ಶೀತ, ಜ್ವರ ನಿರ್ಲಕ್ಷಿಸದೆ ಚಿಕಿತ್ಸೆ ಪಡೆಯಿರಿ

ಹೊಳೆಹೊನ್ನೂರು: ಹವಾಮಾನ ಬದಲಾವಣೆಯಿಂದ ಶೀತ, ಜ್ವರ ಸಾಮಾನ್ಯವಾಗಿ ಕಾಣಿಸಿಕೊಳ್ಳುತ್ತಿದ್ದು, ಜನರು ಭಯಪಡದೆ ಸೂಕ್ತ ಚಿಕಿತ್ಸೆ ಪಡೆದುಕೊಳ್ಳಬೇಕು ಎಂದು ಶಾಸಕಿ ಶಾರದಾ ಪೂರ‌್ಯಾನಾಯ್ಕಾ ಹೇಳಿದರು.

ಪಟ್ಟಣ ಪಂಚಾಯಿತಿ ಆವರಣದಲ್ಲಿ 15ನೇ ಹಣಕಾಸು ಯೋಜನೆಯಡಿ ಹೊಸಕೊಪ್ಪದಲ್ಲಿ ನಮ್ಮ ಕ್ಲಿನಿಕ್‌ಗೆ ಔಷಧ ವಿತರಣೆ ಹಾಗೂ ಪಪಂ ತ್ಯಾಜ್ಯ ವಿಲೇವಾರಿ ನೂತನ ವಾಹನಗಳಿಗೆ ಹಸಿರು ನಿಶಾನೆ ತೋರಿ ಮಾತನಾಡಿ, ರಾಜ್ಯದಲ್ಲಿ ಕರೊನಾ ಭೀತಿ ಎದುರಾಗಿದ್ದರೂ ಜನರು ಭಯಪಡದೆ ಜಾಗ್ರತೆ ವಹಿಸಬೇಕು.ಔಷಧಗಳು ಸಕಾಲದಲ್ಲಿ ಹಂಚಿಕೆಯಾಗಬೇಕು. ಸ್ಥಳೀಯರು ಪಟ್ಟಣ ಪಂಚಾಯಿತಿ ಚುನಾವಣೆ ಎದುರು ನೋಡುತ್ತಿದ್ದಾರೆ. ಶೀಘ್ರದಲ್ಲಿ ಚುನಾವಣೆ ನಡೆದು ಅಭಿವೃದ್ಧಿ ಕೆಲಸಗಳಿಗೆ ಅನುಕೂಲವಾಗಬೇಕು ಎಂದು ತಿಳಿಸಿದರು.

ಪಪಂ ಅಭಿವೃದ್ಧಿ ಅಧಿಕಾರಿ ಮಂಜುನಾಥ್ ಮಾತನಾಡಿ, 15ನೇ ಹಣಕಾಸು ಅನುದಾನದಲ್ಲಿ 1.2 ಲಕ್ಷ ರೂ. ವೆಚ್ಚದಲ್ಲಿ ಔಷಧ ಖರೀದಿಸಿ ನೀಡಿದ್ದು, 4 ಲಕ್ಷ ರೂ. ಮೆಡಿಸಿನ್ ವಿಭಾಗಕ್ಕೆ ನೀಡಲಾಗಿದೆ. ಪಪಂ ತ್ಯಾಜ್ಯ ವಿಲೇವಾರಿಗೆ ಸ್ವಚ್ಛ ಭಾರತ್ ಮಿಷನ್‌ನಡಿ 69 ಲಕ್ಷ ರೂ. ವೆಚ್ಚದಲ್ಲಿ ಜೆಸಿಬಿ, ನಾಲ್ಕು ಟಿಪ್ಪರ್ ವಾಹನ ಖರೀದಿಸಲಾಗಿದೆ. ಪಪಂ ತ್ಯಾಜ್ಯ ವಿಲೇವಾರಿ ಸೇರಿದಂತೆ ಕುಡಿಯುವ ನೀರಿನ ವಿತರಣೆ ಸಮಸ್ಯೆಗೆ ಶಾಶ್ವತ ಪರಿಹಾರ ನೀಡಲಾಗುವುದು ಎಂದರು.

ತಾಲೂಕು ವೈದ್ಯಾಧಿಕಾರಿ ಆರ್.ಅಶೋಕ್, ಮುಖ್ಯ ವೈದ್ಯಾಧಿಕಾರಿ ದೇವಾನಂದ್, ಮುಖಂಡ ಶ್ರೀನಿವಾಸ್, ಬಿಂದು, ಜಿ.ಎನ್.ಪರಶುರಾಮ್, ಹರೀಶ್, ಎ.ಕೆ.ರಮೇಶ್, ಸತೀಶ್ ಗಣಾಚಾರಿ, ಸಿದ್ದಪ್ಪ, ಇಮ್ರಾನ್ ಖಾನ್, ನಾಗರಾಜ್ ರಾವ್, ಪ್ರದೀಪ್, ಅಣ್ಣಪ್ಪ, ಬಸವರಾಜ್ ಇತರರಿದ್ದರು.

https://www.vijayavani.net/shivamogga-parents-make-your-children-aware-of-the-culture