಲೂ ಅವರು 19ರ ಉತ್ಸಾಹಿಯಂತೆ ಸಿನಿಮಾ ನಿರ್ದೇಶನಕ್ಕಿಳಿದಿರುವುದು ಗೊತ್ತೇ ಇದೆ. ತೆಲುಗಿನ ‘ವೆಲ್ಕಂ ಒಬಾಮಾ’ ತೆರೆಕಂಡು 13 ವರ್ಷಗಳ ಬಳಿಕ ಮತ್ತೆ ಶ್ರೀನಿವಾಸ ರಾವ್ ಡೈರೆಕ್ಟರ್ ಕ್ಯಾಪ್ ಧರಿಸಿ, ಕಳೆದ ಫೆಬ್ರವರಿಯಲ್ಲಿ ಹೊಸ ಸಿನಿಮಾ ಘೋಷಿಸಿದ್ದರು. ಆದರೆ, ಚಿತ್ರದ ಟೈಟಲ್ ಮಾತ್ರ ರಿವೀಲ್ ಮಾಡಿರಲಿಲ್ಲ. ಈಗಾಗಲೇ ಬಹುತೇಕ ಚಿತ್ರೀಕರಣ ಮುಗಿಸಿರುವ ಚಿತ್ರದ ಶೀರ್ಷಿಕೆ ಇದೀಗ ಘೋಷಣೆಯಾಗಿದ್ದು, ‘ಸಿಂಗ್ ಗೀತಂ’ ಎಂದು ಟೈಟಲ್ ಫಿಕ್ಸ್ ಮಾಡಲಾಗಿದೆ. ನಿರ್ದೇಶಕರ ಹೆಸರನ್ನೇ ಆಕರ್ಷಣೀಯವಾಗಿ ಟೈಟಲ್ ಮಾಡಿರುವುದು ವಿಶೇಷತೆ. ಇತ್ತೀಚೆಗೆ ಟೀಸರ್ ಕೂಡ ರಿಲೀಸ್ ಮಾಡಲಾಗಿದ್ದು, ಗಣಿ ಪ್ರದೇಶದ ಹಳ್ಳಿಯೊಂದರಲ್ಲಿ ನಡೆಯುವ ಕಥೆ ಇದಾಗಿದೆ. ಜನರು ಚಿನ್ನದ ಹುಡುಕಾಟದಲ್ಲಿರುವಾಗ ಆ ಹಳ್ಳಿಗೆ ಯುವಕನೊಬ್ಬನ ಪ್ರವೇಶವಾಗುತ್ತದೆ. ಆಗ ನಡೆಯುವ ಸಂಘರ್ಷಗಳನ್ನೇ ಟೀಸರ್ನಲ್ಲಿ ಸಂಕ್ಷಿಪ್ತವಾಗಿ ತೋರಿಸಲಾಗಿದೆ. ಕೇವಲ ನಾಲ್ಕೇ ತಿಂಗಳಲ್ಲಿ ಇಡೀ ಸಿನಿಮಾದ ಚಿತ್ರೀಕರಣ ಪೂರ್ಣಗೊಳಿಸಲಾಗಿದೆ. ತಮ್ಮ ಸಂಧ್ಯಾಕಾಲದಲ್ಲೂ ಸಿಂಗೀತಂ ಶ್ರೀನಿವಾಸ ರಾವ್ ತೋರಿರುವ ಸೃಜನಶೀಲ ಪ್ರಯತ್ನಕ್ಕೆ ಇಡೀ ಟಾಲಿವುಡ್ ತಲೆದೂಗಿದೆ. ಇದೊಂದು ಮ್ಯೂಸಿಕಲ್ ್ಯಾಂಟಸಿ ಚಿತ್ರವಾಗಿರಲಿದ್ದು, ನವ ಪ್ರತಿಭೆಗಳಾದ ಆಯಾನ್, ಅಹಲ್ಯಾ ಬಾಮ್ರೂ, ಶಾಲಿನಿ ಕಲಾಬಳಗದಲ್ಲಿದ್ದಾರೆ. ಇದೇ ಜೂನ್ 11ರಂದು ‘ಸಿಂಗ್ ಗೀತಂ’ ಚಿತ್ರ ತೆರೆಗೆ ಬರಲಿದೆ. -ಏಜೆನ್ಸೀಸ್
