ರೆಡ್​ ಜೋನ್​ನಲ್ಲೂ ಆರ್ಥಿಕ ಚಟುವಟಿಕೆ ಆರಂಭಕ್ಕೆ ರಾಜ್ಯ ಸರ್ಕಾರ ಗ್ರೀನ್​ ಸಿಗ್ನಲ್​, ಜಿಲ್ಲಾಧಿಕಾರಿಗಳ ಅನುಮತಿ ಅಗತ್ಯ

ಬೆಂಗಳೂರು: ಕೆಂಪು ವಲಯದಲ್ಲೂ (ರೆಡ್​ ಜೋನ್​) ಆರ್ಥಿಕ ಚಟುವಟಿಕೆ ಆರಂಭಿಸಲು ರಾಜ್ಯ ಸರ್ಕಾರ ಅನುಮತಿ ನೀಡಿದೆ. ಆಯಾ ಜಿಲ್ಲಾಧಿಕಾರಿಗಳ ಅನುಮತಿ ಪಡೆದು ಕಾರ್ಖಾನೆಗಳು, ಎಲೆಕ್ಟ್ರಿಕ್​ ಅಂಗಡಿಗಳು, ಟೈಲ್ಸ್​ ಅಂಗಡಿಗಳನ್ನು ತೆರಯಬಹುದು ಎಂದು ಸಚಿವ ಆರ್​. ಅಶೋಕ್​ ತಿಳಿಸಿದ್ದಾರೆ.

ಶನಿವಾರ ಸುದ್ದಿಗಾರರ ಜತೆ ಮಾತನಾಡಿದ ಅವರು, ಬೆಂಗಳೂರು ನಗರವನ್ನು 4 ವಲಯಗಳಾಗಿ ವಿಂಗಡಿಸಲು ನಿರ್ಧರಿಸಲಾಗಿದೆ. ವಿಧಾನಸಭಾ ಕ್ಷೇತ್ರವಾರು ವಿಂಗಡಣೆ ಮಾಡಲಾಗುವುದು ಎಂದರು.

ಇದನ್ನೂ ಓದಿ: ಸಿಎಂ ಬಿಎಸ್​ವೈ ಈ ಕೆಲಸ ಮಾಡಲಿಲ್ಲ ಅಂದ್ರೆ ಬದುಕಿದ್ದೂ ಸತ್ತಂತೆ: ಡಿ.ಕೆ.ಶಿವಕುಮಾರ್​

2 ಗಂಟೆಯಲ್ಲಿ ಸಿಗುತ್ತೆ ಅನುಮತಿ: ಅಂಗಡಿ ಮುಂಗಟ್ಟೆಗಳು, ಕಾರ್ಖಾನೆಗಳನ್ನು ತೆರೆಯಲು ಅರ್ಜಿ ಸಲ್ಲಿಸಿದ ಎರಡು ಗಂಟೆಗಳ ಒಳಗಾಗಿ ಜಿಲ್ಲಾಧಿಕಾರಿಗಳ ಕಚೇರಿಯಿಂದ ಅನುಮತಿ ದೊರೆಯುತ್ತದೆ ಎಂದು ಆರ್​. ಅಶೋಕ್​ ಹೇಳಿದರು.

ಈ ರೀತಿಯಾಗಿ ಅನುಮತಿ ಪಡೆದುಕೊಂಡು ವೋಲ್ವೋ ಕಂಪನಿ ಈಗಾಗಲೆ ಕಾರ್ಯಾರಂಭಿಸಿದೆ. ಕಾರ್ಖಾನೆಗಳು ಶೇ.33 ಉದ್ಯೋಗಿಗಳೊಂದಿಗೆ ಕಾರ್ಯನಿರ್ವಹಿಸಬಹುದು. ಉಳಿದ ಉದ್ಯೋಗಿಗಳು ಮನೆಯಿಂದಲೇ ಕೆಲಸ ಮಾಡುವುದು ಕಡ್ಡಾಯ ಎಂದು ಹೇಳಿದರು.

ಇದನ್ನೂ ಓದಿ: ಜಾಸ್ತಿ ಸಡಿಲ, ಸ್ವಲ್ಪ ಜಟಿಲ: 2 ವಾರ ಲಾಕ್​ಡೌನ್ ವಿಸ್ತರಣೆ, ಎಲ್ಲ ವಲಯಕ್ಕೂ ನಿರ್ಬಂಧಿತ ವಿನಾಯಿತಿ

ಮಾರ್ಕೆಟ್​ನಲ್ಲಿ ತರಕಾರಿ, ಹಣ್ಣು, ಔಷಧ ಮಾರಾಟಕ್ಕೆ ಮಾತ್ರ ಅನುಮತಿ ನೀಡಲಾಗಿದೆ. ಇನ್ನುಳಿದಂತೆ ಬೇರಾವುದೇ ಚಟುವಟಿಕೆಯನ್ನು ಅಲ್ಲಿ ನಿರ್ಬಂಧಿಸಲಾಗಿದೆ ಎಂದು ತಿಳಿಸಿದರು.

ಮದ್ಯದ ಬಗ್ಗೆ ಸಿಎಂ ತೀರ್ಮಾನ: ಎಲ್ಲೆಲ್ಲಿ ಮದ್ಯದಂಗಡಿಗಳನ್ನು ತೆರೆಯಬೇಕು. ಒಬ್ಬರಿಗೆ ಎಷ್ಟು ಪ್ರಮಾಣದ ಮದ್ಯ ಕೊಡಬೇಕು ಎಂಬ ಬಗ್ಗೆ ಸಿಎಂ ಬಿ.ಎಸ್​. ಯಡಿಯೂರಪ್ಪ ತೀರ್ಮಾನಿಸಲಿದ್ದಾರೆ. ಮದ್ಯಂಗಡಿಗಳಲ್ಲಿ ಪಾಲಿಸಬೇಕಾದ ಮಾರ್ಗಸೂಚಿಗಳನ್ನು ಕೂಡ ಅವರೇ ತೀರ್ಮಾನಿಸಲಿದ್ದಾರೆ ಎಂದು ಹೇಳಿದರು.

https://www.vijayavani.net/dubai-mall-re-opens-worlds-largest-mall-in-dubai/