ಸೈನಿಕರನ್ನು ಹುರಿದುಂಬಿಸಿದ ವಾಜಪೇಯಿ: ದೇಶಕ್ಕಾಗಿ ಪ್ರಾಣವನ್ನೇ ಒತ್ತೆ ಇಟ್ಟು ಹೋರಾಡುವ ಸೈನಿಕರಿಗೆ ದೂರದಿಂದ ಶುಭಾಶಯ ಹಾರೈಸುವ ರಾಜಕಾರಣಿಗಳು ಬೇಕಾದಷ್ಟು ಸಿಗುತ್ತಾರೆ. ಆದರೆ, ಯುದ್ಧ ನಡೆಯುವಾಗಲೇ ಸ್ವಯಂ ಯುದ್ಧರಂಗಕ್ಕೆ ಹೋಗಿ ಅಲ್ಲಿನ ಸೈನಿಕರ ಬೆನ್ನು ತಟ್ಟಿ ಪ್ರೋತ್ಸಾಹಿಸಿದ ಅಟಲ್ ಬಿಹಾರಿ ವಾಜಪೇಯಿ ನಮ್ಮ ಮುಂದೆ ಆದರ್ಶರಾಗಿ ನಿಲ್ಲುತ್ತಾರೆ. ಕಾರ್ಗಿಲ್ ಯುದ್ಧ ನಡೆಯುತ್ತಿರುವಾಗಲೇ ಜೂನ್ 13 ರಂದು ಅವರು ಕಾರ್ಗಿಲ್ ವಲಯಕ್ಕೆ ಹೋಗುವುದು ನಿಶ್ಚಯವಾಗಿತ್ತು. ಸೈನಿಕರಿಗೆ ಇದು ಅತ್ಯಂತ ಸಡಗರದ ಸಂಗತಿಯಾಗಿತ್ತು. ಆದರೆ, ಶತ್ರುರಾಷ್ಟ್ರ ಇದನ್ನು ಗಂಭೀರವಾಗಿ ಪರಿಗಣಿಸಿತ್ತು. ಉಗ್ರಗಾಮಿಗಳಂತೂ ಹೇಗೆ ಭೇಟಿ ನೀಡುತ್ತಾರೋ ನೋಡೋಣ ಎಂದು ಸವಾಲೆಸೆದಿದ್ದರು. ಅದಕ್ಕೆ ತಕ್ಕಂತೆ ಹಿಂದಿನ ದಿನದಿಂದಲೇ ಪಾಕ್ ಸೈನಿಕರಿಂದ ಸತತ ಶೆಲ್ ದಾಳಿ ನಡೆಯತ್ತಲೇ ಇತ್ತು. ಆದರೂ ವಾಜಪೇಯಿ ಧೃತಿಗೆಡಲಿಲ್ಲ, ನಿರ್ಧಾರ ಬದಲಿಸಲಿಲ್ಲ. ಕಾರ್ಗಿಲ್ನ ಮುಂಚೂಣಿ ಪ್ರದೇಶವಾದ ಬರೂ ಗ್ರಾಮಕ್ಕೆ ಹೊರಟೇಬಿಟ್ಟರು. ಅವರು ಇಳಿದ ಹೆಲಿಪ್ಯಾಡ್ನಿಂದ ಎರಡು-ಮೂರು ಕಿ.ಮೀ. ಅಂತರದಲ್ಲೇ ಐದು ಶೆಲ್ಗಳು ಸ್ಪೋಟಿಸಿದವು. ಸೈನಿಕರು ಮತ್ತು ಸ್ಥಳೀಯ ನಿವಾಸಿಗಳನ್ನು ಉದ್ದೇಶಿಸಿ ಮಾತನಾಡಬೇಕೆಂದಿದ್ದ ವಿಭಾಗೀಯ ಆಯುಕ್ತರ ಕಚೇರಿ ಶೆಲ್ ದಾಳಿಯಿಂದ ಸಂಪೂರ್ಣ ಧ್ವಂಸವಾಯಿತು. ಆದರೂ ಹಿಂಜರಿಯದ ವಾಜಪೇಯಿ ಬೇರೊಂದು ಸ್ಥಳದಲ್ಲಿ ಸೈನಿಕರನ್ನು ಉದ್ದೇಶಿಸಿ ಮಾತನಾಡಿದರು. ‘ಇಡೀ ದೇಶ ನಿಮ್ಮೊಂದಿಗಿದೆ, ನಿಮ್ಮ ಬಗ್ಗೆ ಎಲ್ಲರಿಗೂ ಅಭಿಮಾನವಿದೆ, ಮುನ್ನುಗ್ಗಿ ಶತ್ರುಗಳನ್ನು ಸದೆ ಬಡಿಯಿರಿ’ ಎಂದು ಸೈನಿಕರ ದೇಶಪ್ರೇಮವನ್ನು ಕೊಂಡಾಡಿ, ಅವರಲ್ಲಿ ಆತ್ಮಸ್ಥೈರ್ಯ ತುಂಬಿದರು.
