ತಮಿಳಿನಲ್ಲಿ ಈಗಾಗಲೇ ‘ತೆನಾಲಿರಾಮನ್’, ‘ಪೊಟ್ಟಾ ಪೊಟ್ಟಿ’ ‘ಎಲಿ’ ಸಿನಿಮಾ ನಿರ್ದೇಶನ ಮಾಡಿರುವ ಯುವರಾಜ್ ದಯಾಳನ್, ಈ ಹೊಸ ಸಿನಿಮಾಕ್ಕೆ ಆಕ್ಷನ್-ಕಟ್ ಹೇಳುತ್ತಿದ್ದಾರೆ. ಎಲ್ಲವೂ ಅಂದುಕೊಂಡಂತೆ ಆಗಿದ್ದರೆ, ಇನ್ನೂ ಶೀರ್ಷಿಕೆ ಅಂತಿಮವಾಗದ ಈ ಚಿತ್ರದಲ್ಲಿ ನಾಯಕಿಯಾಗಿ ನಯನತಾರಾ ನಟಿಸಬೇಕಿತ್ತು. ಅವರ ಆಯ್ಕೆಯೂ ಆಗಿತ್ತು. ನಯನತಾರಾ, ಶಾರುಖ್ ಖಾನ್ ಜತೆಗಿನ ಸಿನಿಮಾ ಒಪ್ಪಿದ್ದರಿಂದ, ಡೇಟ್ಸ್ ಸಮಸ್ಯೆ ಎದುರಾಗಿ, ಯುವರಾಜ್ ಚಿತ್ರ ಕೈಬಿಟ್ಟು ಮುಂಬೈಗೆ ಹಾರಬೇಕಾಯಿತು. ಹಾಗಾಗಿ, ನಯನತಾರಾ ಮಾಡಬೇಕಿದ್ದ ಪಾತ್ರ ಶ್ರದ್ಧಾ ಶ್ರೀನಾಥ್ ಪಾಲಾಯಿತು. ಶ್ರದ್ಧಾ ಈಗಾಗಲೇ ಸಿನಿಮಾ ಚಿತ್ರೀಕರಣದಲ್ಲಿ ಭಾಗವಹಿಸಿದ್ದಾರಂತೆ. ಚಿತ್ರದ ಕಥೆ ಏನು? ಶ್ರದ್ಧಾ ಪಾತ್ರವೇನು? ಅವರ ಜತೆಗೆ ಯಾರೆಲ್ಲಾ ನಟಿಸುತ್ತಿದ್ದಾರೆ? ಎಂಬ ವಿಷಯಗಳನ್ನು ಚಿತ್ರತಂಡದವರು ಇನ್ನೂ ಬಿಟ್ಟುಕೊಟ್ಟಿಲ್ಲ.ಈ ಬಗ್ಗೆ ಮುಂದಿನ ದಿನಗಳಲ್ಲಿ ಚಿತ್ರತಂಡ ಮಾಹಿತಿ ನೀಡಲಿದೆಯಂತೆ.
